Tapukuykunapaq kaq

◼ ¿Imaynatataq pachakunanchik Jehová Diosta yupaychanapaq kaq sucursalkunata, huñunakunanchik salonta otaq asambleaman rispaqa?

Allpantinpim Jehová Diospa testigonkunapa huñunakunanku Salonkuna, Asambleakuna kananpaq Salonkuna, Betel wasikuna hinaspa Sucursalninkunapas Diosta servinapaq sapaqchasqa wasikuna kasqantam yachanchik. Kay wasikunaqa huñunakunanchikpaq hina sumaq rurasqa kaspanmi, mana rikchakunmanchu kay pacha Satanaspa munaychakusqanpi mayqen wasikunamanpas. Chaymi Jehová Diosta yupaychanapaq sapaqchasqa wasikunata visitaqkunaqa musyakunankum chay yupaychana wasikunawan Jehová Diosqa munayninta rurasqanta.

Cheqap cristianokunaqa lliwpim ‘qawachinchik Dios serviq kasqanchikta’, respetowan hina pachakuyninchikpi hinaspa allichapakuyninchikpipas (2 Cor. 6:3, 4). Chaymantapas allin respetoyoq hinataqmi comportakunanchik. Chaymi cheqap cristianokunaqa pachakusqanchikpi hinaspa allichapakusqanchikpipas respetoyoq kasqanchiktam qawachinanchik, Nueva York llaqtapi Jehová Diospa testigonkunapa oficina principalninta otaq allpantinpi mayqen sucursalninkunatapas visitaspapas.

Cuerponchik chuya kananta, respetanapaq hina pachakuymanta, predicacionman otaq congregacionpi huñunakuykunaman rinapaq allichapakuymanta willaspanmi Organizados para hacer la voluntad de Jehová, nisqa sutiyoq libropi nin (139 kaq paginanpa, 1 kaq parrafonpi): “Manam qonqananchikchu Betel ninanqa ‘Diospa Wasin kasqanta’ nispa. Chaynaqa huñunakunanchik Salonpi Diosta yupaychanapaq hinam allichapakuyninchik hinaspa portakuyninchikpas kanan”. Chaymi cheqap cristianokunaqa Betel wasita visitaspankuqa kay yachachikuykunatam kasukunanku, hichpanpiña yachaspa otaq karumanta hamuspankupas. Chaynata ruraspankum qawachinku valorasqankuta hinaspa respetasqankutapas (Sal. 29:2).

Respetowan pachakusqanchikmi reqsichiwasun ‘Diospa agradonpaq [hina] kawsasqanchikta’ (1 Tim. 2:10). Respetowan pachakusqanchikta hinaspa allichapakusqanchiktapas qawaspankum runakunaqa allinpaq hapinqaku Jehová Dios yupaychayninchiktaqa. Ichaqa preocupawanchikmi wakin wawqe-paninchikkuna Jehová Diosta servinapaq sapaqchasqa wasikunaman visitaspankuqa penqaypaq mana allinta pachakuspa chaynataq allichapakuspa risqanku. Manamá haykapipas chaynataqa pachakunankuchu Jehová Diospa serviqninkunaqa. Diosta serviqkuna hinam vidanchikpiqa tukuy kawsayninchikpi kay yachasqanchikman hinapuni ‘llapanta rurana Diosninchik honrasqa kananpaq’ chaynata kawsaspan Jehová Diospa llaqtanqa kay pachapi kaqkunawanqa mana rikchakunqachu (Rom. 12:2; 1 Cor. 10:31).

Chaymi Nueva York llaqtapi Jehová Diospa Testigonkunapa oficina principalninta hinaspa chaypi sucursaltapas otaq allpantinpi mayqen sucursalnintapas visitayta munaspaqa, tapukunanchikmi: “¿Kayna pachakusqay hinaspa allichapakusqaypas qawachinchu visitakusqay wasi respetasqayta? ¿Allintachu qawachichkani yupaychasqay Jehová Diosta? ¿Allichapakusqaychu qawachichkan pitapas mana respetasqayta?”. Chaynaqa tukuy tiempoyá ‘salvaqninchik Diospa yachachikuyninkunata [...] sumaqllataña qawachisunchik’ allichapakuyninchikpi, pachakuyninchikpi hinaspa ima rurasqanchikpipas (Tito 2:10).