‘Manam llapallankuchu Diospi iñinku’

Jehova Diosta kusichinapaqqa iñiyniyuqmi kananchik. Bibliapim ichaqa apostol Pablo nirqa ‘mana llapallanku iñiyniyuq kasqankuta’ (2 Tes. 3:2). Chaynata nisqanwanmi Pabloqa astawan rimachkarqa chiqniqninkunamanta utaq ‘mana allinninta munaqkunamanta hinaspa mana allin runakunamanta’. Chayna runakunamantam librasqa kanan karqa. Kunanpas mana iñiyniyuq achka runakunatam qawachkanchik. Wakinkum Dios kasqanta mana creenkuchu tukuy ima unanchasqankunata qawachkaspankupas (Rom. 1:20). Wakinkuñataqmi creenku runamantaqa pipas aswan atiyniyuq kasqanta. Ichaqa manamá chayqa Diospa munasqanman hina iñiychu.

Diosta kusichinapaqqa manam iskayrayananchikchu pay kasqanmanta hinaspa paypi iñiqkunata bendecinanmanta (Heb. 11:6). Diospa atiynin yanapawaptinchiktaqmi iñiyniyuqqa kanchik. Diospa atiynin yanapawananchikpaqqa Diostam mañakunanchik (Luc. 11:​9, 10, 13). Chaymantapas, atiyninwan ruwachisqan palabran bibliatam leenanchik, leesqanchikpim yuyaymanananchik, hinaspapas chayman hina kawsakunapaqmi kallpanchakunanchik. Chaynaqa, Diospa atiyninmi yanapawasun paypa munasqanman hina iñiyniyuq kanapaqqa.