Jesusta presocharusqankumanta

Jesuswan apostolninkunam Cedron wayqunta Olivos muquman rirqaku. Hinaspam chawpi tuta pasayta hunta killa kachkaptin Getsemani huertaman chayarurqaku. Chaypim apostolninkunata Jesus nirqa: “Kaypi qipaspaykichikyá rikchan-rikchanlla kaychik”, nispa. Chaynata niykuspam waklawman rispan qunqurakuykurqa, hinaspam llumpay hukmanyasqallaña kaspan taytanta mañakurqa: “Munaynikiyá ruwasqa kachun”, nispa. Hinaptinmi Jehova Diosqa angelninwan kallpanchaykurqa. Chaymanta kutispanmi Jesusqa kimsa apostolninkunata puñuchkaqta tariruspan nirqa: “¡Rikchariychik! Kaypiñam presochawaqniykunaqa”, nispa.

Judasqa yacharqañam Jesus maypi kasqanta achka kutikama chay huertaman riysisqanrayku, chaymi runakunata pusarikuspan Jesusman chayarurqa. Chay runakunaqa espadayuq hinaspa kaspiyuqmi rirqaku. Judasqa soldadokunatam nirqaña: “Muchaykusqay runam kanqa”, nispa. Chaymi soldadokunaman riqsichinanpaq Jesusta rimakuykuspan muchaykurqa. Jesusñataqmi nirqa: “¿Muchaykuwasparaqchu qipanchawachkanki?”, nispa.

Hinaspam Jesusqa ñawpaqman ichiykuspan chay runakunata tapurqa: “¿Pitataq maskachkankichik?”, nispa. Chay runakunañataqmi nirqaku: “Nazaretmanta kaq Jesustam”, nispa. Chaymi “ñuqam kani” nispa Jesus niykuptin, runakunaqa qipaman wichiykurqaku. Kaqmantam Jesus tapurqa: “¿Pitataq maskachkankichik?”, nispa. Chay runakunañataqmi nirqaku: “Nazaretmanta kaq Jesustam”, nispa. Hinaptinmi Jesus nirqa: “Ñam nikichikña ñuqa kasqayta. Paykunataqa saqiychikyá pasakunankupaq”, nispa.

Chayta qawaspanmi Pedroqa espadanta hurquykuspan Malco sutiyuq runapa rinrinta qurururqa, chay runaqa sacerdotekunata kamachiqpa runanmi karqa. Jesusmi ichaqa chay runapa rinrinta llachpaykuspan sanoyarachirqa, hinaspam Pedrota nirqa: “Espadaykita maymi kasqanman kutiykachiy. Espadawan peleaqqa espadawanmi wañunqa”, nispa. Soldadokunam Jesusta hapiruspa makinta watarurqaku, hinaptinmi apostolninkunañataq ayqikurqaku. Chaymantam runakunaqa Jesusta pusarqaku Anas sutiyuq riqsisqa sacerdoteman. Anasñataqmi Jesusta tapupayaruspan pusachirqa sacerdotekunapa kamachiqnin Caifasman.