¿Yachachiyta atiymanchu?
1. Diosta servisqanchikpi, ¿ima rurasqanchiktaq anchata kusichiwanchik?
1 Pimanpas Diosmanta cheqap kaqkunata yachachispanchikmi anchata kusikunchik. Kusikunapaqmá cheqapmanta yachay munaqta tarisqanchikqa, Diospa Gobiernonmanta willasqanchikta chaskikusqankuqa, Jehová Diosman asuykunankupaq kallpanchakusqankuqa hinaspa vidankutawan piensayninkuta tikrasqankuqa (Sant. 4:8). Chaynata yanapanapaqqa lliw predicaqkunam kallpanchakunanchik (Mat. 28:18, 20).
2. ¿Imanasqataq hukkunaqa Bibliamanta estudio qoyta mana atinkuchu, hinaspa imaynatam chayta atipanmanku?
2 Jehová Diospi confiakuy: Diosta ñawpa tiempopi serviqkunapas paypa kamachisqanta mana ruray atinankupaqmi sientekurqaku. Chaywanpas Moises, Jeremias Amos hinaspa hukkunapas Jehová Diospi confiasqankurayku manchakuyninkuta atiparqaku, chaynapim Diospa kamachisqanta cumplirqaku (Exo. 4:10-12; Jer. 1:6, 7; Amos 7:14, 15). Kikinmanta hinaspa iñiqmasinkunamantam Pablo nirqa: ‘Mana manchakuspam willarqaniku’, nispa. ¿Imaynatam chayta rurarqaku? Pablom nirqa: “Diosninchikmi kallpanchawarqaku”, nispa (1 Tes. 2:2). Chaynaqa Jehová Diosmi qowasunchik yachayta, yanapayta hinaspa kallpata Bibliamanta runakunaman allinta yachachinanchikpaq (Isa. 41:10; 1 Cor. 1:26, 27; 1 Ped. 4:11).
3, 4. ¿Ima yanapakuytaq kachkan Bibliamanta allinta yachachinapaq?
3 Yanapachikuy: Mana igualay atina Yachachiwaqninchik Jehová Diosmi llaqtanpi huñunakuywan yanapawanchik Palabranmanta allin yachachiq kananchikpaq (Isa. 54:13; 2 Tim. 3:16, 17). Chay yanapakuyta allinta servichikuspayá Bibliapa yachachikuyninkunata astawan yachay, chaynapi allin yachachiq kanaykipaq. Congregacionpi lliw huñunakuymi yanapawanchik allin yachachiq kananchikpaq, aswanraqmi Diosta Servinapaq Yachachiq Huñunakuywan Diosmanta Willakunapaq Yachachiq Escuelaqa.
4 Kallpanchakuy sasa entiendenapaq kaqkunatapas facillata yachachinaykipaq. Chaypaqmi yanapachikuwaq Benefíciese nisqa libropa 227 kaq paginanpa nisqanwan, chaypim nin: “Yachachisqaykita hukkuna entiendenankupaqqa puntatam kikiki allinta entiendenayki”, nispa. Chaymantapas huñunakuykunapi rimarisqanchikkunam yanapawasunchik allinta yachachinanchikpaq. Chaynaqa, allinta preparakuy confianzawan yachachinaykipaq.
5. ¿Ima yanapakuyraqtaq kachkan allin yachachiq kananchikpaq?
5 Punta cristianokunaqa allin yachachiq kanankupaqmi predicaqmasinkunamanta yacharqaku (Luc. 10:1). Paykuna hina, precursorkunata, ancianokunata, congregacionkuna watukuq wawqenchikkunata estudio qosqankuman compañay. Qawariy imaynatam rikchanachiykunata hinaspa qellqanchikkunapi yanapakuykunata servichikuspa Bibliamanta yachachisqankuta. Allin yachachiq kanaykipaq consejokunata mañakuy (Pro. 1:5; 27:17). Tukuy chay yachachikuykunata Diospa yachachisusqaykita hina qaway (2 Cor. 3:5).
6. ¿Imatataq puntataqa rurananchik Diospa Palabranmanta allin yachachiq kananchikpaq?
6 Jehová Diospi confiakuspa allinta yanapachikuy yachachikuyninkunawan. Allin yachachiq kanaykipaq Diosta mañakuy (Sal. 25:4, 5). Chayta ruraspaykim kusisqa kanki Bibliamanta allin yachachiq kanankupaq hukkunata yanapaspayki.