Diosqa llakikusunkim

¿IMATAM YACHACHWAN IMAYNA UNANCHASQA KASQANCHIKMANTA?

Runakunaqa runamasinchik ñakariptinqa llakikunchikmi ñuqanchiktapas pasawachkanchikmanpas hina. Rick Hanson sutiyuq doctormi nin: “Nacesqanchikmantapacham runakunaqa runamasinchikkunamanta llakikuq kanchik”, nispa.

KAYPI YUYAYMANAY: Runakunallam runamasinchikkunamantaqa llakikunchik, uywakunam ichaqa mana. ¿Imanasqa? Runakunalla Diospa imayna kasqanman hina unanchasqa kasqanchikraykum (Genesis 1:26). Chaymi ñuqanchikqa Dios hina kuyakuq, llakipayakuq kayta atinchik. Chayraykum runamasinchikta llakipayaspanchikqa unanchawaqninchik Dios hina llakipayakuq kachkanchik (Proverbios 14:31).

BIBLIAM YACHACHIN DIOSQA LLAKIPAYAKUQ KASQANMANTA

Diosqa llakikunmi ñakarisqanchikta qawamuspanqa, manamá munanchu ñakarinanchiktaqa. Egipto nacionpi Israel llaqtan kaptinqa hinaspa 40 wata chunniq allpapi llaqtan puriptinqa Diosqa anchatam llakikurqa, bibliam imayna tarikusqanmanta nin: ‘Runankunapa ñakarisqankunata qawaspanmi paypas ñakarirqa’, nispa (Isaias 63:9). Diosqa manam llaqtan imayna ñakarisqallantachu qawamurqa, aswanqa paypas ñakarirqam chayta qawamuspan. Kikinmi nirqa: ‘Yachanim nanaypi kallasqankutapas’, nispa (Exodo 3:7). Diosqa ninraqmi: “Pipas qamkuna llapchaykuqqa, ñawi ruruytam llapchaykun”, nispa (Zacarias 2:8). Arí, pipas ñakarichiwaptinchikqa taytanchik Diospa sunqunmi anchata nanan.

Wakinpiqa imatapas ruwarusqanchikraykum sunqunchikpi ñakakunchik hinaspa piensanchik Diosqa mana llakipayawananchikmanta, ichaqa ‘Diosninchikmi aswan allintaqa sunqunchiktaqa riqsin’ (1 Juan 3:19, 20). Kikinchikmantapas aswan sumaqtam Diosqariki riqsiwanchik. Sumaqtam yachan imapas pasawasqanchikta, ima piensasqanchikta hinaspa imayna tarikusqanchikta.

Bibliam nin:

• “Chayna kaptinqa qayakamuwasqaykitapas uyarisqaykim, yanapanaypaq qayakamuwaptikipas ‘kaypim kachkani’, nisqaykim” (ISAIAS 58:9).

• ‘Qamkunapa allinnikichikpaq imam ruway munasqaytaqa sumaqtam yachani. Qamkunapa allinnikichiktam tanteachkani, manam mana allinnikichiktachu, chaynapi hamuq punchawkunapi hawka kawsakunaykichikpaq. Ñuqa tayta Diosmi chaynata nini. Chaymi qayakamuwaspa mañakuwaptikichik uyarisqaykichik’ (JEREMIAS 29:11, 12).

• ‘Wiqiykunatapas puyñuykimanmi huñurqanki. ¿Manachum chaykunaqa libroykipi qillqasqa kachkan?’ (SALMO 56:8).

DIOSQA YUYAWANCHIKMI, YACHANMI IMAYNA TARIKUSQANCHIKTA, LLAKIKUNTAQMI IMAPAS PASAWAPTINCHIKQA

Imayna tarikusqanchikta Diospa yachasqanqa, ¿yanapawanchikchu sasachakuykunata atipanapaq? Mariamanta rimarisun.

Paymi nirqa: “Llumpay llakisqam tarikurqani 18 watallanpi waway cancer unquywan wañukuptin, iskay wata ñakarisqantam qawarqani. Sunqullaypim nirqani: ¿Imanasqamá kaynatañaqa ñakariniku? ¿Imanasqamá Jehova Diosqa mana sanoyaykachinchu?, nispa.

Jehova Dios mana kuyawasqantam piensarqani. Chaymanta suqta wata qipatam amistadniyman willarqani sunquypi imayna tarikusqaymanta. Hinaptinmi unaysu sumaqta uyariykuwarqa, hinaspam bibliapi 1 Juan 3:19, 20 ima nisqanta yuyarichiwarqa, chaypim nin ‘Diosqa aswan allinta sunqunchikta riqsisqanmanta hinaspa lliwta yachasqanmanta’. Chaymi niwarqa Jehova Diosqa ñakarisqanchikkunata sumaqta entiendisqanmanta.

Chaywanpas hinallam hukmanrayasqa karqani. Huk punchawmi Salmo 94:19 nisqanta ñawincharurqani, chaypim nin: ‘Llakipa intusqan kallaptiymi sunqullayta tiyaykachispa kusiykachillawarqanki’, nispa. Chay ñawinchasqaymi anchata kallpanchawarqa. Chaymi chayraq Jehova Diosman sunquypi ima llakichiwasqanta willakurqani uyariwasqanmanta mana iskayrayaspay. Chayqa anchatam hawkayaykachiwarqa”, nispa.

Sunqunchikmá kusikun Diosqa entiendiwasqanchikmanta hinaspa llaki qatiwaptinchik paypas llakikusqanmanta yachasqanchikwan. Ichaqa tapukunchikpaschá ¿imanasqataq ñakariykuna kan? ¿Huchanchikkunamantachu Diosqa castigawachkanchik? ¿Haykallapipas ñakariykunata chinkachinqachu? Chaykunamantam qatiqninpi yachaykusunchik.