Diospa akllasqan runa Jesus kasqanmanta

Juanmi kaynata willakurqa: “Ñuqamanta aswan atiyniyuqqa ñam chayaramunqaña”, nispa. Yaqa 30 watanpim Jesusqa Galileamanta Jordan mayuman rirqa, chaypim Juanqa runakunata bautizachkarqa. Jesuspas munarqam Juan bautizananta, chaymi nirqa: “Ñuqatapas bautizaway”, nispa. Ichaqa Juanmi nirqa: “Ñuqaqa manam bautizaykimanchu, aswanqa qamyá bautizaykuway”, nispa. Jesusñataqmi nirqa: “Jehova Diosmi qam bautizawanaykita munan”, nispa. Chaynata niptinmi Juanqa Jordan mayupi yaku ukuman challpuruspa Jesusta bautizarqa.

Bautizakuruspallanmi Jesusqa taytanta mañakurqa, hinaptinmi hanaq pacha kicharikuykuptin Diospa chuya espiritun paloma hina Jesusman uraykamurqa. Hinaspapas hanaq pachamantam Dios nimurqa: “Qanmi kuyasqay churiy kanki, qamtam chaskikipas”, nispa.

Chaynatam Jesusqa Jehova Diospa chuya espiritunta chaskirqa. Chaymantapacham Diospa akllasqan runa utaq Cristo rikurirurqa, hinaspam kay pachapi Diospa munayninta ruwayta qallaykurqa.

Bautizakusqan qipallamantaqmi Jesusqa 40 punchaw chunniqpi karqa, kutiramuspanñataqmi Juanman rirqa. Jesus hamuchkaqta rikuruspanmi runakunata Juan nirqa: “Waqaya llapa runakunapa huchanta pampachaq Diospa malta carneronqa”, nispa. Chaynataqa nirqa Jesus akllasqa runa kasqanta yachanankupaqmi. Qatiqninpim yachasun chunniqpi Jesus kaptin ima pasasqanmanta.