Mariaman angel Gabriel watukusqanmanta

Maria sutiyuq sipasmi Galilea lawpi Nazaret llaqtapi yacharqa, payqa Joseywan casarakunanpaqmi rimapayasqaña karqa. Ayllun Elisabet suqta killa wiksayuqña kachkaptinmi Diospa angelnin Gabriel rikuriykuspan Mariata nirqa: “Rimaykullayki Jehova Diospa ancha bendecisqan Maria”, nispa. Imanasqa chaynata rimapayasqanmanta yachananpaqmi Mariata nirqa: “Wiksayakuspaykim qari wawata wachakunki. Sutinmi kanqa Jesus, payqa wiñaypaq kamachiqmi kanqa”, nispa.

Hinaptinmi Mariaqa nirqa: “Manaraq qariwan puñuchkaspayqa, ¿imaynataq wawayuqqa kayman?”, nispa. Hinaptinmi angel Gabriel nirqa: “Jehova Diospaqqa tukuy imapas atinallanmi. Diospa chuya espiritunwanmi qamqa wiksayakunki. Aylluyki Elisabetpas yuyaq kayninpiñam wiksayuq kachkan”, nispa. Chaymi Mariaqa nirqa: “¡Kayqaya Jehova Diospa serviqninqa kaypi kachkani! Rimasqaykiman hinayá kachun”, nispa.

Chaymantam Mariaqa Elisabetta watukurqa. Chayaruspan Maria rimakuykuptinmi Elisabetpa wiksanpi wawa kuyurirurqa. Hinaptinmi Elisabetqa Diospa chuya espiritun huntaykuptin nirqa: “Maria, qamtam Dios bendeciykusunki. ¡Mayna sumaqmi señorniypa maman watukamuwasqanqa!”, nispa. Mariañataqmi nirqa: “Tukuy sunquywanmi Jehova Diosta hatunchani”, nispa. Mariaqa kimsa killamantam wasinman kutikurqa.

Joseyñataqmi Maria wiksayuq kasqanta yacharuspan casarakuyta manaña munarqachu, chaymi Diospa angelnin sueñoyninpi rikuriykuspan nirqa: “Ama manchakuychu Mariawan casarakuytaqa. Payqa manam huchallikurqachu”, nispa. Chaymi Joseyqa Mariawan casarakurqa.