Diosman sunqu angelkunatayá qatipakusun

1, 2. (1) ¿Imakunapitaq angelkunawanqa mana chaynallachu kanchik? (2) ¿Imakunatam angelkuna hina ruwayta atinchik?

JEHOVA DIOSMI ayllun ukupi kanapaq akllaykuwarqanchik. Paypa ayllun ukupi kaqkunaqa kuyakuqllaña hinaspa tukuy nacionkunapim kachkanchik. Ichaqa manam runakunallachu ayllunqa kanchik, aswanqa wara-waranqantin angelkunapiwanmi (Dan. 7:​9, 10). Angelkunawanqa manamá chaynallachu kanchik, paykunaqa ñuqanchikmanta ñawpaqtaraqmi unanchasqa karqaku (Job 38:​4, 7). Chaymantapas paykunaqa kanku atiyniyuqmi, chuyam hinaspa allinlla ruwaqkunam. Ñuqanchikmi ichaqa allin kaqkunata ruwanapaqqa sasachakunchik (Luc. 9:26).

² Angelkunawan mana chaynalla kaspanchikpas paykuna hinam atinchik Diospa imayna kasqanta qatipakuyta. Paykuna hinataqmi kikinchikmanta imatapas tantiakuspa kusisqa kanchik, sapakamataqmi sutiyuqpas kanchik, imayna kasqanchikpas manataqmi chaynallachu. Diospa llaqtanpipas sapakamam imapas ruwayniyuq kanchik. Chaymantapas angelkuna hinam Dios yupaychayta necesitanchik (1 Ped. 1:12).

3. ¿Imakunatam angelkunamanta yachasun, chaynapi qatipakunanchikpaq?

³ Angelkuna hina Diosta yupaychaq kasqanchikraykum ruwasqankumanta yachaspa kallpanchasqa tarikusun paykunata qatipakunapaq. Chaymi kay yachachikuypi yachasun angelkunapa humilde kasqankuta, runakunata kuyasqankuta, aguantasqankuta chaynataq Diospa serviqninkuna chuya kanankupaq yanapakusqankuta imaynata qatipakunamanta.

ANGELKUNAQA HUMILDEM KANKU

4. (1) ¿Imaynatam yachanchik angelkunaqa humilde kasqankuta? (2) ¿Imanasqataq angelkunaqa humilde kanku? (Rimarimuytaq Salmos 89:7 nisqanmantapas).

⁴ Diosman sunqu angelkunaqa humildem kanku. Paykunaqa unayña yachaspankupas, atiyniyuq kaspankupas chaynataq yachayniyuq kaspankupas Jehova Diospa kamachikuyninkunatam kasukunku (Sal. 103:20). Manataqmi angelkunaqa hatuntukunkuchu atiyniyuq kasqankumantaqa chaynataq Diospa imapas kamachisqanta ruwasqankumantaqa. Kusisqataqmi Diospa munayninta ruwanku runakuna sutinkuta mana yachaptinkupas (Gen. 32:​24, 29; 2 Rey. 19:35).a Paykunaqa manamá munankuchu Dios hina hatunchasqa kaytaqa. ¿Imanasqataq angelkunaqa humilde kanku? Diosta kuyasqankuraykum hinaspa anchata respetasqankuraykum (leey Salmos 89:7).

5. ¿Ima ruwasqanpim sutilla karqa huk angelpa humilde kasqan? (Qawaytaq dibujotapas).

⁵ Bibliam willawanchik humilde angelkunamanta. Chay angelkunamanta hukninmi 96 watapi apostol Juanman admirakuypaq kaqkunata musquyninpi qawachirqa, chay angelpa sutintaqa manamá yachanchikchu (Apoc. 1:1). Tukuy chay admirakuypaq kaqkunata qawachisqanmantam Juanqa angelpa ñawpaqninpi qunqurakurqa. Hinaptinmi angelqa chaylla nirqa: “¡Ama qunqurakuychu! Ñuqaqa [ . . . ] iñiqmasikikunapa serviqmasillanmi chaynataq qampa serviqmasillaykim kani, Diosllatayá yupaychayqa”, nispa (Apoc. 19:10). Angelpa chayna kasqanqa qatipakunapaqmá. Payqa manamá munarqachu Dios hina hatunchasqa kaytaqa. Chaymi Juanta nirqa Diosllata yupaychananpaq. Chaymantapas chay angelqa una-unay tiempoña Diosta servispanpas chaynataq Juanmanta aswan atiyniyuq kaspanpas mana hatuntukuspanmi nirqa: ‘Ñuqaqa serviqmasillaykim kani’, nispa. Manataqmi nanay simiwanchu yuyaq Juantaqa corregirqa, aswanqa kuyakuyllawanmi. Chay angelqa entienderurqachá imanasqa Juanqa paypa ñawpaqninpi qunqurakusqanta.

