Jesuspa yachachisqan
Imaynatam kawsananchik runamasinchikwan
¿Imanasqataq kuyapayakuq kananchik?
Pipas kamiwaptinchikqa, ¿imaynataq sientekunchik? Señorninchik Jesucristota qatipakuspaqa lliw runakunawanmi chaynataq cheqniwaqninchikkunawanpas kuyapayakuqmi kananchik. Jesusmi nirqa: ‘¿Ima graciataq kuyasuqnikichikkunalla kuyaynikichikqa? Huchasapakunapas chaytaqa ruranmi. [. . .] Enemigoykichikkunata kuyaspaykichikqa. [. . .] Diospa churinmi kankichik. [. . .] Payqa kuyapayanmi mana reqsikuqninkunatapas chaynataq huchasapakunatapas’, nispa (Lucas 6:32-36; 10:25-37).
¿Imanasqam pampachanakuna?
Huchallikuruspanchikqa Dios pampachawananchiktam munanchik. Jesusmi yachachirqa kaymanta oracionpi mañakunapaq (Mateo 6:12). Yachachirqataqmi runamasinchikta pampachaptinchikqa Diospas pampachawananchikmanta. Nirqam: “Huchallikusuqnikichik runakunata pampachaptikichikqa qamkunatapas hanaq pachapi kaq Taytaykichikmi pampachasunkichik. Runamasikichikkunata mana pampachaptikichikqa Taytaykichikpas manam pampachasunkichikchu mana allin rurasqaykichikkunamanta”, nispa (Mateo 6:14, 15).
¿Imaynatam familiapi kusisqa kawsakuchwan?
Jesus mana casarakuptinpas paymantaqa llapanchikmi yachachwan. Yachasunchikyá kimsa yachachikuykunapi:
1. Qosaqa anchatam warminta kuyanan. Jesusmi kuyapayakuq kayninpi ejemplo qosakunapaq. Discipulonkunatam Jesus nirqa: ‘Mosoq kamachikuytam qoykichik, kuyanakuychikyá, imaynam ñoqapas kuyaykichik chaynata’, nispa (Juan 13:34). Casarasqa qarikuna, ¿imaynatam kay yachachikuyman hina kawsakunmanku? Chaymantapas Bibliaqa ninmi: ‘Cristom iñiqkunata kuyaspan paykunapaq entregakurqa, [. . .] chaynayá qosakunapas warmikichikta kuyaychik imaynam kikikichikpa cuerpoykichikta kuyakusqaykichikta hina, warminta kuyaqqa kikintam kuyakun. Manapunim pipas kikinpa cuerpontaqa cheqninmanchu aswanqa mikuchispanmi allinta uywan, chaynatapunim Cristopas ruran iñiqninkunawan’ (Efesios 5:25, 28, 29).
2. Casarasqakunaqa qosanpaq otaq warmillanpaqmi kananku. Hukwan pierdekuqkunaqa Diospa contranpim huchallikun hinaspam familiantapas sasachan. Jesusmi nin: ‘¿Manachu Bibliapi leerqankichik [. . .] ¿“Qarim tayta-mamanta saqespa hukllawakunqa warminmanña chaymi iskayninku huk runa hinallaña kanqaku” nisqanta. [. . .], chayraykum runaqa mana rakinmanchu Diospa kuskanchasqantaqa. [. . .], ñoqam ichaqa nikichik, huk qariwan mana pierdekuchkaptin yanqamanta warminta wischuspan hukwan casarakuqqa hukwan pierdekuy huchapim kachkan’, nispa (Mateo 19:4-9).
3. Wawa-churikunaqa tayta-mamantam kasukunan. Jesusqa Diospa churin kachkaspanpas kasukuqpunim warmakayninpi uywaqnin tayta-mamanta. Bibliam nin; 12 watayoq kaspan, Nazaretman uywaqnin tayta-mamanwan ‘kutispan chaypi yacharqa paykunata kasukuspan’ (Lucas 2:51; Efesios 6:1-3).
¿Imaynanpitaq kay yachachikuykunata kasukunanchik?
Jesusmi discipulonkunata nirqa: “Kaykunata entienderuspa ruraspaykichikqa kusisqam kankichik”, nispa (Juan 13:17). Jesuspa yachachisqanman hina runamasinchikkunawan kawsakuspanchikqa reqsichikusunmi cheqap cristiano kasqanchikta, paymi nirqa: “Kuyanakuptikichikqa llapallan runakunam yachanqa discipuloykuna kasqaykichikta”, nispa (Juan 13:35).
Astawan yachayta munaspaqa qaway, ¿Imatapunim Bibliaqa yachachin? libropa 14 kaq yachachikuyninta.a
[Willakuy]
a Jehová Diospa testigonkunapa rurasqan.
[16 kaq paginapi dibujo]
Chinkasqanmantaña rikurimuq churimanta rikchanachiywanmi, Jesus yachachiwanchik llakipayakuq hinaspa pampachanakuq kananchikpaq (Lucas 15:11-32)
[17 kaq paginapi dibujo]
Casarasqakunaqa manam hukwanqa pierdekunankuchu