QARANPI KAQ YACHACHIKUY | ¿IMAMANTAM JESUSQA SALVAWANCHIK?
¿Imapitaq yanapawanchik Jesuspa wañukusqan hinaspa kawsarimusqan?
“Jesucristoman iñiy chaymi salvasqa kanki” (Hechos 16:31).
Hanaypi rikuriq textoqa apostol Pablopa hinaspa Silaspa nisqanmi, chaytam nirqaku Macedonia law Filipos llaqtapi carcelpi llamkaq runaman. Jesuspi iñisqanchik hinaspa wañuymanta librasqa kasqanchik imayna tupasqanta yachanapaqqa, puntatam allintaraq yachananchik imanasqa wañusqanchikmanta. Chaypaq qawasun Bibliapa ima nisqanta.
Runaqa manam wañunanpaqchu unanchasqa karqa
‘Huertapi llapallan sachapa ruruntaqa mikunkim. Allin kaqta hinaspa mana allin kaqta yachanapaq sachapa ruruntam ichaqa ama mikunkichu, chayta mikuruspaykiqa chiqaptapunim wañurunki’ (Genesis 2:15-17).
Diosqa animalkunapa hinaspa sachakunapa kasqan suma-sumaq huertapim Adantaqa churarqa. Paypaqa tukuy rikchaq sachakunam mikunanpaq karqa. Chullalla sachapa ruruntam ichaqa mana mikunanchu karqa, Diosqa willarqam chayta mikuruspaqa wañunanmanta.
Adanqa yacharqam wañuy ima kasqanta, animalkuna wañusqanta qawasqanrayku. Hinaptinqa, paykuna hinalla Adanpas unanchasqa kaptinqa, wañunanmanta Diospa willasqanqa yanqapaqchá kanman karqa paypas wañuqlla kaptinqa. Diospa nisqanwanmi Adanqa entienderqa chay sachapa rurunta mana mikuspaqa wiñaypaq kawsakunanmanta.
Wakinmi ninku hucha ruwasqankuqa warmi-qari puñusqanku kasqanta, ichaqa manayá chaynachu. Aswanqa Jehova Diosqa nirqam: ‘Wawa-churiyuqyá kaychik, kay pachamanyá huntaychik’, nispa (Genesis 1:28). Diospa nisqanqa chiqap sacham karqa. Chaymi payqa suticharqa “allin kaqta hinaspa mana allin kaqta yachanapaq” sachawan, chaykunata tanteananpaq paylla atiyniyuq kasqanrayku. Chay sachapa rurunta Adan mana mikuspanqa qawachinmanmi karqa kasukusqanta hinaspa tukuy imata Dios qusqanmanta ancha agradecekusqantapas.
Adanqa wañururqa Diosta mana kasukusqanraykum
Diosqa Adantam nirqa: ‘“Amam mikunkichu” nisqay rurutam mikurunki’, nispa. Nirqataqmi: ‘Allpaman kutiykunaykikamam sinchita llamkaspa mikunaykita tarinki. [...] Allpallam kanki, allpallamantaqmi kutiykunki’, nispa (Genesis 3:17, 19).
Chay sachapa rurunta Adan mikuspanqa Diospa contranpi hatarispam mana agradecekuq kasqanta qawachirqa. Chaywanqa Jehova Diostam qipanchachkarqa hinaspa kikinpa munasqanman hinaña kawsakuyta akllakuchkarqa.
Jehova Diospa nisqanman hinam Adanqa huchanrayku wañuypi tukurqa. Allpallamanta kasqanraykum allpallaman kutiykurqa. Payqa manam huk lawpichu espiritu hina kawsachkarqa, aswanqa pasaypaqtam tukururqa (Genesis 2:7; Eclesiastes 9:5, 10).
Adanpa miraynin kasqanchikraykum wañunchik
“Huk runallawan kay pachapi huchallikuy qallariruptinmi chayrayku wañuypas rikurirurqa chaymi lliw runakuna huchallikuspanchik wañunchik” (Romanos 5:12).
Adanpa ruwasqanqa hatun sasachakuykunatam apamurqa. Kawsakuyninmi tukururqa, ichaqa manam 70 utaq 80 wata kawsakuyllachu, aswanqa wiña-wiñaypaq kawsakuymi. Chaymantapas pantaq runañam rikurirurqa hinaptinmi llapallan churinkunapas pantaqña nacemurqaku.
Llapallanchikmi Adanpa miraynin kaspa pantaq runakuna kanchik hinaspa wañuypi tukunchik. Chaymantam apostol Pablo nirqa: ‘Ñuqam ichaqa runalla kaspay lliw runakuna hina huchapa munaychakusqan kani. ¡Imapiñataq rikukuni! Kay wañuyman apaqniy aychaymantaqa ¿pitaq libraykuwanqa? Diosllanchikmi señorninchik Jesucristowan libraykuwan’, nispa (Romanos 7:14, 24, 25).
