‘Diosman asuykuyqa allinpunim’

1, 2. (1) ¿Imatam ruwananchik piwanpas allin amistad kananchikpaq? (2) ¿Imamantam kay yachachikuypi yachasun?

PIENSARIY allin amistadnikipi, ¿imatam ruwarqanki allin amistad kanaykipaq? Segurochá paywan kuska kanaykipaq tiempochakuspa imayna kawsakusqanta, imakuna gustasqanta hinaspa imakuna mana gustasqanta yacharqanki. Chaymantapas sumaq sunquyuq kasqanmanta cuentata qukuspaykichá pay hina kayta munarqanki, hinaspachá tiempopa risqanman hina astawan kuyarqanki.

² Piwanpas allin amistad kanapaqqa paywan kuska kanapaqmi tiempochakunanchik hinaspa tukuyta ruwananchik. Chaynatataqmi ruwananchik Jehova Dioswan allin amistad kanapaqpas. Chaymi kay yachachikuypi yachasun Diosman astawan asuykunapaq imata ruwanamanta, payqa pimantapas aswan allin amistadninchikmi. Puntatayá yachaykusun payman asuykuyninchik imanasqa allinpuni kasqanmanta.

3. Rikchanachiywan willarimuy Diosman asuykuyninchikpi yuyaymanay imanasqa ancha allin kasqanmanta.

³ Imakunarayku Jehova Diosman asuykuyninchik allinpuni kasqanpim yuyaymanananchik (Sal. 63:​6-8). Chayta allinta entiendenapaqyá kaywan tupachisun: Yaqa llapallan runakunam yachanku allin kaqkunata mikuyqa, achka yakuta tomayqa, ejerciciota ruwayqa hinaspa allinta samayqa allinpuni kasqanta. Chaywanpas achka runakunam mana kasukusqankurayku unqunku. ¿Imataq pitapas yanapanman saludninpaq allin kaqkunata ruwananpaq? Chaykunata ruwaynin imanasqa allin kasqanpi sapa kuti yuyaymanayninmi. Yaqa chaynataqmi llapallanchik yachanchik Diosman asuykuyninchikpas allinpuni kasqanta. Ichaqa asuykuyninchik imanasqa allinninchikpaq kasqanpi yuyaymanaymi kallpanchawasun astawan payman asuykunapaq (Sal. 119:​27-30).

4. ¿Imatam nirqa Salmos 73:28 nisqanta qillqaq?

⁴ (Leey Salmos 73:28). Salmos 73 capitulota qillqaqqa karqa Leviy ayllumantam hinaspa templopi musicata tocaqmi. Yaqachusmi payqa unay wataña Diosman sunqu karqa. Ichaqa cuentatam qukururqa Diosman asuykuy allinpuni kasqanpi yuyaymanaynin anchata yanapasqanta. Payqa munarqam Dioswan amistad kayqa allinpuni kasqanmanta hukkunapas yachanankuta. Qawaykusunyá ñuqanchikpaqpas imanasqa ancha allin kasqanmanta.

DIOSMAN ASUYKUYQA ANCHATAM KUSICHIWANCHIK

5. (1) ¿Imanasqataq nichwan Diosman asuykuspaqa kusisqa kawsakunanchikta? (2) ¿Imakunapim yanapawanchik consejonkuna? (Rimarimuytaq Proverbios 2:​6-16 nisqanmantapas).

⁵ Jehova Diosman astawan asuykuspaqa kusisqam kawsakusun (Sal. 65:4). Bibliapi tarisqanchik consejonkunata kasukuptinchikqa vidanchikpi imapas ruwasqanchikqa allinmi kanqa. Diosqa yachayniyuq kasqanraykum chay consejokunata quwanchik mana allin runakunamanta harkawananchikpaq hinaspa hatun huchaman mana wichiykunanchikpaq (leey Proverbios 2:​6-16). Chayraykuchá bibliapipas nin: “¡Mayna kusisqam yachayniyuq kananpaq kallpanchakuq runaqa! ¡Mayna kusisqam allin tantiaq runaqa!”, nispa (Prov. 3:13).

6. ¿Imanasqataq Salmos qillqaqqa manaña kusisqachu karqa?

