¿Imakunatam ruwachwan Diospa sutinrayku?

1, 2. ¿Imakunatam Jesusqa ruwarqa taytanpa sutinta defiendenanrayku?

PASAQ yachachikuypim yacharqanchik Jesusqa taytanpa sutinta defiendenanpaq pimantapas astawan tukuyta ruwasqanmanta, chaynapi mana pipas taytanmanta llullakunata rimananpaq utaq creenanpaq (Mar. 14:36; Heb. 10:​7-9). Jesusqa 1.000 wata kamarachispanpas tukuy imatam taytanpa makinmanña churaykunqa payña kamachinanpaq. Chaytaqa ruwanqa taytanpa sutin wiñaypaq hatunchasqa hinaspa respetasqa kananta munasqanraykum (1 Cor. 15:​26-28). Jesuspa tukuy ima ruwasqanmanta yachaspam sutillata cuentata qukunchik taytanta anchata kuyasqanmanta.

² Jesusqa taytanpa sutinpim kay pachamanqa hamurqa (Juan 5:43; 12:13). Chaymi qatiqninkunamanpas taytanpa sutinta yachachirqa (Juan 17:​6, 26). Taytanpa sutinpitaqmi milagrokunatapas ruwarqa hinaspa runakunamanpas yachachirqa (Juan 10:25). Huk kutipipas qatiqninkunapaq taytanta mañakuspanmi nirqa: “Paykunatayá cuidaykuy sutikirayku”, nispan (Juan 17:11). Arí, Jesusqa yachamusqanchikman hinam tukuyta ruwarqa taytanpa sutinrayku. Chaynaqa, ¿imanasqamá “Jesuspim iñiniku utaq cristianom kaniku” niqkunaqa Diospa sutintaqa mana yachankupaschu nitaq rimankupaschu?

3. ¿Imakunamantam kay yachachikuypi yachasun?

³ Jesuspa qatiqnin kasqanchikraykum ñuqanchikqa Diospa sutin hatunchasqa hinaspa respetasqa kananta munanchik (1 Ped. 2:21). Kay yachachikuypim yachasun ‘Diospa gobiernonmanta sumaq willakuyta’ willakuqkunaqa Diospa sutinta apasqanchikmanta (Mat. 24:14). Yachasuntaqmi Diospa sutinrayku sapakama imakunata ruwananchikmantapas.

‘DIOSPA SUTIN APAQ LLAQTA’

4. (1) ¿Imatam qatiqninkunaman Jesus nirqa hanaq pachaman manaraq kutikuchkaspan? (2) ¿Ima tapukuykunamantam yachasun?

⁴ Hanaq pachaman kutikunanpaqña kachkaspanmi Jesusqa qatiqninkunata nirqa: “Atiyninwan Dios yanapasuptikichikmi ñuqamanta willakunkichik Jerusalenpi, enteron Judeapi, Samariapi chaynataq kay pachapa cantonkama”, nispan (Hech. 1:8). Chaynaqa manamá Israel nacionllapichu willakunankuqa karqa, aswanqa lliw nacionmanta runakunapas paypa qatiqnin kaytam atinmanku karqa (Mat. 28:​19, 20). Ichaqa, ¿imanasqataq nirqa “ñuqamantam willakunkichik” nispan? ¿Jesusqa nichkarqa qipa iñikuqkuna payllamanta willakunankumantachu icha Diostapas riqsispankuchu paymantawan willakunanku karqa? Chayta yachanapaqmi Hechos 15 capitulomanta yachayninchik yanapawasun.

5. ¿Imamanta parlanankupaqmi apostolkunawan Jerusalenpi punta apaqkuna huñunakurqaku? ¿Imaynatam sutillata entienderqaku Diospa sutinta yachayqa ancha allin kasqanta? (Qawaytaq dibujotapas).

