Llakiyoq kaqkunata consuelasunchik
1. ¿Imanasqataq llakipi kaqkunaqa consuelota necesitanku?
1 Kuyasqa ayllunchik wañuptinqa hukmanyanapaq hinaraqmi, Diospa Gobiernonpi mana suyakuyniyoqkunapaqtaq aswan llakiraq (1 Tes. 4:13). Achkam tapukunku: “¿Imanasqataq wañukun? ¿Maypitaq kachkan? ¿Tupaymanraqchu?” nispa. Qatiqnin puntokunapi yanapaykunaqa allinmi kanqa predicacionpi consuelanapaq pipas ayllunkuta wañuypi pierderuqkunata (Isa. 61:2).
2. Pipas ayllun wañusqanmanta llakipi kasqanta niwaptinchikqa, ¿unayta predicaspachu consuelachwan?
2 Wasin-wasin predicaspa: Piensasun pipas chayllaraq ayllun wañurusqanmanta willawasqanchikpi. ¿Llaki uyachu kachkan? ¿Lliw ayllunkuchu wasinpi llakisqallaña kachkanku? Chayna kaptinqa, allinmi kanman mana unay-ta demoraspa predicayqa (Ecl. 3:1, 7). Llakipayarikusqanchikta qawachispam tratadota, revistata otaq llakisqankuwan tupaq mayqen folletotapas qoykuspa despedikuykuchwan. Chaymantañach kutimuspa yachachichwan wañuqkunamanta Bibliapi yachachisqanwan consuelanapaq.
3. Bibliamanta leenaykipaq allin kaptinqa, ¿Mayqen textokunatataq Bibliamantaqa leepuwaq llakipi kaq runaman?
3 Pitapas predicaspaqa sutillam musyakusun haykapi astawan demorananchikta. Manachá pantaypi creesqankunataqa chayllachu bibliawanqa qawachichwan, ichaqa leekapuchwanmi Bibliapi wañuqkuna kawsarimunanmanta (Juan 5:28, 29). Ichapas allinchá kanqa Bibliawan willayqa imayna wañuqkuna tarikusqanta (Ecl. 9:5, 10). Llakiqta kallpanchanapaqmi qawachichwan Bibliapi wañuqkuna kawsarimusqanmanta (Juan 11:39-44). Chaymantapas leepuchwanmi Jehová Diospi suyakuq Jobmanta (Job 14:14, 15). Manaraq pasakuchkaspam qochwan ¿Qué nos sucede cuando morimos?, Cuando muere un ser querido nisqan qellqata otaq consuelanapaq hina mayqen qellqakunatapas. Chaymantapas saqechwanmi ¿Qué enseña realmente la Biblia?, nisqa librota hinaspa 6 kaq yachachiyninta qawachispam kutimunapaq nichwan chaymanta yachachinapaq.
4. ¿Maykunapitaq allinpuni kanman consuelanapaq?
4 Wakin kutikunapi: Sichum wañukuqmanta huñunakusqanchik Salonpi discurso kaptinqa, ¿kanqapaschá chay huñunakuypiqa mana iñiq runakunapas? Qochwanmi consuelanapaq qellqakunata. Wañuqkunapaq cajonkuna vendeqkunapas, allinpaqmi hapinku llakipi kaqkunata consuelanankupaq qellqakunata paykunaman saqeptinchik. Chaymantapas wañukuqkunamanta radiokunapi otaq periodicokunapi lloqsimuptinqa allinmi kanman ayllunkunaman pisillapi qellqaspa consuelanapaq cartaykuyqa. Huk runapa warmin wañukuptinmi payman hinaspa churinmanpas huk paninchik cartaspan apachirqa tratadokunata. Hinaptinmi huk punchaw paninchikpa wasinta takaykamuspa chay runaqa warmi-churinwan nirqa: “¿Qamkunachu kay cartata apachimurqankichik? Astawanmi Bibliamanta yachayta munani” nispa. Hinaptinmi payqa warmi-churinpiwan estudiayta qallaykurqaku hinaspa rinkuña huñunakuykunamanpas.
5. ¿Imanasqataq listo kananchik ayllun wañukuptin llakiyoqkunata consuelanapaq?
5 Eclesiastes 7:2 nin: “Convido wasiman riymantaqa wañuchikuqpa wasinman riymi aswan allinqa”. Chay rurayqa aswan allinmi, wañuqpa ayllunqa uyarinqam Diospa Palabranta kusirikuykunallapi piensaq runamantaqa. Chaymi, listollaña kananchik ayllun wañusqanmanta pipas waqaqkunata consuelanapaq.