⁶ Manamá chaywanqa nichkanchik Jehova Diosta serviqkuna haykapipas mana llakisqa kanankumantachu. Salmos 73 capitulota qillqaqpas manañam kusisqañachu tarikurqa Diosta mana respetaq hinaspa mana kasukuq runakunapaqqa vida facil kasqanta piensaspan, hinaspapas envidiakuytaraqmi qallaykurqa. Payqa piensarqamá mana allin ruwaqkunapas chaynataq hatuntukuqkunapas tukuy imayuq kasqankuta, sano kawsakusqankuta hinaspa mana haykapipas ñakarisqankuta (Sal. 73:​3-7, 12). Llumpay hukmanyasqa kaspanmi piensarqa Diospaq tukuy ima ruwasqan yanqapaq kasqanta. Chaymi llakisqallaña nirqa: “Mana allin runakuna chayna kaptinkuqa, ¿imapaqñataq chuya sunquyuqqa kayman? ¿Imapaqñataq mana allinmantapas makiyta mayllakuyman?”, nispa (Sal. 73:13). Ichaqa manamá piensasqanman hinachu karqa.

7. ¿Imakunatam ruwananchik llakisqa kaspa kaqmanta kusisqa kanapaq? (Qawaytaq dibujotapas).

⁷ ¿Imatam Salmosta qillqaqqa ruwarqa manaña llakisqa kananpaq? ‘Diospa sumaq-sumaq wasinmanmi’ yaykurqa, chaypi kachkaptinmi Jehova Dios yanaparqa imayna piensasqanta cambiananpaq (Sal. 73:​17-19). Pimantapas aswan allin amistadninchik kasqanraykum Diosqa yachan llakisqa kasqanchikta. Chaymi mañakunanchik yanapawananchikpaq, hinaspapas palabranwan chaynataq iñiqmasinchikkunawan consejawasqanchiktam kasukunanchik. Chaykunata ruwaspam llakisqaña kaspapas kallpata hapisun hinalla Diosta servinapaq. Ima sasachakuyña kaptinpas payqa sunqunchikta tiyaykachispam hawkayaykachiwasun (Sal. 94:19).a

DIOSMAN ASUYKUYMI YANAPAWANCHIK KUNANPAS HINASPA HAMUQ TIEMPOPIPAS ALLIN KAWSAKUNAPAQ

8. ¿Imaynatawanraqmi yanapawanchik Diosman asuykuyqa?

⁸ Diosman asuykuyqa yanapawanchiktaqmi kunan kusisqa kawsakunapaqpas chaynataq Diospa promesankuna cumplikunanta suyanapaqpas (Jer. 29:11). Chaykunamantayá qatiqninpi yachaykusun.

9. ¿Imanasqam ninchik Jehova Diosman asuykuspanchikqa mana yanqapaq kawsakusqanchikta?

⁹ Diosman asuykuspanchikqa mana yanqapaq kawsakusqanchiktam entiendenchik. Kunan tiempopiqa achka runakunam Dios mana kasqanta ninku. Chayraykum wakinkuqa mana yachankuchu imapaq kawsakusqanchiktapas, hinaspapas piensankum tiempopa risqanman hina runakuna chinkananta. Ñuqanchikmi ichaqa bibliapa niwasqanchikwan manapuni iskayrayanchikchu ‘Dios chiqap kasqanta hinaspa tukuy sunqunkuwan maskaqninkunaman pagapuq kasqanta’ (Heb. 11:6). Taytanchik Jehova Diosqa unanchawarqanchik payta yupaychaspa kusisqa kawsakunapaqmi. Chaymi payta servispaqa tukuy ima ruwasqanchikmanta kusikunchik hinaspa hawka kawsakunchik (Deut. 10:​12, 13).

10. Salmos 37:29 nisqanman hinaqa, ¿imaynam hamuq tiempopi kawsakusun Diospi hapipakuqkunaqa?

¹⁰ Achka runakunam Diospa promesanmanta mana yachasqankurayku kawsanku llamkanallankupaq, churi-wawankuta uywanallankupaq hinaspa yuyaqyayninkupaq qullqita huñunallankupaq. Ñuqanchikmi ichaqa Jehova Diospi hapipakunchik (Sal. 25:​3-5; 1 Tim. 6:17). Amistadninchik kasqanraykum lliw prometewasqanchikkunata Dios cumplinanmantaqa mana iskayrayanchikchu. Yachanchikmi kay allpa pachanchik suma-sumaq huerta kaptin hawka hinaspa kusisqa kawsakunanchikta, chaypiqa Jehova Diostam wiña-wiñaypaq yupaychasun (leey Salmos 37:29).

