Kuyakuq kasqanchikraykuyá hinalla willakusun

1. ¿Imamantam willawarqanchik 2023 watapi hatun huñunakuypi?

¡MAYNA sumaqmi karqa 2023 watapi sapa watapaq hatun huñunakuyninchikqa!a Chaypim uyarirqanchik bibliapa wakin yachachikuyninkunata manaña ñawpaqta hina entiendenapaq. Willawarqanchikmi: “Pantay religionkuna chinkachisqa kasqan qipataqa ichapas wakin runakunaqa ñuqanchikwan kuska Jehova Diostaña serviyta munanqaku”, nispa. Chaymantapas willawarqanchikmi 2023 watapa noviembre killanmantapacha informenchikpipas manaña ñawpaqta hina churanamanta. ¿Chayraykuchu piensachwan Diosmanta willakuyninchikqa manaña ancha allin kasqanta utaq manaña urgente kasqanta? ¡Manamá!

2. ¿Imanasqataq kunanqa astawan tiempochakunanchik Diosmanta willakunapaq? (Rimarimuytaq Marcos 13:10 nisqanmantapas).

² Kunanqa astawanraqmi tiempochakunanchik Diosmanta willakunapaq. ¿Imanasqa? Tiempom tukuchkanña. Jesusmi nirqa kay tukupay tiempokunapi Diosmanta willakuyninchik imayna kananmanta. Chayta yuyarinapaq leeykusun Marcos 13:10 nisqanta. Mateopas nirqam manaraq ‘tukuy mana allinkunapa tukupaynin’ chayamuchkaptin Diosmanta sumaq willakuy enteron pachapi willakusqa kananmanta (Mat. 24:14). Tukuy mana allin tukunanmanta Jesus rimaspanqa nichkarqa satanaspa munaychakusqan tiempo qalaypaq tukunanmantam. Diosqa ñamá tantiarunña “imay punchaw” chaynataq “imay hora” imapas tantiasqanta ruwananpaq (Mat. 24:36; 25:13; Hech. 1:7). Chay punchawqa aswan hichpallapiñam kachkan (Rom. 13:11). Chaykamaqa hinallam willakunanchik.

3. ¿Imanasqam Diosmanta willakunchik?

³ Chaynaqa, ¿imanasqam Diosmanta willakunchik? Diospa palabranta kuyasqanchikraykum, runamasinchikkunata kuyasqanchikraykum chaynataq Jehova Diosta hinaspa sutinta kuyasqanchikraykum. Chaymantayá sapakamamanta yachaykusun.

DIOSMANTAQA WILLAKUNCHIK DIOSPA PALABRANTA KUYASQANCHIKRAYKUM

4. ¿Imaynam tarikunchik hinaspa imatam ruwanchik sumaq willakuykunata uyariruspa?

⁴ ¿Imaynataq tarikurqanki hukkaqnin aylluykipa wawachan nacerusqanmanta pipas willaykusuptiki utaq unayña llamkayta maskachkaptiki pipas paywan llamkanaykipaq niykusuptiki? Ancha kusisqachá, hinaspachá familiaykikunaman chaynataq amistadnikikunaman willakuyta munarqanki. ¡Chayna kusisqachá tarikurqanki Diospa gobiernonmanta sumaq willakuyta chayllaraq uyariruspaykipas! Hinaspachá llapallankuman willayta munarqanki. Chay noticiaqa imamantapas aswan sumaqmi.

5. ¿Imaynam tarikurqanki Diosmanta sumaq willakuykunata yachaspayki? (Qawaytaq fotokunatapas).

⁵ Yuyariy testigokuna bibliamanta yachachisuptiki imayna tarikusqaykipi. Yacharurqankim Diosqa anchata kuyasusqaykimanta, yupaychaqninkunawan kuska kanaykita munasqanmanta, nanayninchikkunatawan ñakariyninchikkunata tukuchinanmanta hinaspa kuyasqa ayllunchikkunata kawsarichinanmanta (Mar. 10:​29, 30; Juan 5:​28, 29; Rom. 8:​38, 39; Apoc. 21:​3, 4). Chay sumaq yachachikuykunaqa sunquykimanchá chayarurqa (Luc. 24:32). Chaychá kusisqa tarikusqaykirayku lliw runakunaman willayta munarqanki (tupachiy Jeremias 20:9 nisqanwan).