⁵ Hechos 15 capitulopim willawanchik 49 watapi apostolkunawan Jerusalenpi punta apaqkuna huñunakusqankumanta. Huñunakurqakuqa mana judio kaqkuna Jesuspa qatiqnin kanankupaq imata ruwanankumanta parlanankupaqmi. Chay huñunakuy tukuytam Jesuspa sullkan wawqin Santiago nirqa: “Simeonmi [utaq Pedrom] lliwta willakurun imaynam huklaw nacionniyuq runakunata Diosqa chayllaraq chaskiykusqanmanta, chaynapi kikin Dios chay nacionkunamanta sutin apaq llaqtata rikurichinanpaq”, nispan. Chaymantam Diosmanta willakuq Amospa nisqanta yuyarichirqa. Amosmi Diospa nisqanta qillqarqaña kaynata: “Qipaq runakunam llapallan nacionpi runakunawan kuska ñuqa Jehova Diosta tukuy sunqunkuwan maskawanqaku, paykunaqa sutiywan sutichasqam kanku, [ . . . ] Jehova Diosmi chaynata nini”, nispan (Hech. 15:​14-18). ¿Pipa sutinta apaq runakunamantam Santiagoqa rimachkarqa? Jehova Diospamantam. Arí, Santiagoqa rimachkarqa qipa iñikuqkuna Jehova Diosmanta yachaspanku paypa sutinwan sutichasqa kanankumantam. Chaymi Diospa sutinta apasqankuwan riqsichikuspanku hukkunamanpas riqsichinanku karqa.

6, 7. (1) ¿Imapaqmi Jesusqa kay allpa pachaman hamurqa? (2) ¿Imapaqtaq astawanqa hamurqa?

⁶ ¿Yuyachkanchikchu Jesuspa sutin ima ninan kasqanta? Jesus ninanqa “salvaqninchikqa Jehova Diosmi” ninanmi. Jesusmá kay allpa pachaman hamurqa ñuqanchikrayku wañunanpaq (Mat. 20:28). Wañukusqanraykum llapallanchik huchanchikmanta pampachasqa kayta atichwan hinaspa wiñaypaq kawsakuyta haypayta atichwan (Juan 3:16). Chaykunaraykum nichwan Jehova Diosqa iñiyniyuq runakunata Jesuswan salvasqanta.

⁷ Ichaqa manam salvawanallanchikpaqchu Jesusqa hamurqa hinaspa wañukurqa. Astawanqa hamurqa taytanpa sutinta defiendenanpaqmi, chaynapi llapallanpa respetasqan kananpaq. ¿Imanasqataq chayqa allinninchikpaq? Pasaq yachachikuypi yachamusqanchikman hinam Adanwan Evaqa Eden huertapi Jehova Diosta mana kasukusqankurayku wiñaypaq kawsakuyta pierderurqaku (Gen. 3:​6, 24). Chaymi Jesusqa hamurqa paykunapa mirayninkunata huchamantawan wañuymanta librawananchikpaq. Chaymantapas satanasmi Eden huertapi Jehova Diosmanta llullakunata rimaspan sutinta pinqayman churarqa (Gen. 3:​4, 5). Chaymi Diospa sutin respetasqa kananpaqqa lliw yachananku karqa pay allin ruwaq kasqantawan kuyakuq kasqanta. Jesusqa yacharqam Diospa sutin hatunchasqa hinaspa respetasqa kaptillan runakunaqa wiñaypaq salvasqa kanankuta. Chaymi Jesusqa pimantapas astawan yanapakurqa taytanpa sutin respetasqa kananpaq. ¿Imaynata? Taytanpa sutinpi hamuspanmi hinaspa taytanpa munasqanman hina tukuy imata ruwaspanmi.

8. ¿Imatam Jesuspa llapallan qatiqninkuna allinta entiendenanku karqa?