6. ¿Imaynatam ñuqanchikpas qatipakuchwan angelkunapa humilde kasqankuta?

⁶ ¿Imaynatam qatipakuchwan angelkunapa humilde kasqankuta? Diospa llaqtanpi imapipas yanapakusqanchikmanta utaq imapas yachasqanchikmanta mana alabakuspam (1 Cor. 4:7). Manataqmi hukkunamanta aswan allinpaqqa hapikunanchikchu unay wataña Diosta servisqanchikraykuqa utaq Diospa llaqtanpi imapipas yanapakusqanchikraykuqa. Chayna imapas ruwayniyuq kaspaqa aswan humildem kananchik (Luc. 9:48). Angelkuna hinam ñuqanchikpas hukkunata tukuy imapi yanapayta munanchik. Manamá munanchikchu iñiqmasinchikkuna paykunamanta aswan allin kasqanchikta piensanankutaqa.

7. ¿Imaynatam humilde kasqanchikta qawachichwan pitapas corregispaqa utaq consejaspaqa?

⁷ Humildem kananchik pi iñiqmasinchikta utaq warmanchikkunata corregispapas utaq consejaspapas. Wakinpiqa mana manchakuspam consejananchik kanqa. Ichaqa atichwanmi rimasqanchikwan mana hukmanyachispalla sumaqta consejaytaqa. Apostol Juanta corregiq angel hinam imam kaqta nispapas kuyakuyllawan correginanchik. Chaypaqqa bibliapa nisqanta qawachispam respetowan consejananchik. Chaytam ruwasun hukkunamanta aswan allinpaq mana hapikuspaqa (Col. 4:6).

ANGELKUNAQA ANCHATAM KUYAWANCHIK

8. (1) Lucas 15:10 nisqanman hinaqa, ¿imatam angelkunaqa ruwanku runakunata kuyawasqanchikrayku? (2) ¿Imaynatam angelkunaqa yanapawanchik Diosmanta willakuypi? (Qawaytaq fototapas).

⁸ Angelkunaqa lliwtam kuyawanchik. Chaymi kusikunku pipas huchanmanta wanakuspan Diospa llaqtanman kutimuptinqa. Kusikunkutaqmi pipas Diosmanta yachayta qallaykuspan servinanpaq mana allin ruwasqanta saqiruptinpas (leey Lucas 15:10). Angelkunaqa Diosmanta willakuypipas yanapawanchikmi (Apoc. 14:6). Paykunaqa manamá Diosmantaqa willakunkuchu, chaywanpas Diosmanta yachay munaq runakunamanmi pusawanchikman. Chaywanqa manam nichkanchik allin sunquyuq runakunata tarinapaq angelkunalla yanapawasqanchiktachu. Diosqa yanapawanchiktaqmi atiyninwanpas, runamasinchikwanpas utaq imawanpas (Hech. 16:​6, 7). Chaywanpas, angelninkunawanmi astawanqa yanapawanchik. Chaymi mana iskayrayananchikchu willakuptinchik angelkuna yanapawananchikmantaqa. (Qaway “Mañakusqankuman hinam Diosqa yanapaykurqa” niqta).b

9. ¿Imaynatam angelkuna hina runamasinchikkunata kuyachwan?