6. ¿Imatam yachachisunki Ernestopawan señoranpa ruwasqanku?

⁶ Rimaykusunchik Ernestomanta.b 10 watachayuq kachkaptinsi papan wañukusqa. Paymi nin: “Nikuqmi kani: ‘¿Hanaq pachapichu kachkanman icha wiñaypaqchu wañukun?’, nispa. Taytayuq warmachakunata qawaspaymi niq kani: ‘Maypiraq ñuqapa papayqa’”, nispa. Payqa yaqa sapa punchaw panteonta rispansi pampakusqanpa ñawpaqninpi qunqurakuykuspan Diosta mañakullaq: “Dioslláy, willaykullaway, ¿maypitaq papallay kachkan?”, nispa. 27 watanpi kachkaptin testigokuna bibliamanta yachachinankupaq niptinsi chaylla “allinmi” nisqa. Hinaspansi yacharusqa wañusqakunaqa puñuchkaq hina kaspanku mana imatapas sientesqankuta chaynataq kawsarichisqa kanankumanta (Ecl. 9:​5, 10; Hech. 24:15). Chaykunamanta yacharuspansi anchata kusikusqa, unayñas chaymanta yachaytaqa munallasqa. Señoranpas paywan kuskas biblia estudiayta qallaykusqa. Paypas ancha kusisqas tarikusqa bibliamanta tukuy ima yachasqanwan. Chaysi iskayninku 1978 watapi bautizakusqaku. Tukuy ima yachasqankuwan ancha kusisqa tarikusqankuraykus familiankumanpas, amistadninkumanpas hinaspa haykam uyariy munaq runakunamanpas yachasqankuta willakusqaku. Chaysi 70 masnin runakunata yanapasqaku bautizakunankupaq.

7. Bibliapa yachachikuyninkunata sunqumanta kuyaspaqa, ¿imatam ruwasun? (Rimarimuytaq Lucas 6:45 nisqanmantapas).

⁷ Bibliapa yachachikuyninkunata sunqumanta kuyaspaqa lliw runakunawanmi chaymanta rimayta munasun (leey Lucas 6:45). Ñuqanchikpas Jesuspa qatiqninkuna hinam ninchik: “Manam upallaymankuchu rikusqaykumantawan uyarisqaykumanta willakuytaqa”, nispa (Hech. 4:20). Diosmanta imam kaqta yachasqanchikta anchata kuyasqanchikraykum lliw runamasinchikkunaman willayta munanchik.

DIOSMANTAQA WILLAKUNCHIK RUNAMASINCHIKTA KUYASQANCHIKRAYKUM

8. ¿Imanasqam lliw runakunaman Diosmanta willayta munanchik? (Qaway “Kuyakuqyá kasun runakunaman yachachinapaq” niqta, qawaytaq fototapas).

⁸ Ñuqanchikpas Diosninchik hinaspa Jesus hinam lliw runakunata kuyanchik (Prov. 8:31; Juan 3:16). Llakikunchikmi ‘Jehova Diosta mana riqsisqankurayku’ problemallapiña kasqankuta qawaspa (Efes. 2:12). Paykunaqa tukuy ima sasachakuyniyuq kasqankuraykum ukullay-uku uchkupi hina tarikunku. Chaymi chay uchkumanta lluqsinankupaq waskawan chutachkaq hina Diospa gobiernonmanta willananchik. Kuyakuq hinaspa llakipayakuq kasqanchikraykumá runamasinchikkunamanqa Diosmanta willayta munanchik. Yachanchikmi Diosmanta yachaspankuqa kunan tiempopas kusisqa kawsakunankumanta, hamuq tiempopiñataq wiñaypaq (1 Tim. 6:19).

9. ¿Imakuna pasakunanmantam runakunaman willanchik? ¿Imanasqa? (Rimarimuytaq Ezequiel 33:​7, 8 nisqanmantapas).

