Imaynatam yanapachwan huk rimayniyoq runakunata
1. Predicasqanchik lawpi, ¿pikunatataq tarichwan?
1 Jesusmi willakurqaña kay allin noticia predicasqa kananmanta, chaynapi “llapallan nacionpi runakuna yachananpaq”. Kunan tiemponchikpim Diospa serviqninkuna allintapuni kasukuspanku willakuchkanku (Mat. 24:14; 28:19, 20). Wakinpim predicaspanchikqa tarinchik rimayninchikta mana rimaq huklawmanta kaq runakunata, paykunapas Diospa gobiernonmantam yachananku chaynapi Diospa piñakuynin manaraq chayamuchkaptin servinankupaq (Mal. 3:18). Hinaptinqa, ¿imaynatam paykunata yanapachwan predicasqanchik lawpi tarispa?
2. ¿Imaynatam Jehová Diosta qatipakusun huk rimayniyoq runakunata predicaspa?
2 Diospa qawasqanman hina qawasun: Predicaspanchik llapallan runakunata Jehová Dios kuyasqanta qawachinapaqqa, sonqomantapunim Diosmanta yachachiyta munananchik huk rimayniyoq runa kaptinpas (Sal. 83:18, NM; Hech. 10:34, 35). Arí, astawanmi interesakunchik congregacionninchikpi kaqkuna hina rimaq runakunapi, chayna kaptinpas huk rimayniyoq runakunatapas yanapananchikmi chaynapi paykunapas Diosmanta yachanankupaq. Llapallan runakunaman predicananchikpaq Jehová Diospa kamachiwasqanchiktaqa, manam kasukuchkachwanchu huk rimayniyoq runakunata mana predicaspaqa. Hinaptinqa, ¿imaynatam yanapachwan?
3. ¿Ima yanapakuymi kapuwanchik, hinaspa imaynatam predicanapaq servichikuchwan?
3 Servichikusun Buenas nuevas para gente de todas las naciones, folletota: Kay folletoqa rurasqam kachkan huk rimayniyoq runakunata predicanapaq. Sapa kuti apay, nisqankunamanta yachay hinaspa servichikunaykipaq preparakuy. Astawanraq yanapasunaykipaqmi folletopi marcata churawaq predicasqayki lawpi runakunapa rimasqanku idiomapi. Chay rimasqanku idiomapi qellqakuna kaptinqa, allinmi kanman folletota leeruptinku chay qellqakunata qoyninchikqa.
4. ¿Imaynatam servichikuna huk rimayniyoqkunata predicanapaq folletota?
4 Predicasqanchik runapa rimasqan idioma mayqan kasqanta mana yachaspaqa, folletopa sapa law qaranpa ukunpi kaq mapata qawachiy, hinaspañataq qawachiy mayqan nacionniyoq kasqaykita, qawachiytaq maymanta hinaspa ima rimayniyoq kasqanta yachay munasqaykita. Yacharuspaykiñataq 3 hinaspa 4 paginakunata qawariy, hinaspa chay rimasqan mayqan paginapi kasqanta tariruspayki, leeykachiy qallariypi yanachawan qellqasqa kaqta. Tukuruptinñataq rimasqan idiomapi tratadota qoykuwaq otaq leechiwaq oqewan marcasqa kaqta, chaypim nichkanki rimasqan idiomapi qellqata apanaykipaq. Chaymantañataq urachanpi yanachawan qellqasqa “sutiyta” niqta qawachispayki willay sutikita. Hinaspapas “sutiki” niqta qawachiy chaynapi sutinta willasunaykipaq. Allinta tiempochakuy kaqllamanta watukunaykipaq.
5. Huk rimayniyoq runakunata allintapuni atiendenapaq, ¿imatam rurananchik?
5 Yachay munaqkunata yanapasun: Kallpanchakuy Diosmanta yachay munaqkunaman yapamanta watukunaykipaq ima rimayniyoq kaptinpas. Cheqaptapuni Diosmanta hinaspa Bibliamanta yachayta munaptinqa, Sírvase visitar (S-43) niq papelpi qellqaspayki congregacionnikipi secretarioman chaylla qoykuy, paymi sucursalman apachinqa. Sucursalñataqmi chayna rimayniyoq congregacionman otaq grupoman apachinqa paykunaña chaylla atiendenankupaq. Allinpunim kanman secretario iñiqmasinchik copiata horqospan predicacionmanta encargakuq ancianoman qoyninqa, chaynapi hinalla yanapanankupaq. Ichaqa yuyariy, chay papeltaqa servichikuna cheqaptapuni yachayta munaptillanmi.
6. ¿Imatam rurananchik huk rimayniyoq runa Diosmanta yachayta munaptinqa?
6 Sírvase visitar (S-43) niq papelta apachisqanmantaqa achka punchawkunam pasanman, chaynapi huk rimayniyoq runata pipas yanapananpaq. Chaymi hinalla watukunanchik yachay munasqan mana chinkarunanpaq. Biblia estudiachiytapas qallaykuwaqmi. Chaymantapas, ¿imaynatam tarichwan rimasqan idiomapi qellqakunata?