⁸ Jesuspa qatiqninkunaqa judio utaq mana judio kaspankupas allintam entiendenanku karqa salvasqa kanankupaq Jehova Dios tukuy ima ruwasqanta (Juan 17:3). Allintataqmi entiendenanku karqa salvasqa kanankupaqqa Diospa sutin respetasqa kananpaq yanapakunankumantapas. Chaymantapas Jesus hinam paykunapas Jehova Diospa sutinwan riqsisqa kananku karqa (Hech. 2:​21, 22). Chaynaqa, Jesuspa llapallan qatiqninkunam allinta yachananku karqa Jehova Diosmanta hinaspa Jesusmanta. Chayraykuchá Jesusqa Juan 17 capitulopi willawaspanchik taytanta mañakuspan kaynata tukurqa: “Ñuqaqa sutikitam yachachirqani, yachachisaqtaqmi kuyawasqaykiman hina paykunapas hukkunata kuyanankupaq hinaspa ñuqapas paykunawan huklla kanaypaq”, nispan (Juan 17:26).

“QAMKUNAQA TESTIGOYKUNAM KANKICHIK”

9. ¿Imantam ruwananchik Jesuspa qatiqnin kayta munaspaqa?

⁹ Jesuspa qatiqnin kayta munasqanchikraykum Diospa sutinta pipa sutinmantapas astawan respetananchik. Imapas ruwasqanchikwanmi sutilla kanan Diospa sutinta chuyanchayta hinaspa defiendeyta munasqanchik (Mat. 6:​9, 10). Chaynaqa, ¿imatam ruwachwan Diospa sutinta defiendenapaq hinaspa Diosmanta satanaspa nisqankuna llulla kasqanta qawachinapaq?

10. ¿Imamantam willawanchik Isaias 42 capitulomanta 44 capitulokama? (Rimarimuytaq Isaias 43:9; 44:​7-9 nisqanmantapas, qawaytaq dibujotapas).

¹⁰ Isaias 42 capitulomanta 44 capitulokamam willawanchik Diospa sutin respetasqa utaq chuyanchasqa kananpaq imakunata ruwananchikmanta. Chay capitulokunapim Jehova Dios payta mana yupaychaq runakunata nichkan yupaychasqanku dioskuna atiyniyuq utaq kawsaq kaptinqa imawanpas qawachinankupaq. Quejapi juez kachkanmanpas hinam Diosqa chay runakunata qayachkan diosninku kawsaq utaq atiyniyuq kaptinqa mayqan testigonpas rimarinanpaq. Ichaqa manam pipas kanchu (leey Isaias 43:9; 44:​7-9).

11. Isaias 43:​10-12 nisqanman hinaqa, ¿imatam Jehova Dios serviqninkunata nin?

¹¹ (Leey Isaias 43:​10-12). Kay versiculokunapi nisqanman hinaqa Jehova Diosmi serviqninkunata nin: “Qamkunaqa testigoykunam kankichik [ . . . ], ñuqañataqmi Dios kani”, nispan. Chaymantañataqmi tapun: “¿Kanmanchu ñuqamanta huk Dios?”, nispan (Is. 44:8). Ñuqanchikqa yachanchikmi Jehova Dioslla atiyniyuq hinaspa kawsaq Dios kasqanta. Imapas ruwasqanchikwan hinaspa rimasqanchikwanmi hukkunaman chayna kasqanta yachachiyta munanchik. Yachachiytataqmi munanchik paypa sutin pipa sutinmantapas aswan respetana kasqanta. Chaymantapas Jehova Diosta tukuy sunquwan kuyasqanchikraykum paypa munasqanman hina kawsakunchik, hinaspapas payman sunqum kanchik tukuy imawanña satanas sasachawaptinchikpas. ¡Anchatamá kusikunchik Diospa sutin respetasqa kananpaq yanapakusqanchikwanqa!

12. ¿Imaynatam cumplikurqa Isaias 40:​3, 5 nisqan?