⁹ Runakunata kuyasqanchikraykutaqmi willayta munanchik mana allinkunata Diosninchik chinkachinanmantaña (leey Ezequiel 33:​7, 8). Chaymanta mana yachasqankuraykum mana testigo kaq familianchikpas hinaspa runamasinchikkunapas hawka kakuchkanku. Chayna kasqankuta qawaspam llakikunchik. Mateo 24:21 nisqanpim niwanchik: “Llumpa-llumpay ñakariy punchawkunam kanqa”, nispa. Niwanchikraqmi: “Manam chaynaqa karqachu runakunapa qallariyninmantapacha kunankamapas, manataqmi huktawanqa kanqachu”, nispa. Chay punchawkunapi imakuna pasakunanmanta lliw runakuna yachanankutam munanchik. Puntatam pantay religionkuna chinkachisqa kanqa, chaymantam Armagedon punchaw chayamunqa. Hinaptinmi tukuy mana allinkuna tukunqa (Apoc. 16:​14, 16; 17:​16, 17; 19:​11, 19, 20). Diostamá mañakunchik paymanta willakusqanchikta runakuna uyarispa ñuqanchikwan kuska payta servinankupaq. Ichaqa, ¿imam pasanqa willakusqanchikta mana uyariq runakunawanqa? Paykunamanta wakinqa familianchikmi kanku.

10. ¿Imanasqataq runamasinchikkunaman hinalla willananchik qipakunata ima kananmanta?

¹⁰ Pasaq yachachikuypim yacharqanchik pantay religionkuna chinkachisqa kasqan qipallata imakuna pasakunanmanta. Yaqapaschá chayta qawaspa wakin runakunaqa Jehova Dios serviyta munanqaku, ichapas paykunatapas Diosqa salvanqa. Chaymi hinalla willakunanchik qipakunata ima kananmanta. Chay willasqanchiktachá runamasinchikkunaqa chay tiempopi yuyarinqaku (tupachiy Ezequiel 33:33 nisqanwan). Ichapas chayta yuyarispa chayraq munanqaku ñuqanchikwan kuska Dios serviyta. Filipos llaqtapi carcel cuidaq runapas terremoto karuptinñam chayraq Dios serviyta munarqa. Chaynachá qipakunatapas wakin runamasinchikkunaqa chayraq Dios serviyta munanqaku pantay religionkuna chinkachisqa kasqanta qawaspanku (Hech. 16:​25-34).

DIOSMANTAQA WILLAKUNCHIK PAYTA HINASPA SUTINTA KUYASQANCHIKRAYKUM

11. ¿Imaynatam Diosta hatunchanchik? (Rimarimuytaq Apocalipsis 4:11 nisqanmantapas, qawaytaq fotokunatapas).

¹¹ Diospa gobiernonmantaqa astawan willakunchik Jehova Diosta hinaspa sutinta kuyasqanchikraykum. Chaymantapas, Diosmantaqa willakunchik payta hatunchayta munaspam. Manamá iskayrayanchikchu Jehova Dioslla “llapallanpa hatunchanan hinaspa yupaychanan” kasqanmantaqa (leey Apocalipsis 4:11). ¿Imaynatam Diosta hatunchanchik hinaspa yupaychanchik? Paylla tukuy imata unanchasqanmanta hinaspa vidata quwasqanchikmanta runakunaman willaspam. Chaymantapas paymanta willakunapaqmi servichikunchik kallpanchikta, tiemponchikta hinaspa imapas kapuwasqanchikta (Mat. 6:33; Luc. 13:24; Col. 3:23). ¡Anchatamá munanchik kuyasqanchik Diosninchikmanta willakuytaqa! Munanchiktaqmi sutin ima ninan kasqanmanta willakuytapas. ¿Imanasqa?

12. ¿Imakunamanta runakunaman willaspam Diospa sutinta chuyanchachkanchik?

