Jesuspa wañukusqanta yuyarinamanta

Judiokunam Egipto nacionmanta librasqa kasqankuta yuyarispa sapa wata nisan killapa 14 punchawninpi pascua fiestata ruwaqku. 33 watapim Jesuswan apostolninkuna Jerusalenpi kaq wasipa altosninpi pascua fiestata ruwarqaku. Mikuyta tukuruptinkum Jesus nirqa: “Huknikichikmi qipanchawanqa”, nispa. Chaymi apostolninkunaqa mancharikuspanku Jesusta tapurqaku: “¿Mayqanniykutaq?”, nispa. Hinaptinmi Jesus nirqa: “Parten tantata qusqaymi”, nispa. Chaynata niykuspanmi Judasman tantata quykurqa. Judasñataqmi tantata chaskiykuspan chaylla lluqsirurqa.

Chaymantam Jesusqa taytanta mañakuykuspan tantata partiykurqa, hinaspanmi apostolninkunaman quykuspa nirqa: “Mikuychik, kay tantaqa tupan qamkunarayku qunay cuerpoywanmi”, nispa. Vinota tomanankupaqpas kaqmantam taytanta mañakurqa, hinaspam nirqa: “Kay vinota tomaychik, kayqa tupan huchaykichikrayku chaqchusqa yawarniywanmi. Kaynatam sapa wata ruwankichik. Chaymantapas nikichikmi: ‘Hanaq pachapim ñuqawan kamachiq kankichik’”, nispa. Chaymi Jesuspa qatiqninkunaqa sapa wata inti siqaykuyta huñunakunku Jesuspa wañukusqanta yuyarinankupaq. Chaytaqa riqsinkutaqmi Jesuspa santa cenan nispapas.

Mikuyta tukuruspallankum apostolkunaqa atipanakurqaku mayqanninku aswan riqsisqa kasqankumanta, chaymi Jesusqa nirqa: “Pipas riqsisqa kayta munaqqa llapallanpa sullkan hinam kanan”, nispa.

Jesusqa nirqaraqmi: “Qamkunaqa kuyasqaymi kankichik, chaymi taytaypa niwasqankunata willaykichik. Ñam kutisaqña taytayman, qamkunaqa kaypiraqmi kankichik. Runakunam kuyanakusqaykichikta qawaspanku yachanqaku ñuqapa qatiqniykuna kasqaykichikta. Chaymi kuyasqayman hina kuyanakunaykichik”, nispa.

Huñunakuy tukuruptinñataqmi Jesusqa taytanta mañakurqa qatiqninkunata waqaychananpaq hinaspa huk sunqulla kanankupaq yanapananpaq. Mañakurqataqmi taytanpa sutin chuyanchasqa kananpaqpas. Chaymantam Jesusqa apostolninkunawan Jehova Diospaq takiruspanku lluqsirurqaku. Manapas unaymantam Jesusta presocharurqaku.