Leeqkunapa tapukuyninkuna

Mateo 19:10-12 nisqanta Jesus nispanqa, ¿nichkarqachu sapallan kanankupaq akllakuqkunaqa mana pipa yachasqallanta chayna kanankupaq chaskisqankuta?

Qawasun solterolla otaq solteralla kaymanta haykapi Jesus rimasqanta. Fariseo runakuna divorciakuymanta tapuptinmi, Jesusqa qawachirqa casado vidata Dios imayna qawasqanmanta. Ichaqa, “millakuypaq imapas rurasqanta” señoranpi tarispanqa, atinmanmi karqa Moisespa chaskisqan leypa nisqanman hina rakikunanpaq papelpi qellqayta, chayqa manam lliwpichu chayna kanan karqa (Deut. 24:1, 2). Jesusmi nirqa: “Huk qariwan mana pierdekuchkaptin yanqamanta warminta wischuspan hukwan casarakuqqa hukwan pierdekuy huchapim kachkan”, nispa (Mat. 19:3-9).

Chayta uyarispanmi Jesuspa qatiqninkuna nirqaku: ‘Casado runa warminwan chayna kaptinqa manam valenchu casarakuyqa’, nispa. Hinaptinmi Jesus nirqa: “Manam llapallan runachu sapallanqa kanman aswanqa chaypaq kaqkunallam. Arí, kanmi nacesqanmantapuni chaypaq kaqkuna, wakinqa kachkan runapa capasqanmi, wakinñataqmi mana casarakunkuchu Diosta servinankurayku. Pipas chaynata kawsay atiqqa nisqayman hinayá rurachun”, nispa (Mat. 19:10-12).

Sapallan kaq runakunaqa wakinkum nacesqankumantam chayna kanku, imapas pasaruptin otaq imapas kuchuruptin. Wakinkum ichaqa casarakuyta atichkaspankupas sapallanku kanku, paykunaqa casarakuy munasqankuta qepanchaspankum “Diosta servinankurayku” solterolla kanku. Jesus hinam chaytaqa ruranku Diosta astawan servinankupaq. Manam chaypaq hinachu nacerqaku nitaq milagrota hinachu chaskirqakupas. Huk rimaypiqa kikinkum chayna kanankupaq tanteakurqaku.

Jesuspa nisqanman hinam, apostol Pablopas nirqa casarasqa otaq soltero cristianokunapas Dios serviy atisqankumanta, ichaqa sapallan kananpaq tanteakuqqa aswan “allintam ruran”. ¿Imanasqa? Casadokunaqa tiemponkuta hinaspa kallpankutam servichikunanku señoranta otaq qosanta agradanankupaq hinaspa cuidanankupaqpas, solterokunam ichaqa chaykunata mana rurananku kaptin Diosta astawan servinku. Chayna ruray atisqankutam solterokunaqa qawanku Diospa regalonta hina (1 Cor. 7:7, 32-38).

Arí, Bibliaqa yachachinmi solterolla kaqkunaqa otaq chayna kaspa kusisqa kaqkunaqa imanasqa chayna kasqankumanta. Manam huk milagrowan hinachu chayna kayta chaskinku, aswanqa kikinkum tanteakunku sapallanku kaspa Diosta astawan servinankupaq. Achka cristianokunam chayrayku tantearunku chayna kanankupaq, hukkunañataqmi kallpanchanku solterolla kasqankumanta.