“Mayna kusisqam sasachakuykuna hamuptin pacienciakuq runaqa”
1 Lliw cristianokunam sasachakuykunapi tarikunchik, onqoykunawan, qollqe mana haypakusqanwan, tentacionkunawan otaq qatikachasqa kasqanchikwanpas (2 Tim. 3:12). Chayna sasachakuykunawanmi Satanas munan kallpanchakuyninchikpi pisiyarunanchikta, Dios serviyninchikpi qellapakurunanchikta chaynataq Jehová Diosninchikta manaña servinanchikta (Job 1:9-11). Ichaqa, ¿imaynanpitaq ninchik sasachakuykuna hamuptin pacienciakuq runaqa kusisqam tarikunman nispa? (2 Ped. 2:9.)
2 Pruebakunapaq preparakusun. Jehová Diosqa Bibliapim cheqapta yachachiwanchik, chaypim Jesuspa yachachisqankunamantawan kawsakusqanmantapas willakuchkan. Sichum Jesuspa nisqanta uyarisunchik chaynallataq kasukusunchikpas hinaptinqa iñiyninchikpim allintapuni kallpanchakusunchik sasachakuykunata atipananchikpaq (Luc. 6:47-49). Chaynallataqmi wawqe-paninchikkunapas, huñunakuykunapas hinaspa allin yuyayniyoq confianza sirvientepa rurasqan qellqakunapas kallpanchawanchik. Chaynataqmi imay ratopas Jehová Diostaqa mañakuykuchwan (Mat. 6:13).
3 Jehová Diosqa suyakuytapas qowanchikmi. “Lamar qochapa patanpi bote watasqa hinam confianzanchikqa almanchikta takyachin” Jehová Diospa promesankunapi iñiptinchikqa (Heb. 6:19). Bibliapa willakusqan ñawpa tiempokunapiqa allin tiempoña kaptinpas manam buquekunaqa haykapipas lamar qochantaqa riqchu hatu-hatun llumpay llasaq sinki kaqlla takyachiqninta mana aparikuspaqa. Sinchi wayra-para karuptinqa chay buque takyachiq kaqtam lamar qochaman chamqaqku chaynapi taqra rumikunaman tuparuspan mana chay buque pakipakurunanpaq. Chaynallataqmi Diospa promesankunapi iñiyninchikpas qaqa hina allinta takyachiwasunchik kay sasallaña kawsaypi sasachakuykuna chayamuwaptinchikpas. Qonqayllamantam sasachakuykunaqa rikurimunman. Chaynam pasakurqa Listra llaqtapi. Pablowan Bernabe chay llaqtapi predicayta qallaykuptinkum runakunaqa allinta chaskikurqaku, ichaqa manam chaynañachu karqa rurasqankupa contranpi judiokuna qonqayta chayaramuptinkuqa (Hech. 14:8-19).
4 Pacienciakuyqa kusikuytam tarichiwanchik. Qatikachasqa kaptinchikpas tukuy sonqowan hinalla predicayninchikmi hawkayayta qowanchik. Kusikunchikmi ancha favorecesqa kasqanchikmanta Cristorayku ñakarisqanchikwan (Hech. 5:40, 41). Chay pruebakuna aguantayninchikmi yanapawasun humilde kananchikpaq, kasukunanchikpaq hinaspa pacienciakunanchikpaqpas (Deu. 8:16; Heb. 5:8; Sant. 1:2, 3). Chaymantapas Jehová Diospi hapipakuytam yachanchik hinaspa paypitaqmi amparakunchikpas (Pro. 18:10).
5 Yachanchikmi pruebakunaqa pasaruqlla kasqanta (2 Cor. 4:17, 18). Pruebakunam yanapawanchik Jehová Dios kuyasqanchikta qawachinanchikpaq. Aguantaspanchikqa Satanaspa yanqakuna rimasqantam qawachisun. Chaynaqa hinallayá kallpanchakusunchik. “Mayna kusisqam sasachakuykuna hamuptin pacienciakuq runaqa. Payqa chay sasachakuykunata venceruspanmi premionta chaskinqa. Chay premioqa kuyaqninkunaman Diospa prometesqan wiña-wiñaypaq kawsakuymi.” (Sant. 1:12.)