⁹ ¿Imaynatam angelkuna hina runamasinchikkunata kuyachwan? Qarqusqa iñiqmasinchik kaqmanta Diospa testigon kananpaq willawaptinchik anchata kusikuspam. Chay iñiqmasinchiktaqa kusikuywanyá chaskiykusun hinaspayá niykusun ancha kuyasqanchikta (Luc. 15:​4-7; 2 Cor. 2:​6-8). Angelkuna hina kuyakuq kaspataqyá tukuyta ruwasun runamasinchikkunaman Diosmanta willanapaq (Ecl. 11:6). Chaymantapas angelkuna Diosmanta willakunanchikpaq yanapawasqanchikman hinayá iñiqmasinchikkunata Diosmanta willakunankupaq yanapaykusun. Diosmanta chayllaraq willakuq iñiqmasinchiktam niykuchwan paywan kuska willakuq lluqsinapaq, niykuchwantaqmi yuyaq utaq unquq iñiqmasinchiktapas kuska Diosmanta willakunapaq.

10. ¿Imatam yachanchik iñiqmasinchik Saramanta?

¹⁰ Ñawpaqta hina Diosmanta willakuyta mana atiptinchikpas angelkunaqa hinallam yanapawasun atisqanchikman hina willakunanchikpaq. Rimarisunchik India nacionniyuq Saramanta.c Payqa yaqa 20 watam precursora karqa. Ichaqa unqurusqanraykum camallapiña karqa, chaywanmi llumpayta hukmanyarurqa. Chaywanpas iñiqmasinchikkuna kuyakuywan yanapaykusqanraykum chaynataq sapa punchaw biblianta leesqanraykum as-asmanta kusisqaña karqa. Payqa camanmanta tiyariyta mana atisqanraykum cartakuna qillqaytapas mana atillaqchu, chaymi telefonollawan qayaq ñawpaqta yachachisqan runakunata. Paykunañataqmi willaqku huk runakunapas bibliamanta yachay munasqankuta. Chaymi Saraqa killakuna pasaypaqqa 70 runakunataña bibliamanta yachachirqa. Achka kasqanraykum tiemponpas manaña haypaqchu, chaymi iñiqmasinchikkunataña nirqa wakinman yachachinankupaq. Chay runakunamanta wakinqa huñunakuykunamanmi richkanku. ¡Angelkunaqa mayna kusisqachá tarikunku Sarata hina wakin iñiqmasinchikkunatapas Diosmanta willakunankupaq yanapaspankuqa!

ANGELKUNAQA TUKUYTAM AGUANTACHKANKU

11. ¿Imanasqataq ninchik Diosman sunqu angelkunaqa hinalla aguantasqankuta?

¹¹ Diosman sunqu angelkunaqa wara-waranqantin watakunañam aguantachkanku satanaswan demoniokuna Diospa contranpi huqarikuspanku tukuy mana allin ruwasqankuta (Gen. 3:1; 6:​1, 2; Jud. 6). Chaymantapas bibliapim willawanchik atiyniyuq demoniowan huk angel peleasqanmanta (Dan. 10:13). Hinaspapas angelkunaqa una-unay watakunañam qawachkanku as runakunalla Diosta servinankupaq tantiakusqankuta. Tukuy chaykunata qawaspankupas paykunaqa hinallam Diosman sunqu kanku, hinaspapas Diostam ancha kusisqa servichkanku. Angelkunapa chayna kasqankuqa qatipakunapaqmi. Paykunaqa yachankum tantiasqan tiempopi Dios tukuy mana allinkunata chinkachinanta.

12. ¿Imataq yanapawasun sasachakuykunata aguantanapaq?

¹² ¿Imaynatam angelkunapa aguantasqankuta qatipakuchwan? Ñuqanchikpas qawachkanchikchá tukuy mana allinkuna pasakusqanta, utaqchá wakin runakuna mana munankuchu Dios servinanchikta. Chaywanpas angelkuna hinam mana iskayrayanchikchu tiempollanpi tukuy mana allinkunata Dios chinkachinanmanta. Chaynaqa, Diosman sunqu angelkuna hinayá ‘ama amirusunchu imapas allin ruwayta’ (Gal. 6:9). Chaymantapas Diosmi niwanchik aguantanapaq yanapawananchikmanta (1 Cor. 10:13). Chaypaqmi mañakuchwan pacienciakunapaq hinaspa kusisqa kanapaq atiyninwan yanapawananchikpaq (Gal. 5:22; Col. 1:11). Chaynaqa, ¿imatam ruwachwan Diosta servinanchikta pipas mana munaptinqa? Diospi hapipakuspam mana manchakunanchikchu, payqa yanapawananchikpaqmi listo kachkan (Heb. 13:6).

