Jesuspa willakusqanmanta

Jesusqa bautizakusqan qipallamanmi Diosmanta willakuyta qallaykurqa. Kaynata willakustinmi purirqa: “Diospa gobiernonqa hichparamunñam”, nispa. Qatiqninkunapas puriysirqam Galilea lawpi hinaspa Judea lawpi. Chaymantam Nazaret llaqtanman kutiruspan Isaiaspa qillqasqanta huñunakuna wasipi Jesusqa kaynata leerqa: “Jehova Diosmi chuya espiritunwan akllawarqa sumaq willakuyta willakunaypaq”, nispa. Hinaspam nirqa: “Kay uyarisqaykichikkunam kunan punchaw cumplikurun”, nispa. Milagrokuna ruwananta runakuna munaptinpas chaywanmi Jesusqa nichkarqa Diospa chuya espirituntaqa mana milagrokunata ruwanallanpaqchu chaskisqanmanta, aswanqa taytanpa gobiernonmanta willakunanpaqpas. Chay ruwayninmi aswan allinqa karqa.

Chaymantam Jesusqa Galilea quchaman rispan Pedrota, Andresta, Santiagota hinaspa Juanta tarirurqa challwa hapichkaqta, hinaspam nirqa: “Qatiwaychik, runakunataña challwanaykichikpaqmi yachachisqaykichik”, nispa. Paykunaqa challwaypi llamkasqankutam chaylla saqirurqaku, hinaspam Jesuswan kuskaña Jehova Diospa gobiernonmanta willakurqaku huñunakuna wasikunapi, mercadokunapi hinaspa callekunapi. Achka runakunapas Jesustam mayman riptinpas qatirqaku. Jesuspa ruwasqankunamantaqa karu nacionpi Siria runakunapas yacharurqakum.

Chaymantañataqmi Jesusqa wakin qatiqninkunaman atiyta qurqa unquqkunata sanoyachinankupaq hinaspa demoniokunata qarqunankupaq. Wakin qatiqninkunawanñataqmi rirqa llaqtan-llaqtan Diosmanta willakuq. Rirqakutaqmi Maria Magdalena, Juana, Susana hinaspa wakin warmikunapas, paykunaqa Jesustawan qatiqninkunatam yanaparqaku. Chay warmikunaqa Diosman sunqum karqaku.

Jesusqa qatiqninkunata sumaqta yacharachispanmi willakunankupaqña kacharqa. Paykunaqa Galilea lawpi willakuspankum achka runakunata yanaparqaku Jesuspa qatiqnin kanankupaq. Achkataqmi Jesustaqa qatiyta munarqaku. Paykunatam Jesusqa tupachirqa cosechanapaqña kaq kawsaywan, hinaspapas qatiqninkunatam nirqa: “Diostayá mañakuychik achka cosechaqkuna kananpaq”, nispa. Chaymantam Jesusqa 70 qatiqninkunata akllarqa iska-iskay Judea lawpi Diosmanta willakunankupaq. Chay qatiqninkunaqa lliw runakunamanmi Diospa gobiernonmanta willakurqaku. Kutiramuspankum kusikuyllawanña imayna kamusqankumanta Jesusman willakurqaku. Satanasqa manamá willakusqankutaqa harkakuyta atirqachu.

Jesusqa manaraq hanaq pachaman ripukuchkaspam qatiqninkunaman kaynata kamachirqa: “Enteron allpa pachapiyá Diospa gobiernonmanta willakamuychik, hinaspayá bautizamuychik”, nispa. Jesusqa sumaqtaraqmi yachachirqa chayta ruwanankupaqqa.