Wiñaypaq kawsakunapaqmi Jesusqa vidanta qurqa
‘Runakunata salvananpaqmi churinta Dios kachamurqa’ (1 Juan 4:14).
Jehova Diosqa churintam kay pachaman kachamurqa Adan hina mana huchayuq nacespa wañuymantawan huchamanta librawananchikpaq. Ichaqa ‘manam ima huchatapas ruwarqachu’ (1 Pedro 2:22). Chayraykum payqa kay pachapi mana wañuspan wiñaypaq kawsakuyta atinman karqa.
Diosmi ichaqa saqirqa enemigonkunawan wañuchisqa kananta. Kimsa punchawmantañataqmi Jesusqa espiritupi kawsarichisqa kaspan hanaq pachaman kutirqa. Chaypim paypa taytan wañukusqanta chaskirqa, hinaptinmi Adanpa chinkachisqan wiñaypaq kawsakuy kaqmanta rikurirqa. Chayraykum Jesuspi iñiq runakunaqa wiñay kawsayta haypayta atinmanku (Romanos 3:23, 24; 1 Juan 2:2).
Arí, Jesusqa vidanwanmi Adanpa chinkachisqan wiñay kawsayta kaqmanta rikurichirqa. Bibliam nin: “Runakunata Dios favoreceptinmi Jesusqa llapallanpa rantinpi wañurqa”, nispa (Hebreos 2:9).
Tukuy chaykunam Jehova Diospa allin ruwayninkunamanta yachachiwanchik. Huchasapa runakunaqa manam atichwanchu karqa huchamantawan wañuymanta librakuytaqa. Diosqa kuyakuq hinaspa llakipayakuq kasqanraykum kikinpuni chayta allicharqa. Churinpa chuya cuerponwanmi runakunata rantichkaq hina wañuymantawan huchamanta hurquwarqanchik (Romanos 5:6-8).
Jesuspa kawsarimusqanman hinam hukkunapas kawsarimunqaku
‘Chiqaptam Cristoqa kawsarimurqa, payqa wañuqkunamanta punta kawsarimuqmi. Imaynam wañuy kay pachaman yaykumurqa huk runantakamalla chaynataqmi kawsarimuypas hamurqa huk runantakamalla. Imaynam Adanpa huchallikusqanwan llapallan runa wañunchik, chaynallataqmi Cristopi iñiqkunapas llapallanchik kawsarimusunchik’ (1 Corintios 15:20-22).
Yachanchikmi kay pachaman Jesus hamusqanmanta hinaspa wañukusqanmantapas, ichaqa ¿imaynatam yachachwan kawsarichisqa kasqanmanta? Jesusqa achka runakunamanmi achka qawaqpi rikuriykurqa. Huk kutipim 500 masnin runakunaman rikuriykurqa. Chaymantam rimarqa apostol Pablo Corinto lawpi iñiqkunaman carta qillqasqanpi. Chaypiqa nirqataqmi Jesuspa kawsarimusqanmanta wakin qawaqninkuna kawsasqantaraq, chaynapi paypa nisqan chiqap kasqanta qawachinanpaq (1 Corintios 15:3-8).
Pablom nirqa Jesusqa wañuqkunamanta ‘punta kawsarimuq’ kasqanta, chayqa hamuq tiempopi achka runakuna kawsarimunanmanta mana iskayrayanapaqmi. Kikin Jesusmi nirqa: ‘Diospa churinpa qayasqanta uyarispankum llapallan wañuqkuna kawsarimunqaku’, nispa (Juan 5:28, 29).
Wiñaypaq kawsakuyta munaspaqa Jesuspim iñinanchik
‘Diosqa ancha-anchatam kuyarqa runakunata, chaymi sapallan churinta qumurqa pipas paypi iñiqqa manaña puchukaspa wiñaypaqña kawsananpaq’ (Juan 3:16).
Bibliapa qallariynin paginankunapim rimachkan haykapi wañuy qallarisqanmanta hinaspa sumaq huerta chinkasqanmantapas. Tukuynin paginankunapiñataqmi rimachkan wañuy haykapi chinkananmanta hinaspa kay allpapi sumaq huerta imayna rikurinanmanta. Chaypiqa lliw runakunam wiñaypaq kusisqa kawsakunqaku. Apocalipsis 21:4 nin wañuyqa manaña kananmanta, chaymantapas 5 kaq versiculopim ninraq: ‘Kay nisqaykunaqa confiakunapaqmi hinaspa chiqapmi’, nispa. Jehova Diospa tukuy nisqankunaqa ruwakunqamá.
¿‘Confiakunapaq hinaspa chiqap’ kasqanpaqchu hapinki chay nisqankunata? Chayna kaptinqa, Jesusmanta astawan yachay hinaspa paypi iñiy, chaynapi Jehova Diospa chaskisqan kanaykipaq. Payqa, kunan bendecisuspaykipas hamuq tiempopim wiñay kawsakuyta qusunki. Chaypiqa “manañam kanqachu wañuypas, [...] waqaypas nitaq nanaypas”.