ANGELKUNAQA DIOSPA LLAQTAN CHUYA KANANPAQMI YANAPAKUNKU

13. ¿Ima ruwayniyuqmi angelkunaqa kanku kay tukupay punchawkunapi? (Rimarimuytaq Mateo 13:​47-49 nisqanmantapas).

¹³ Kay tukupay punchawkunapim Diosqa angelkunaman huk sumaq llamkayta quykun (leey Mateo 13:​47-49). Enteron allpa pachapim millonnintin runakuna Diosmanta yachayta munanku. Chay runakunamanta wakinmi mana allin ruwasqankuta saqispanku Diospa munasqanman hinaña serviyta qallaykunku, wakinkuñataq mana. Chaynaqa, ¿imaynatam angelkunaqa yanapakunku? Paykunaqa ‘allin runakunamanta mana allin runakunata rakinankupaqmi’ kamachisqa kanku, chaynapi Diospa llaqtan chuya kananpaq. Chaywanqa manam nichkanchik Diospa llaqtanmanta karunchakuqkunaqa mana haykapipas kutimunankumantachu. Manataqmi nichkanchik congregacionpi sasachakuykuna manaña kananmantachu. Ichaqa manam iskayrayananchikchu Diospa llaqtan chuya kananpaq angelkuna tukuy ima ruwasqankumantaqa.

14, 15. ¿Imaynatam angelkuna hina yanapakuchwan Diospa llaqtan chuya kananpaq? (Qawaytaq fotokunatapas).

¹⁴ ¿Imaynatam angelkuna hina yanapakuchwan Diospa llaqtan chuya kananpaq? Chaypaqqa cuidakunanchikmi Dioswan amistadninchikta imapas ruwasqanchikwan mana yanqacharunanchikpaq. Chaymi Diosman sunqu iñiqmasinchikkunawan amistad kananchik. Chaymantapas Diospa chiqnisqan kaqkunamanta chaynataq chay mana allin kaqkunata ruwaq runakunamantam karunchakunanchik. Chaynata ruwaspam yanapakuchkanchik Diospa llaqtan chuya kananpaq (Sal. 101:3). Iñiqmasinchikkunatapas yanapachwantaqmi Diosta kasukunankupaq ¿imaynanpi? Ichapas yacharuchwan mayqin iñiqmasinchikpas hatun huchata ruwarusqanta. Chay iñiqmasinchikta kuyasqanchikraykum kallpanchasun punta apaqkunawan rimananpaq. Chayta mana ruwaptinqa ñuqanchikñam punta apaqkunaman willananchik, chaynapi chay iñiqmasinchikta chaylla yanapanankupaq (Sant. 5:​14, 15).

¹⁵ Ancha llakikuypaqmi hatun huchata ruwaqkunamanta wakinkuqa congregacionmanta qarquchikunku. Hinaptinmi paykunawanqa manaña hukllawakunchikchu (1 Cor. 5:​9-13).d Paykunawan mana hukllawakuspanchikqa yanapakuchkanchikmi congregacion chuya kananpaq. Hinaspapas qarqusqa kaqkunatam yanapachkanchik paykunawan ñawpaqta hina mana amistad kasqanchikrayku Diospa llaqtanman kutimunankupaq. Kutiramuptinkuqa Jehova Dioswan angelkuna hinam ñuqanchikpas kusisqa tarikusun (Luc. 15:7).

16. ¿Imakunapitaq angelkunata qatipakuyta munanki?

¹⁶ Anchatam kusikunchik hanaq pachapi angelkuna tukuy ima ruwasqankumanta yachasqanchikrayku chaynataq paykunawan kuska llamkasqanchikrayku. Chaynaqa angelkunatayá qatipakusun humilde kaspa, runamasinchikkunata kuyaspa, imatapas aguantaspa hinaspa Diospa llaqtan chuya kananpaq yanapakuspa. Paykunata qatipakuspa Diosman sunqu kaspaqa Diospa churinkuna kaspam wiña-wiñaypaq serviyta atisun.