11. ¿Imanasqaraqtaq Diosman asuykuyqa allinninchikpaq? ¿Imaynam pay tarikun chayta ruwaptinchik?

¹¹ ¿Imanasqaraqtaq Jehova Diosman asuykuyqa allinninchikpaq? Ima huchatapas ruwaruptinchikqa paymi niwanchik huchanchikmanta wanakuptinchikqa pampachawananchikmanta (Is. 1:18). Chayraykum ñawpaqpi ima huchatapas ruwaruspanchikqa mana hukmanyasqallaqa tarikunanchikchu (Sal. 32:​1-5). Diosman asuykuspanchikqa paypa sunquntapas kusichinchiktaqmi, chaywanmi ñuqanchikpas anchata kusikunchik (Prov. 23:15). Segurochá Jehova Diospa amistadnin kasqanchikmanta achka bendicionkunata chaskirqanchik. Ichaqa, ¿imatawanmi ruwachwan payman astawan asuykunanchikpaq?

¿IMATAM RUWACHWAN DIOSMAN ASTAWAN ASUYKUNAPAQ?

12. ¿Imatam ruwanayki Diosman astawan asuykunaykipaq?

¹² Bautizasqaña kaspaykiqa Jehova Diosmantawan Jesusmantam tukuy imata yacharqanki, huchaykikunamantam wanakurqanki, Diospim iñirqanki hinaspapas kamachikuyninkunata kasukunaykipaqmi tukuyta ruwarqanki. Chaymi nichwan Diosman asuykusqaykitaña. Chaywanpas, tukuy chaykunatam hinalla ruwanayki Diosman astawan asuykunaykipaq (Col. 2:6).

13. ¿Imakunatam ruwananchik Jehova Diosman astawan asuykunapaq?

¹³ Chaynaqa, ¿imatam ruwananchik Jehova Diosman astawan asuykunapaq? Hinallam bibliata leenanchik hinaspa estudiananchik. Ichaqa estudiananchikqa manam Diosmanta yachanallanchikpaqchu. Entiendeytataqmi munanchik ñuqanchikpaq Dios ima munasqantapas, hinaspapas palabranpi yachachikuykunaman hina kawsakuytam munanchik (Efes. 5:​15-17). Yuyaymanananchiktaqmi Dios kuyawasqanchikrayku imakunata ruwasqanpipas, chaynapi paypi astawan hapipakunapaq. Chaymantapas hinallam chiqninanchik Jehova Diospa chiqnisqan kaqkunata. Manataqmi mana allin kaqkunata ruwaqkunapa amistadninqa kananchikchu (Sal. 1:1; 101:3).

14. ¿Imatam sapa punchaw ruwachwan Jehova Diosta kusichinapaq? (Rimarimuytaq 1 Corintios 10:31 nisqanmantapas, qawaytaq fotokunatapas).

¹⁴ (Leey 1 Corintios 10:31). Chayraykum ancha allin Jehova Diosta kusichiq kaqkunata ruwayninchik. Chaykunaqa manam Diosmanta willakuyllachu utaq huñunakuyman riyllachu. Sapa punchaw imapas ruwasqanchikwanmi Jehova Diosta kusichinanchik. Diosqa anchatam kusikun tukuy imapi honrado kaptinchikqa hinaspa imapas kapuwasqanchikwan qukuykuqllaña kaptinchikqa (2 Cor. 8:21; 9:7). Diosqa munantaqmi vidanchikta anchata valorananchiktapas. Chayraykum Diosman astawan asuykuchkanchik mikuspapas utaq tomaspapas controlakuspaqa hinaspa saludninchikta cuidaspaqa. Tukuy imapas ruwasqanchikwan Diosta kusichiptinchikmi payqa astawan kuyawanchik (Luc. 16:10).

15. ¿Tukuy clase runakunawan imayna kananchiktam Diosqa munan?