¹² Jehova Diosta kuyasqanchikraykum sutin chuyanchayta munanchik (Mat. 6:9). Satanasmiki Diosmanta llullakunata rikurirachin (Gen. 3:​1-5; Job 2:4; Juan 8:44). Chaymi Diosmanta willakuspaqa pipas uyariyta munaptinqa imam kaqta willayta munanchik. Munanchikmá Diosninchikqa kuyakuqllaña kasqanta, allin kamachiq kasqanta chaynataq payña kamachiwaptinchikqa kusisqaña kawsakunamanta lliw runakuna yachanankuta. Diosqariki tukuy ñakariyninchiktam chinkachinqa (Sal. 37:​10, 11, 29; 1 Juan 4:8). Tukuy chaykunata runakunaman willaspam Diospa sutinta chuyanchachkanchik. Chaymantapas, chayta ruwaspaqa Jehova Diospa testigon kananchikpaq prometekusqanchikta cumplisqanchikraykum kusisqa tarikunchik. ¿Imanasqam chayta ninchik?

13. ¿Imanasqam kusisqa tarikunchik Jehova Diospa testigonwan sutichakusqanchikmanta? (Rimarimuytaq Isaias 43:​10-12 nisqanmantapas).

¹³ Jehova Diosmi akllaykuwanchik paypa testigon kananchikpaq (leey Isaias 43:​10-12). Diospa llaqtanpi punta apaqkunam kaynata qillqamuwarqanchik: “Ancha kusisqam tarikunchik Jehova Diospa testigonwan sutichakusqanchikmanta”, nispa.c Kaypi piensarisun: Pipas yanqamanta tumpaykuwasqanchikrayku quejapi kachkachwan. Chaypaqqa necesitachwan pi testigopas favorninchikpi rimanantam. Chaymi akllachwan riqsisqanchikta, confianza kaqta chaynataq allin respetasqa runata. Chaynapi autoridadkuna paypa nisqanta creenankupaq. Chaynam Diospas favorninpi rimananchikpaq testigonkuna kanapaq akllaykuwanchik allinta riqsiwasqanchikrayku hinaspa ñuqanchikpi confiasqanrayku, chaynapi paylla chiqap Dios kasqanmanta willakunapaq. Chaywan kusisqa tarikusqanchikraykum maypi kaspapas Diosmantaqa willakunchik. Paymanta llullakunata rimaptinkupas “manam chaynachu” nispam pimanñapas imam kaqta yachachinchik. Chaynata ruwaspam testigonkuna kananchikpaq prometekusqanchikta allinta cumplichkanchik (Sal. 83:18; Rom. 10:​13-15).

¿HAYKAPIKAMATAQ DIOSMANTA WILLAKUSUN?

14. ¿Imanasqam qipa punchawkunamanta kusikunchik?

¹⁴ ¡Anchatam kusikunchik qipakunata imakuna pasakunanmanta yachasqanchikwanqa! Munachkanchikmi manaraq llumpa-llumpay ñakariy punchawkuna qallaykuchkaptin achka runakunaraq Jehova Diosta servinankuta. Chaymantapas, yaqachusmi wakin runakunaqa punta vidankuta saqispanku ñuqanchikwan kuska Jehova Diosta yupaychanqaku llumpa-llumpay ñakariy punchawkunapas. Chayta qawaspaqa anchatachá kusikusun (Hech. 13:48).

15, 16. ¿Imata ruwanapaqmi hinalla tiempochakunanchik hinaspa haykapikama?

¹⁵ Chayraykuyá Diospa gobiernonmanta sumaq willakuykunata hinalla willakusun, Diosña gobiernawaptinchikqa manañam chaymantaqa willakusunchu. Runamasinchikkunamanqa willananchiktaqmi mana allin ruwaqkuna chinkachisqa kanankumantapas. Llumpa-llumpay ñakariy punchawkuna qallaykuptinmi runakunaqa cuentata qukunqaku willakusqanchikqa Jehova Diosmanta hamusqanta (Ezeq. 38:23).

¹⁶ Chaynaqa, Diosmanta kusisqa willakunapaqyá hinalla tiempochakusun “kaykamallaña” niwananchikkama. Chaytaqa ruwasun Diospa palabranmanta sumaq willakuykunata, runamasinchikkunata chaynataq Jehova Diostawan sutinta kuyasqanchikraykum.