Jesuspa Yachachisqankuna
Cheqap Diosmanta
¿Diosqa sutiyoqchu?
Jesusqa yachachirqam Diosqa sutiyoq kasqanta: “Qamkunaqa kaynatayá mañakuychik: ‘Hanaq pachapi Taytayku, sutiki yupaychasqa kachun’” nispa (Mateo 6:9). Bibliaqa willanmi Diospa sutinqa Jehová kasqanta (Salmo 83:18). Discipulonkunamanta rimaspanmi Jesusqa Taytanta mañakurqa kaynata: ‘Yachachirqanim pim kasqaykita [otaq sutiykita]’ nispa (Juan 17:26).
¿Pitaq Jehová Diosqa?
Jehová Diosllatam Jesusqa nirqa: ‘Sapallan cheqap Dios kasqanta’ tukuy ima Unanchaq kasqanrayku (Juan 17:3). Chaymi Jesusqa nirqa: “¿Manachu Bibliapi leerqankichik kay pachapa qallariyninpi qaritawan warmita unanchaqpa nisqanta?” nispa (Mateo 19:4). Chaymantapas nirqataqmi: “Diosqa Espiritum” nispa (Juan 4:24); chaymi mana rikunchikchu (Exodo 33:17-20).
¿Imatataq Diosqa munan ñoqanchikmanta?
Mayqen kamachikuytaq aswan hatun kamachikuyqa nispa tapuptinkum Jesusñataq nirqa: “Tukuymanta kasukuna kamachikuyqa kaymi: “Israel runakuna, uyariychik: Señor Diosninchikqa chullallam. Señor Diosnikitam kuyanki tukuy sonqoykiwan, tukuy vidaykiwan, tukuy yuyaynikiwan hinaspa tukuy kallpaykiwan” nispa. Kay kaqlla qatiqninñataqmi nin: “Kuyankim runamasikita kikikita hina”” nispa. (Marcos 12:28-31).
¿Imaynatataq kuyasqanchikta Diosman qawachinchik?
Jesusmi nirqa: ‘Taytaytam kuyani’. ¿Imaynatam chayta qawachirqa? Paymi nin ‘ñoqaqa paypa kamachiwasqantam rurani’ nispa (Juan 14:31.) Chaymantapas nirqam: “ñoqaqa paypa agradonpaq tukuy tiempo rurani” nispa (Juan 8:29). Noñanchikpas paymanta yachaspaqa Diostam agradachwan. Discipulonkunapaq oracionpi mañakuspanmi Jesusqa nirqa: “Chay wiñay kawsayniyoqqa kanku sapallan cheqap Dios kasqaykita reqsiqkunam” nispa (Juan 17:3; 1 Timoteo 2:4).
¿Imaynatataq Diosmanta yachachwan?
Diosmantaqa yachachwanmi tukuy ima unanchasqankunata qawaspa. Piensarinapaq, Jesusmi nirqa: “Qawariychik alton pawaq urpikunata. Paykunaqa manam tarpunkuchu nitaq cosechankuchu, manataqmi taqemanpas imatapas huñunkuchu. Ichaqa hanaq pachapi kaq Taytanchikmi mikuchin. ¡Qamkunaqa urpikunamantapas aswan valeqmi kankichik!” nispa ¿Imatam yachachiwanchik? Manam harkachikunanchikchu imapas necesitasqanchikkunapi afanakuywan Jehová Diosta servinanchikmantaqa (Mateo 6:26-33).
Jehová Diosta astawan reqsinapaqqa Bibliatam estudiana. Jesusmi Bibliamantaqa nirqa: ‘Diospa palabranmi’ nispa (Lucas 8:21). Taytanta mañakuspanmi nirqa: “Palabraykiqariki cheqapmi” nispa (Juan 17:17; 2 Pedro 1:20, 21).
Jesusmi runakunata yanaparqa Jehová Diosmanta cheqapta yachanankupaq. Huknin kaq discipulonmi Jesusmanta nirqa: “¿Manachum sonqonchik ruparirqa ñanpi parlapayawaptinchik hinaspa Bibliamantapas entiendechiwaptinchik?” nispa (Lucas 24:32). Diosmanta yachayta munaspaqa, humildem kananchik hinaspa yanapachikunanchikmi yachanapaqqa. Chaymi Jesusqa consejarqa: “Warmakuna hina mana kaspaykichikqa cheqaptapunim mana yaykunkichikchu Diospa munaychakusqanman” nispa (Mateo 18:3).
¿Imanasqataq Diospa yachachikuyninqa kusichikun?
Diosta reqsiymi yanapawanchik imapaq kawsasqanchikta allinta entiendenanchikpaq. Jesusmi nirqa: “Mayna kusisqam “Diostam necesitani” niqkunaqa” nispa (Mateo 5:3). Jehová Diosmanta yachaymi allinta kawsakunanchikpaqqa yachachiwanchik. Chaymi Jesusqa nirqa: “Aswan kusisqaraqmi Diospa palabranta uyarispa kasukuqkunaqa” nispa (Lucas 11:28; Isaias 11:9).
Astawan yachayta munaspaqa qawariy ¿Qué enseña realmente la Biblia?a nisqan libropa 1 kaq yachachikuyninta
[Willakuy]
a Jehová Diospa testigonkunapa rurasqan.
[6 kaq paginapi dibujo]
“Yachachirqanim pim kasqaykita [otaq sutiykita].” (Juan 17:26)
[6 hinaspa 7 kaq paginakunapi dibujokuna]
Jehová Diosmantam yachachiwanchik tukuy unanchasqankunaqa chaynataq Bibliapas