QARANPI KAQ YACHACHIKUY | ¿ALLINRAQCHU ALLIN KAQKUNATA RUWAYQA?
¿Allinraqchu kanman mana llullakuq nitaq mana suwakuq kay?
Hitoshi sutiyuq runam Japón nacionpi llamkarqa huk empresapi contador hina. Huk kutipim patronnin nirqa llamkasqankumanta llullata willakunanpaq. Hitoshim ichaqa nirqa mana llullakuy munasqanmanta. Hinaptinñataqmi patronnin nirqa mana llullakuptinqa llamkaymanta qarqurunanpaq, arí llamkaymantamá qarqururqa.
Qatiqnin killakunapim, Hitoshiqa mana llullakunanpaq hina llamkayta mana tarisqanrayku hukmanyarurqa. Huk kutipim llamkananpaq huk runawan parlaq rispan nirqa llullakunanpaq kamachiptinqa chayta mana ruwananmanta. Hinaptinmi chay runañataq nirqa: ‘¡Yanqañam chayna piensaynikiqa!’, nispan. Chaymi payqa iskayrayarurqa mana llullakuy allinpaq utaq mana allinpaq kasqanmanta, ninmi: “Tapukurqanim ¿allinchu mana llullakuy munasqaymanta willakuyniy icha manachu?, nispay”. Ayllunwan amistadninkunam ichaqa hinalla kallpancharqaku munasqan llamkayta hinalla maskananpaq.
Hitoshita ima pasasqanmi qawachin mana llullakuqtaqa yaqa llapan runakuna mana allinpaq hapisqankuta. Wakinkunataqa mana llullakuq kayqa sasachanmi imapas ruwayninkupi, aswanraqmi rantikuqkunataqa. Sudáfrica nacionmanta kaq warmim nin: “Llamkaqmasiykunaqa llapankum llullakunku, chaymi ñuqapas wakinpiqa paykuna hina llullakuytaña munani”, nispa.
Yaqa llapallan runakunam llullakunku. Robert Feldman sutiyuq profesormi chunka runakunata qawarqa chunka minutopi imayna parlasqankuta, hinaptinmi chay chunka runakunamanta suqta llullakurqaku, tawañataq mana (Psicólogo de la Universidad de Massachusetts). Paymi nin: “Ancha admirasqam qiparurqani chay qawasqaywan. Manam piensarqanichu yaqa llapallan runakuna llullakunankutaqa”, nispa. ¿Imanasqaya, pipas mana llullakunankuta munachkaspanpas, hukkunataqa llullakuntaq?
¿Imanasqataq llumpaychata mirarun llullakuy, suwakuy hinaspa chayna mana allin ruwaykuna? ¿Imaynatataq chaykunaqa runakunata sasachan? ¿Imataq yanapawachwan mana llullakunapaq?