¿Diospa Palabranta defiendechkanchikchu?
1 Kay pachapi Bibliata mana allinpaq qawasqankupim, cheqap cristianokunaqa Diospa Palabranta defiendenchik. Segurom kanchik “Bibliapi llapallan qellqasqa kaqkunaqa Diospa Espiritunpa” yuyaychasqan kasqanta, chaymi Jesucristo hina Jehová Diosta ninchik: “Palabraykiqariki cheqapmi”, nispa (2 Tim. 3:16; Juan 17:17). Hinaptinqa, ¿imaynatam Diospa Palabranta allintapuni defiendechwan?
2 Bibliapa textonkunata yachasunchik: Cheqaptamá Jesusqa Diospa Palabranta allintapuni estudiarqa. Chayraykum tukuy tiempo predicasqanpi Bibliamanta yachachirqa (Luc. 4:16-21; 24:44-46). ¿Imaynatam yuyanchikman achka textokunata? Sapa punchaw Bibliata leespa chaynataq predicacionpi yanapawaqninchik textokunapi yuyaymanaspa. Huñunakuykunapaq preparakuspanchikqa llapallan textokunatam Bibliapi leenanchik hinaspa piensachwanmi huñunakuypi chay textomanta rimanapaq. Huñunakuykunapiqa maskananchikmi yachachimuqpa nimusqan textokunata. Bibliapa textonkunata yachaspaqa allin preparasqam kasunchik ‘Diospa cheqap palabranta allinta yachachinapaq’ (2 Tim. 2:15).
3 Bibliawan yachachisun: Predicaspanchikqa Bibliawanmi yachachinanchik. Ejemplopaq, atikuptinqa sapakama runamanmi huk textota leepunanchik. Sichu tapukuwasun otaq sasa kutichinapaq hina tapukuykunata ruraptinqa, allinpunim kanman Bibliawan kutichiyninchikqa. Wasiyoqpa mana tiempon kaptinqa, atichwanmi Bibliapa nisqanta leeykapuyta kaynata nispa: “Manaraq pasakuchkaspay kay textota leeykapusqayki”, nispa. Atikuptinqa paywan kuska Bibliamantapuni leesunchik.
4 Huk wawqenchikmi huk runaman achka textokunata qawachirqa Trinidad nisqa yachachikuy pantay kasqanta qawachinanpaq, hinaptinmi chay runa kaynata nirqa: “Warma kasqaymantapacham iglesiayman richkani ichaqa manamá Bibliapa kayna nisqantaqa yacharqanichu”, nispa. Chayraykum Biblia estudiayta qallarirqa. Jesusmi nirqa ovejaykunaqa rimasqaytam uyarinqaku nispa (Juan 10:16, 27). Allin sonqoyoq runakuna cheqap yachachikuyta tarinankupaqqa Bibliapipunim leenanku. Chaynaqa Diospa Palabran cheqap yachachisqantayá defiendesunchik.