Ayllupa horarion: congregacionpi huñunakuykunapaq
1 Cristiano tayta-mamakunaqa munankupunichá churi-wawanku Jehová Diosta kuyakunankuta, servinankutapas, chaynapi Diospa prometesqan mosoq allpapi wiñaypaq kawsanankupaq. ¿Imaynatam churi-wawankuta yachachinmanku puntata kawsayninkupi Jehová Diosta yupaychanankupaq? Allin kawsayninkuwanmi (Pro. 20:7). Testigo mamanta yuyarispam huk pani, nirqa: “Manam haykapipas tapunakurqanikuchu risunchu icha manachu huñunakuyman, nispaqa”. Chayqa sonqonkamaraq chayasqa.
2 ¿Aylluyki entiendenchu imapaqmi congregacionpi huñunakuykuna kasqanta? Huñunakuypi yachasqanchik hinaspa wawqe-paninchikkunawan tupasqanchikpas kallpanchawanchikmi Jehová Diospa munayninta hinalla rurananchikpaq (Isa. 54:13; Rom. 1:11, 12). Ichaqa, huñunakunchik ‘lliw huñunakuqkunapa chawpinpi’ Jehová Diosta hatunchananchikpaq (Sal. 26:12). Huñunakuykunapiqa Jehová Diosta kuyasqanchikta hinaspa yupaychasqanchikta qawachinchikmi.
3 ‘Allinta qawakunanchik.’ Huñunakuykuna chuya kasqanta yachaspam ‘allinta qawakunanchik’, mana haykapipas huk ruraykunarayku huñunakuyninchikkunata saqenanchikpaq (Efe. 5:15, 16; Heb. 10:24, 25). Ayllupaq horariota allichaspaqa, congregacionpi huñunakuykunataraq puntata qellqay hinaspa ima ruraywanpas ama harkachikuychikchu huñunakuyman rinaykichikta. Aylluykipaq ima ruraykunamantapas huñunakuykunata churay.
4 ¿Manachu kusikunchik wawqe-paninchikkuna huñunakuykunaman asambleakunamanpas rinankupaq imaynata sasachaykunata atipasqankuta leespa? Yaqapaschá qampaqqa mana nisyu sasachu huñunakuykunaman riyqa, ichaqa atipachkankichá sasachakuykunata. Jehová Diospa serviqninkunata urmachinanpaq Satanasqa toqllakunata churachkan. Tayta-mamakunapa huñunakuykunaman aylluntin rinankupaq kallpanchakusqankutaqa, wawakuna allinta qawanqakupaschá. Hinalla kallpanchakuptinkuqa, churi-wawakuna mana haykapipas rurasqankuta qonqanqakuchu.