¿Imakunatam runakunaqa ninku Diosta mañakuymanta?
Mariam nin: “Diosta mañakuspayqa hawkam tarikuni. Dios waqtallaypi kachkanmanpas hina hinaspa makiymanta pusawachkanmanpas hinam rikchakapuwan”, nispa.
Raulpas ninmi: “Warmichaymi chunka kimsayuq wata cancer unquywan ñakarillarqa. Chaymantam wañukullarqa. Chayna sasachakuypi tarikuspaymi sapa punchaw Diosta mañakullarqani, hinaptinmi payqa hawkayayta quykullawarqa”, nispa.
Arne sutiyuq runapas ninmi: “Diosta mañakuyqa suma-sumaqmi”, nispa.
Mariapaq, Raulpaq, Arne sutiyuq runapaq hinaspa huk runakunapaqpas Diosta mañakuyqa ancha chaninniyuqmi. Paykunaqa Diosta mañakuspankuqa manam iskayrayankuchu paypa yanapakuyninta chaskinankumantaqa. Paykunaqa bibliapa kayna nisqanmantam mana iskayrayankuchu. Bibliam nin: “Ñuqanchikqa manam iskayrayanchikchu munasqanman hina mañakuptinchik Dios uyariwasqanchikmantaqa” nispa (1 Juan 5:14).
Ichaqa achka runakunam bibliapa chayna nisqanmanta iskayrayanku. Estip sutiyuq runam nin: “Chunka qanchisniyuq wataypi kachkaptiymi kimsa kuyasqay amistadniykuna wañururqaku. Hukninmi wañururqa carro chocaruptin, iskayñataq lamar quchapa ukunpi”, nispa. ¿Imatataq Estipqa ruwarqa? Paymi nin: “Diostam mañakullarqani, tapurqanim imanasqa tukuy chaykuna pasawasqanmanta, ichaqa payqa sunqullaytaqa manam tiyaykachirqachu. Chaymi nikurqani: ‘Diosta mañakuyqa yanqapaqmi’” nispa. Estip hinam achka runakunapas ninku.
Wakin runakunañataqmi ninku Diosta mañakuyqa llumpayña kasqanmanta. Chaynataqa ninku pay tukuy ima pasawasqanchikta yachasqanmanta nispankum.
Huk runakunañataqmi ninku ñawpaqta mana allinkunata ruwasqanchikrayku Dios mana uyariwasqanchikmanta. Yeni sutiyuq warmim nin: “Mana kaqpaqpas hinam hapikuni ñawpaqpi mana allinkunata ruwasqayrayku, chayraykum nini Diospas mañakusqaytaqa mana uyariwananmanta”, nispa.
Qamqa, ¿ima niwaqtaq? ¿Iskayrayankichu Dios mañakusqaykita uyarinanmanta? Chayna kaptinqa bibliapa nisqanmi yanapasunki. Bibliapim Diosta mañakuymanta achka yachachikuykuna kan.a Bibliaqa yanapawasuntaqmi qatiqnin tapukuykunamanta sumaqta yachananchikpaq:
¿Diosqa uyarinchu mañakusqanchikta?
¿Imanasqataq wakinpiqa mañakusqanchikman hina Diosqa mana yanapawanchikchu?
¿Imaynatam Diosta mañakunanchik uyariwananchikpaq?
¿Imaynatam Diosta mañakuyqa yanapawanchik?
a Bibliapim tarinchik Dios yupaychaqkunapa mañakusqankuta, Jesuspa mañakusqanpas bibliapim kachkan. Genesismanta Malaquiaskamam tarinchik 150 masnin mañakuykunata.