Guerra pasaqkunapas hawka kawsakuytaqa atinmankum
Qallariyllapi rimamusqanchik Garyqa soldadom karqa. Paymi nin: “Testigokunawan bibliata manaraq estudiaspayqa manam entienderqanichu imanasqa sasachakuyllaña, mana allin ruwayllaña, wañuchinakuyllaña kay allpa pachapi kasqanta. Kunanqa bibliamanta yachasqaywanmi hawkaña tarikuni, segurotaqmi kachkani hamuq tiempopi hawka kawsakunapaq niwasqanchikta Dios cumplinanmantapas”, nispa.
Achka runamasinchikkunapas bibliamanta yacharuspankum Gary hina hawkaña tarikunku. Paykunamantayá yachaykusun.
BIBLIAPIM NIN: “Jehova Dioslláy, qamqa allin Diosmi kanki. Qamqa pampachakuykuqmi kanki”, nispa (Salmos 86:5).
IMAYNATA YANAPASQANMANTA: Colombia nacionmanta Wilmarmi nin: “Chay textowanmi yachani Jehova Diosqa llakipayakuq kasqanta, chaywanmi sunquy tiyaykun. Soldado kaspay tukuy mana allinkuna ruwasqaymantam Diosqa pampachaykullawan”, nispa.
BIBLIAPIM NIN: Diosmi niwanchik: “Ñuqaqa musuq cielotawan musuq allpa pachatam unanchasaq, ñawpaq kaqkunaqa qunqasqañam kanqa, manañam sunquykichiktaqa llakichinqañachu”, nispa (Isaias 65:17).
IMAYNATA YANAPASQANMANTA: Estados Unidos nacionmanta Zafiram nin: “Soldado kaspay tukuy mana allinkuna rikusqaywanmi mana allinñachu tarikuni. Tutankunam muspakuni, chay rikusqaykunata yuyariruspaymi llakisqallaña kani. Ichaqa chay textowanmi Jehova Dios yuyarichiwan manapas unaymanta payña kay allpa pachata gobiernaptinqa chay rikusqaykunata qalaypaq qunqanaymanta. Chayta yachasqayqa sunquytam tiyaykachin”, nispa.
BIBLIAPIM NIN: “Pay kamachiptinqa allin ruwaqkunam waytarinqa. Hawka kawsakuymi kanqa killapas chinkanankama”, nispa (Salmos 72:7).
IMAYNATA YANAPASQANMANTA: Ucrania nacionmanta Olexandram nin: “Chay textopa nisqantam sapa kuti yuyarillani. Manapas unaymanta Diosninchikña kay allpa pachata gobiernaptinqa manañam kanqachu ñakarichiwaqninchik guerraqa. Manañam llakikusunchu familianchikta imapas pasarunanmantaqa”, nispa.
BIBLIAPIM NIN: “Wañukuqkunaqa kawsarimunqakum […]. ¡Allpapa sunqunpi kaqkuna, rikcharispaykichikyá kusikuymanta qapariychik!”, nispa (Isaias 26:19).
IMAYNATA YANAPASQANMANTA: Ruanda nacionmanta Mariem nin: “Ñawpaqtam tutsis kasta llaqtamasiykunata huk kasta runakuna chiqnispanku yaqa llapallankuta wañurachirqaku. Chaypim familiaypas yaqa lliw wañururqa. Ichaqa chay textowanmi yachani hamuq tiempopi familiay kawsarimuptin kaqmanta tupaykunaymanta. Munachkaniñamá paykunawan kusisqallaña parlariyta”, nispa.
BIBLIAPIM NIN: “Ñam chayaykamuchkanña mana allin ruwaqkunapa chinkachisqa kayninkuqa […]. Llampu sunquyuqkunam ichaqa kay allpa pachapi yachanqaku. Paykunaqa kusikuywanmi hawkayaypi kawsakunqaku”, nispa (Salmos 37:10, 11).
IMAYNATA YANAPASQANMANTA: Tayikistan nacionmanta Dalermi nin: “Kay nacionniypi guerra tukuruptinpas wakin llaqtamasiyqa hinallam yanqamanta ñakarichisqa kachkanku, mana allin runakunapas hinallam kachkan. Ichaqa chay texto yachasqaymi sunquyta tiyaykachin. Jehova Diosqa yachanmi imakuna pasawasqanta hinaspa imayna tarikusqayta. Diosninchikqa prometewanchikmi imapas ñakarichiwaqninchikkunata manapas unaymanta chinkachinanmanta, hinaptinmi chaykunataqa manaña yuyasunchu”, nispa.
Kaypi willakuq runakunaqa Jehova Diospa testigonkunam kanku, paykuna hinam waranqantin testigokunapas bibliamanta yachasqankurayku hawkaña tarikunku. Manaraq Diosta riqsichkaspankuqa wakinqa runamasintam imamantapas chiqniqku. Wakinqa chiqniqku huk llaqtamanta kasqankuraykum, huk nacionmanta kasqankuraykum utaq huk kastamanta kasqankuraykum. Bibliamanta yacharuspankum ichaqa manaña chaynañachu kanku (Efesios 4:31, 32). Jehova Diospa testigonkunaqa manam ima partidomanpas sayanikuchu, manataqmi puripakunikuchu runakunapa peleay hatarichisqankupiqa (Juan 18:36).
Jehova Diospa testigonkunaqa familiantin hinam llapayku yanapanakuniku (Juan 13:35). Chayna kasqantam nin qallariyllanpi rimamusqanchik Olexandra. Nacionninpi guerra kasqanraykum payqa ñañanpiwan kuska huklaw nacionman ayqikullarqaku. Olexandram willakun: “Huklaw nacionman chayaruptiykum chay nacionpi kaq Jehova Diospa testigonkuna suyawachkasqaku, rikuykuwaspankum anchata kusikurqaku. Iñiqmasiyku yanapaykuwaptinkum kay kasqayku nacionpi chaylla costumbrarurqaniku”, nispa.
Munaymankum Jehova Diospa testigokunapa huñunakuyniykuman hamunaykita. Chaypim yachasun kay tiempopi guerrakuna kaptinpas imaynata hawkalla kawsakunapaq bibliapi rimasqanmanta. Yachasuntaqmi hamuq tiempopi hawkaña kawsakunamanta bibliapi rimasqanmantapas. Maypi huñunakusqaykuta yachanaykipaqqa internetpi jw.org nisqanman yaykuy hinaspa maskay yachasqayki lawpi maypi huñunakusqaykuta. Utaq bibliamanta yachachinaykupaq qillqaykamuwayku, mana qullqillapaqmi yachachisqaykiku. Kusisqa kawsakunapaq sutiyuq librowanmi hukkaqnin testigo yachachisunki.