Imayna kutichinamanta
1. Predicasqanchikpi tapuwaptinchik, ¿imanasqataq ancha allin Jesusta qatipakuy?
1 Kunankamam runakunaqa hinalla admirakunku tapukuykunata Jesus imayna kutichisqanmanta. Payta qatipakuyqa ancha allinmi predicasqanchikpi tapukuykunata imayna kutichinapaq (1 Ped. 2:21).
2. Imarayku tapuwasqanchikta yachanapaq, ¿imatam rurachwan?
2 Puntataqa uyariy: Jesusqa yacharqam runakuna imarayku tapusqankuta. Chaymi ñoqanchikpas wakinpiqa sapaq tapukuykunata rurananchik imarayku tapuwasqanchikta yachanapaq. Sichu pipas tapuwachwan, ¿Jesuspi creenkichu? nispa, chaywanqa yaqapaschá yachayta munachkan Navidad fiestata imanasqa mana rurasqanchikmanta. Sichum yachasun runapa imam yachay munasqanta, hinaspaqa atisunmi yanapayta (Luc. 10:25-37).
3. ¿Maypitaq tarichwan Bibliamanta allin kutichikuykunata?
3 Diospa Palabranta servichikuy: Yaqa llapallanpim allinpuni Bibliawan tapukuykunata kutichiyqa (2 Tim. 3:16, 17; Heb. 4:12). Razonamiento librom yanapawachwan maskasqanchik textokunata tarinapaq. Predicasqanchik runa Bibliapi mana iñiptinpas, atichwanmi Bibliapa nisqanta sumaqllata qawachiyta. Piensarichiy Bibliapa consejonkuna ñawpaqmantaraq allinpuni kasqanta. Jesusta qatipakuptinchikqa tapukuykunata kutichisqanchikmi ‘qollqewan hapichisqa qorimanta manzana’ hina allinpuni kanqa (Pro. 25:11).
4. ¿Imaynanpitaq runakunapa tapuwasqanchikta mana kutichichwanchu?
4 ¿Imaynatapas kutichinachu? Tapukusqankuta mana yachaspaykiqa kaynata niy: “Manam yachanichu, ichaqa allinta yachaykuspaymi kutimuyman chaymanta rimananchikpaq”, nispa. Chayna nisqaykiwanqa yaqapaschá munanqa yapamanta watukunaykita. Ichaqa contrapi churakuq otaq atipanakuyllata munaq kaptinqa, Jesus hinayá ama hinallaqa parlaychu (Luc. 20:1-8). Chaynallataqmi pipas cheqapmanta yachayta mana munaspan atipanakuyllata munaptinqa, respetowan asurikuy hinaspa astawan kallpanchakuy yachay munaqkunata tarinaykipaq (Mat. 7:6).
5. ¿Imatam Jesusmanta yacharunchik?
5 Arí, Jesusqa Diospa kamachisqanta cumplinanpaqqa, yacharqam Jehová Diospi hapipakunanta chaynataq runakunapa sonqomanta tapukuyninkunata kutichinanpaqpas (Juan 18:37). Hinaptinqa, allin ejemplotamá Jesusqa qowarqanchik ‘wiñay kawsaypaq [...] kaqkunapa’ tapukuyninta imayna kutichinapaq (Hech. 13:48).