¹⁵ Jehova Diosqa allin runakunawanpas chaynataq mana allin runakunawanpas ancha kuyapayakuqmi (Mat. 5:45). Ñuqanchikpas chayna kananchiktam munan. Diosqa munantaqmi serviqninkuna ‘pimantapas mana allinta ama rimanankuta, piñanakuyta ama rikurichinankuta hinaspa lliw runakunawan llampu sunqulla kanankuta’ (Tito 3:2). Chaymi mana testigo kaqkunamantaqa mana aswan allinpaqqa hapikunchikchu (2 Tim. 2:​23-25). Tukuy clase runakunawanpas kuyapayakuq kaspaqa astawanmi Jehova Diosman asuykusun.

HUKMANYASQA KASPANCHIKPAS DIOSMAN ASUYKUYTAQA ATICHWANMI

16. ¿Imaynam Salmos 73 capitulota qillqaq tarikurqa?

¹⁶ Wakinpiqa imapipas pantasqanchikraykum Jehova Dios manaña amistadninchik kasqanta piensachwan. Yaqa chaynam Salmos 73 capitulota qillqaqpas tarikurqa. Paymi nirqa: ‘Ñuqaqa yaqallam urmaykurqani, ñuqaqa yaqallam wichiykurqani’, nispan (Sal. 73:2). Nirqataqmi ‘piñasqa kasqantapas, mana yuyayniyuq kasqantapas chaynataq Diospa qayllanpi animal hina kasqantapas’ (Sal. 73:​21, 22). ¿Pantaq kasqanraykuchu piensarqa Diosta serviyta hinaspa paypa amistadnin kayta manaña atinanta?

17. (1) ¿Imatam Salmos 73 capitulota qillqaq ruwarqa llakisqallaña tarikuspan? (2) ¿Imatam paymanta yachachwan? (Qawaytaq fotokunatapas).

¹⁷ Yaqapaschá payqa piensarqa Jehova Dios mana pampachananta. Ichaqa manapas unaymantam cuentata qukururqa mana chayna llakisqallaña kananpaq Diosman asuykunanmanta. Kikinmi nirqa: “Kunanmi ichaqa qanwan kachkani. Qamqa alliq makiymantam hapillawachkanki. Allin ñanpi purinaypaqmi rimapayawanki. Chaymantam ichaqa hatunchawanki”, nispan (Sal. 73:​23, 24). Ñuqanchikpas hukmanyasqa kaspaqa Diospim astawan hapipakunanchik kaqmanta allin kananchikpaq (Sal. 73:26; 94:18). ¿Imatam ruwachwan ima mana allintapas ruwaruspanchik Diosmanta karunchakuruspaqa? ‘Pampachakuykuq kasqanmanta’ manapuni iskayrayaspanchikmi kaqmanta kutirikunanchik (Sal. 86:5). Arí, llumpay hukmanyasqallaña kaspaqa astawanraqmi Diosman asuykunanchik (Sal. 103:​13, 14).

HINALLAM WIÑAYKAMAPAS DIOSMAN ASUYKUYTAQA ATICHWAN

18. ¿Imanasqam mana haykapipas tukuchwanchu Jehova Diosman asuykuyta?

¹⁸ Manam haykapipas tukuchwanchu Jehova Diosman asuykuytaqa. Wiña-wiñaypaq kawsakuspapas hinallam paymantaqa yachasun. ¿Imanasqam chaynata ninchik? Bibliapim niwanchik yachayninmanta, imapas tantiasqankunamanta hinaspa tukuy ima ruwasqankunamanta ‘lliwta mana yachay atinanchikta’ (Rom. 11:33).

19. ¿Imamantam mana iskayrayasunchu Salmos 79 hinaspa 73 nisqanta leeruspaqa?

¹⁹ Salmos 79:13 nisqanpim kaynata nin: “Ñuqaykurayku imapas ruwasqaykimantam wiñaypaq agradecekusqaykiku. [ . . . ] Pastoykipi mikuq ovejaykikunaqa ñuqaykurayku imapas ruwasqaykimantam wiñaypaq agradecekusqaykiku. Hatunchasqa kasqaykimantam haykapipas willakusaqku”, nispa. Amayá iskayrayasunchu Jehova Diosman hinalla asuykuspa bendicionkunata wiñaypaq chaskinanchikmantaqa. Chaymi nichwan: “Diosmi ñuqapa sunquytaqa waqaychanqa. Payqa wiñaypaq herenciaymi”, nispa (Sal. 73:26).