‘Achkiriychikyá’
1. ¿Ima regalom kachkan hukkunaman qonapaq?
1 Achikyamusqanmanta tutaykunankamam intipa achkisqanqa Jehová Diosta hatunchan. Ichaqa, Jesusmi discipulonkunata kallpancharqa ‘kawsay qokuq achkiyoq’ kanankupaq (Juan 8:12). Achkirinapaq hinam Diosmanta yachasqanchikqa sumaq regalo, chayraykum runamasinchikta yanapananchikpuni. Jesusmi nirqa: “Achkichkaq mechero hina kaychik runakunapa qayllanpi”, nispa (Mat. 5:16). Diosmanta mana yachaspanku tutayaypi kasqankuraykum, ¡ima tiemponmantapas kunanqa astawanraq achkirinanchik! ¿Imaynatam Cristo hina achkirichwan?
2. ¿Imaynatam Jesus qawachirqa Diosmanta yachachiyqa ancha chaninniyoq kasqanta?
2 Diosmanta willaspa. Jesusmi tiemponta, kallpanta, kapuqninkunata servichikurqa runakunaman Diosmanta willananpaq: wasinkupi, plazakunapi otaq maypi kaptinkupas. Payqa yacharqam Diosmanta yachachiyqa hukkunata wiñaypaq yanapasqanta (Juan 12:46). Chaymi qatiqninkunata prepararqa ‘runakunapaq achkiy hina kaspa’ astawan yanapanankupaq (Mat. 5:14). Paykunam achkiy hina karqaku runamasinkupaq allinta ruraspa chaynataq Diosmanta yachachispankupas.
3. ¿Imaynatam chaninchanchik achkirichkaq hina kasqanchikta?
3 Diospa llaqtanpi kaqkunaqa anchatam chaninchanku achkirichkaq hina kasqankuta, chaymi Diosmanta willakunku maypipas runakunapa kasqanpi (Efe. 5:8). Llamkaypi otaq escuelapi samarisqanchik tiempopi, Bibliata otaq huk qellqanchikkunatapas leeyninchikmi yanapawachwan pitapas Bibliamanta yachachinapaq. Chaynatam sipas iñiqmasinchik estudiota qallarirqa hinaspa 12 estudiaqmasinkunaman librokunata qorqa.
4. ¿Imaynatam achkirichwan portakuyninchikwan?
4 Allinkunata ruraspa. Chaymantapas achkichkaq hina kananchikpaqqa allintam portakunanchik (Efe. 5:9). Allin portakusqanchikqa sutillam kanqa chaymi yanapawasun Diosmanta yachachinapaq: llamkaypi, escuelapi otaq maypiña kaptinchikpas (1 Pe. 2:12). Pichqa watayoq warmapa allin portakusqanraykum profesoran tayta-mamanta qayachirqa. Paymi nirqa: “¡Manam haykapipas portakuyninpi allin tanteoyoq warmaykita hinaqa reqsirqanichu!”, nispa. Chaynamá, Diosmanta willasqanchikwan allin portakusqanchikmi runakunata kallpanchan ‘kawsay qokuq achkiyman’ hamunankupaq hinaspa Diosta hatunchanankupaqpas.