7. Huk rimaypi qellqanchikkunata, ¿maypitaq tarichwan?
7 Huk rimaypi qellqanchikkunamanta: Congregacionkunapiqa manam huk rimaypi qellqakunaqa llumpayqa kananchu. Ichaqa predicacionmanta encargakuq ancianoqa, tanteanmanmi yachay munaq runakunapa rimasqanku idiomapi asllapas qellqakuna congregacionpi kananpaq. Mana kaptinqa congregacionmi mañakunman. Wakinpiqa manam chayllachu chayamun huk rimaypi qellqakunaqa, chaymi wakin iñiqmasinchikkunaqa Internet www.watchtower.org, nisqamanta yachachikuykunata papelpi horqonku, chaypim pipas achka rimaykunapi yachachikuykunata tarinman. Kayqa anchatamá yanapawasun huk rimayniyoq runakunata astawan yanapanapaq.
8. ¿Imatam congregacionpi kaqkuna rurananchik huk rimayniyoq runakunata yanapanapaq?
8 Congregacion ima rurananmanta: Wakinpiqa predicasqanchik lawpim huk rimayniyoq runakuna anchata yapakun, ichaqa manam kanchu paykunapa rimayninpi congregacionkuna. Chayna kaptinqa, yachay munaqkunatam huñunakusqanchik congregacionman hamunankupaq ninanchik. Sumaqta chaskisqanchik chaynataq paykunapi interesakusqanchikmi kallpanchanqa hinalla hamunankupaq. Qallariypiqa yaqapaschá huk rimayniyoq hinaspa huk costumbreyoq kasqankuwan sasachakusunchik, ichaqa Jehová Diospa llaqtanpiqa manam chayqa harkawananchikchu kuyananchikpaqqa (Sof. 3:9; Juan 13:35). ¿Yachankichu qam huk idioma rimayta? ¿Munawaqchu chayna rimayniyoq runakunaman watukuyta? Hinaptinqa, congregacionnikipi secretariomanyá willakuy, chaynapi sutikita sucursalman apachinanpaq. Chayqa allinpunim kanqa yachay munaq runata atiendenapaq.
9. ¿Haykapitaq apakunman huk rimayta yachanapaq escuela, hinaspa imaynata?
9 Huk rimayta yachanapaq: Huk rimayniyoq runakunata yanapaspaqa, allinmi kanman rimayninkupi huñunakuyman rinankupaq kallpanchayqa. Chay mana atikuptinqa, wakin iñiqmasinchikkunam paykunapa rimayninkuta yachanankupaq kallpanchakunku, chaynapi yanapanankupaq. Hichpallanpi congregacionkuna mana kaptinqa chaynataq chay rimayniyoq runakuna achka kaptinqa, sucursalqa tanteanmanmi iñiqmasinchikkuna chay runakunapa rimayninkuta yachanankupaq escuela apakunanpaq. Chayna kaptinqa sucursalmi willanqa chay lawpi congregacionkunaman huk rimayniyoq runakunata predicanapaq necesitakusqanmanta, willanqakutaqmi chay rimayta yachanankupaq clase kananmantapas. Chay rimayta yachay munaqkunaqa, kallpanchakunankum chay congregacionman otaq chay grupoman cambiakunankupaq, chaynapim allinta yanapakunqaku.
10. ¿Haykapitaq huk rimaypi grupo qallarinman, hinaspa imakunam chaypaq necesitakun?
10 Grupo imayna qallarinanmanta: Huk rimaypi grupota ruranapaqqa kaykunam necesitakun. 1) Huk rimayniyoq runakunam achka kananku, munanankutaqmi Diosmanta yachaytapas. 2) Kanantaqmi asllapas chay rimayta yachaq iñiqmasinchikkuna otaq chayllaraq yachaqkunapas. 3) Kanantaqmi huk anciano otaq siervo ministerialpas, chaynapi diriginanpaq hinaspa semanapi huk kutillatapas huñunakuyta rurananpaq. 4) Chaymantapas kanantaqmi chay grupota imapipas yanapanankupaq congregacionpi ancianokuna. Kaykuna yaqa llapallanpi cumplikuptinqa, congregacionpi ancianokunam sucursalman qellqaspanku willakunqaku, hinaspam mañakunqaku congregacionpi huk rimaypi grupo qallarinanpaq (qawariy Organizados libropa, 106 hinaspa 107 paginankunata). Chay grupota dirigiq ancianom “grupomanta encargakuq anciano” kanqa, siervo ministerial kaptinñataq “grupota dirigiq ancianopa yanapaqnin” kanqa, paykunam grupota anchata yanapanqaku.
11. ¿Imanasqataq predicasqanchik lawpi huk rimayniyoqkunata yanapayqa kusikunapaq llamkay?
11 Predicasqanchik lawpi huk rimayniyoq runakunata yanapayqa ancha allinmi chaynapi enteron pachapi predicanapaq Jesucristopa qallarichisqanta ruranapaq. Llapallanchikmi munanchik kusikuywan yanapakuyta, Jehová Diosmi runakunamanta allin sonqoyoq kaqkunata horqochkan (Hageo 2:7). ¡Anchatamá kusikunchik kay llamkaypi yanapakuspanchik! Jehová Diosyá bendecichun predicasqanchik lawpi huk rimayniyoq runakunata yanapasqanchikta. Ama qonqasunchu, huk rimayniyoq kasqankurayku sasachakuy kaptinpas, ¡Jehová Diosmi wiñachinqa! (1 Cor. 3:6-9.)