¿Imatam ruwachwan sapa semana sapallanchikpi bibliata estudianapaq?
¿SAPA semanachu sapallaykipi bibliata estudianki? ¿Icha sasachu chaypaq tiempota hurquyniki? Yaqa llapallanchiktam chayna pasawanchik. Kaypi piensarisun: Bañakunapaq tiempochakuyninchikqa ancha allinmi. Bañakuruspaqa sampa hinaraqmi tarikunchik. Chaynam bibliata estudiaypas allin kanapaq yanapawanchik (Efes. 5:26). ¿Imakunatam chaypaq ruwachwan?
Sapa semana haykapi estudianapaq tantiasun. Sapallanchikpi estudiay aswan allin kasqanraykum chaytaqa mana qunqananchikchu (Filip. 1:10). Mana qunqarunapaqmi laqaruchwan refrigeradoranchikmanpas utaq punkunchikmanpas. Utaqmi celularninchikpi alarmata churaruchwan manaraq chay hora chayamuchkaptin yuyachiwananchikpaq.
Imayna estudiananchikpi piensasun. Wakinkum achkata estudiaspanku allinta entiendenku, wakinkuñataqmi asllata estudiaspanku. Sapakamam riqsikunchik hayka unayta estudiay atisqanchikta. Chayman hinayá tantiasun sapa semana imata estudianapaq. Estudiananchik hora chayaramuptin mana ganasniyuq kaspaqa, ¿manachu 10 minutollapas estudianapaq kallpanchakuchwan? Mana estudiananchikmantaqa ratullapas estudiayninchikmi aswan allinqa. Ichapas estudiayta qallaykuspanchikqa hinalla estudiayta munasun (Filip. 2:13).
Imamanta estudiananchikmantam tantiananchikña. Tantiasqanchik hora chayaramuptin imamanta estudianapaq chayraq piensaspanchikqa ‘tiemponchiktam usuchichkachwan’ (Efes. 5:16). Listapim churaruchwan imakunamanta yachay munasqanchikkunamanta. Imapas tapukuyninchik kaptinqa anotaykusun. Estudiachkaspanchikña imamanta astawan yachayta munaspapas anotaykusuntaq.
Mana atispaqa huk punchawmi estudiachwan. Ichapas chaypaqqa cambiananchik kanqa imay hora, hayka tiempo hinaspa imamanta yachananchikta. Chaywanpas, sapa semana estudianapaqmi kallpanchakunanchik.
Sapa semana sapanchikpi estudiaspanchikqa Jehova Dioswanmi astawan kuyachikusun, imapaqpas allintam tantiasun hinaspapas imatapas ruwanapaqmi kallpanchasqa tarikusun (Jos. 1:8).