¹² Isaiasqa willakurqataqmi Jehova Diospa ‘ñanninta huk runa allichananmantapas’ (Is. 40:3). ¿Imaynatam chay willakusqan cumplikurqa? Jesus hamunanmanta bautizaq Juan willakusqanwanmi, chaynatam Diospa ñanninta allichachkarqa. Jesusqariki Jehova Diospa sutinpim hamurqa hinaspa runakunamanpas willakurqa (Mat. 3:3; Mar. 1:​2-4; Luc. 3:​3-6). Isaiasqa willakurqañataqmi: “Jehova Diospa kanchayninmi qawakunqa”, nispan (Is. 40:5). ¿Imaynatam chay willakusqanpas cumplikurqa? Jesus kay allpa pachaman hamusqanwanmi. Payqa taytanpa kamachisqanman hinapunim imatapas ruwarqa hinaspa rimarqa. Chaymi karqa kikin Jehova Dios kay pachaman hamuchkanmanpas hina (Juan 12:45).

13. ¿Imaynatam Jesusta qatipakuchkanchik?

¹³ Diospa sutin chuyanchasqa utaq respetasqa kananpaq yanapakuspanchikqa Jesustam qatipakuchkanchik. Jehova Diospa testigonkunam kanchik, chaymi Jesus hina Diospa sutinta apanchik hinaspa Diospa admirakuypaq ruwasqankunamanta hukkunaman willakunchik. Allin testigokuna kananchikpaqqa willakunanchiktaqmi Diospa sutin respetasqa kananpaq Jesuspa tukuy ima ruwasqankunamantapas chaynataq imakuna ruwananmantapas (Hech. 1:8). Jesusqa pimantapas aswan allin testigom, chaymi ñuqanchikpas pay hina kayta munanchik (Apoc. 1:5). Chaynaqa, ¿imakunatam Diospa sutinrayku sapakama ruwachwan?

¿IMAKUNATAM RUWACHWAN DIOSPA SUTINRAYKU?

14. Salmos 105:3 nisqanman hinaqa, ¿imatam ruwananchik maypi kaspapas? ¿Imanasqa?

¹⁴ Maypi kaspapas Diospa sutinmantam kusisqa rimanchik (leey Salmos 105:3). Jehova Diosqa anchatam kusikun paymanta kusikuywan willakuptinchikqa hinaspa pay Diosninchik kasqanmanta alabakuptinchikqa (Jer. 9:​23, 24; 1 Cor. 1:31; 2 Cor. 10:17). Satanasqa munachkan Diospa sutinmanta willakuyta saqirunanchiktam (Jer. 11:21; Apoc. 12:17). Arí, satanasqa hinaspa paypa munayninta ruwaqkunaqa tukuytam ruwachkanku runakuna Diospa sutinta qunqarunankupaq (Jer. 23:​26, 27). Ñuqanchikmi ichaqa Jehova Diosta hinaspa sutinta kuyasqanchikrayku imay horapas alabayta munanchik (Sal. 5:11; 89:16). Anchatamá kusikunchik sutinta hatunchanapaq hinaspa defiendenapaq Dios akllaykuwasqanchikmanta. Chayraykum Jehova Diospa testigon kasqanchikta riqsichikuytaqa manapuni pinqakunanchikchu llamkayninchikpipas, estudiasqanchikpipas, llaqtanchikpipas utaq maypiña kaspapas.

15. ¿Imakunata ruwaspam sutinmanta Jehova Diosta qayakuchwan?

¹⁵ Jehova Diostam sutinmanta sapa kuti qayakunchik (Joel 2:32; Rom. 10:​13, 14). Diosta sutinmanta qayakuyqa manam sutinta yachayllachu hinaspa rimayllachu, aswanqa imayna Dios kasqanta riqsiymi, paypi hapipakuymi hinaspa yanapawananchikpaq haykapipas mañakuymi (Sal. 20:7; 99:6; 116:4; 145:18). Chaymantapas Diospa sutinta hinaspa imayna sunquyuq kasqanmanta yachachiymi hinaspa huchankumanta wanakuspa Diospa chaskisqan kanankupaq yanapaymi (Is. 12:4; Hech. 2:​21, 38).

