Roma llaqtaman Pablota pusasqankumanta

Diosmanta willakunanpaq kimsa kaq illasqanmantam Pabloqa Jerusalenman chayarurqa, chaypim chiqniqninkuna presocharurqaku. Huk tutam carcelpi kachkaptin Pablota musquyninpi hina Jesus kaynata rimapayarqa: “Roma llaqtaman rispaykim chaypi willakamunki”, nispa. Chaymantam Pablotaqa pusarqaku Cesarea llaqtaman, chaypim iskay wata presochasqa karqa. Huk kutipim Festo sutiyuq kamachiqta Pablo nirqa: “Roma nacionta kamachiqmanmi riyta munani juzgawananpaq”, nispa. Hinaptinmi Festo nirqa: “Chaynaqa Roma nacionta kamachiqmanmi rinki”, nispa. Chaymi Pablotaqa boteman qispiykachirqaku Romaman rinanpaq. Paytam riysirqaku Lucaswan Aristarco.

Lamar quchapi kachkaptinkum llumpay wayra-para kakurqa, chaymi achka punchawkuna mana maymanpas riyta atirqakuchu. Botepi kaqkunaqa wañunankutam piensarqaku, ichaqa Pablom nirqa: “Ama manchakuychikchu, ¡manam wañusunchu! Diospa angelninmi niwarqaña Roma llaqtaman llapanchik chayananchikmanta”, nispa.

14 punchaw sasachakusqankumantam Malta sutiyuq islata karullamantaraq rikururqaku. Chayman manaraq chayachkaptinkum botenkuqa aqupi plantakuruspan pakipakururqa, chaywanpas 276 riqkunaqa nadiaspankum lamar quchapa patanman allinlla chayarurqaku. Chaypi yachaqkunam yanaparqaku hinaspa qunikunankupaq ninata ratachirqaku.

Kimsa killamantam soldadokunaqa Pablota huk botepiña Romaman aparqaku. Chayaruptinmi iñiqmasinkuna suyachkasqaku, chaymi paykunata qawaykuspan Pabloqa kallpanchasqa tarikurqa, hinaspapas Diostam agradecekurqa. Preso kachkaptinpas Pablotaqa ariendasqa wasipi yachananpaqmi saqirqaku, chaypim iskay wata huk soldadopa qawasqan yacharqa. Haykam watukuqnin runakunamanmi Pabloqa Diospa gobiernonmanta hinaspa Jesusmanta yachachirqa. Chaymantapas Pabloqa cartakunatam qillqarqa Asia Menor hinaspa Judea lawpi yachaq iñiqmasinkunapaq. Jehova Diospa yanapakuyninwanmi Pabloqa huklaw nacionniyuqkunata achkallataña yanaparqa Diosmanta yachanankupaq.