16. ¿Imaynatam qawachichwan satanas llulla kasqanta?

¹⁶ Diospa sutinraykum ima sasachakuyta aguantanapaqpas listo kanchik (Sant. 5:​10, 11). Diosman sunqu kasqanchikrayku ñakarispanchikqa satanas llulla kasqantam qawachichkanchik. Jobpa tiemponpim Diospa serviqninkunamanta satanas kaynata nirqa: “Runaqa kikinpa allinllantam maskan. Runaqa vidanraykum tukuy ima kapuqninta qunman”, nispa (Job 2:4). Chaywanqa nichkarqa allinlla kawsakuspanku Diosta servinankumantam, sasachakuypi kaspankuñataq Diosta saqirunankumanta. Jobmi ichaqa qawachirqa chayna nisqan llulla kasqanta. Ñuqanchikpas satanas llulla kasqantam qawachichwan ima sasachakuypiña kaspapas Jehova Diosmanta mana karunchakuspanchik. ¡Anchatamá kusikunchik Diospa sutinta defiendeyta atisqanchikmantaqa! Manapunim iskayrayanchikchu imaña-haykaña kaptinpas sutinrayku Jehova Dios cuidawananchikmantaqa (Juan 17:11).

17. 1 Pedro 2:12 nisqanman hinaqa, ¿imaynatawanraqmi Diospa sutin hatunchasqa kananpaq yanapakuchwan?

¹⁷ Imapas ruwasqanchikwanmi Diospa sutinta hatunchayta munanchik (Prov. 30:9; Jer. 7:​8-11). Jehova Diospa testigon kasqanchikwan riqsichikuspanchik imapas ruwasqanchikwanmi runamasinchikkunaqa Diosta hatunchanmanku utaq paymanta mana allinta rimanmanku (leey 1 Pedro 2:12). Chaymi ima ruwasqanchiktapas chaynataq ima rimasqanchiktapas cuidakunanchik. Chaynapi imayna kawsakusqanchikta qawawaspanchik runamasinchikkuna Diosta alabanankupaq. Arí, pantaq kaspapas Diospa sutin hatunchasqa kananpaq yanapakuytaqa atichwanmi.

18. ¿Imatam hinalla ruwayta munanchik ñuqanchikmanta mana allinta rimaptinkupas? (Qawaytaq willakuytapas).

¹⁸ Runakuna ñuqanchikmanta mana allinta rimaptinkupas Diospa sutintam hinalla hatunchayta munanchik (Sal. 138:2). ¿Imanasqataq runakunaqa ñuqanchikmanta mana allinta rimanqaku utaq burlakunqaku? Jehova Diospa sutin hatunchasqa kananta munaspanchik paypa munasqanta kaqkunata ruwasqanchikraykum.a Jesusmantapas mana allin ruwaq runata hina wañuchiptinkum tukuyta nirqaku. Paymi ichaqa taytanpa sutin hatunchasqa kananrayku tukuyta aguantarqa. Imamantapas astawanqa taytanpa munayninta ruwayta munasqanraykum ‘pinqaytapas qipanchakuykurqa’ (Hebreos 12:​2-4). Arí, Jesusqa manamá llumpaytaqa piensarqachu kikinmanta runakuna tukuy imata nisqankupiqa (Mat. 26:39). Ñuqanchikpas Jesus hinam Diospa munayninta ruwaspa sutinta hinalla hatunchayta munanchik ñuqanchikmanta runakuna imataña niptinkupas.

19. ¿Imaynam tarikunchik Diospa sutinta yachasqanchikwan hinaspa apasqanchikwan?

¹⁹ ¿Imaynam tarikunchik Diospa sutinta yachasqanchikwan hinaspa apasqanchikwan? Ancha kusisqam tarikunchik. Chaymi maypiña kaspanchikpas Jehova Diosmanta willakunchik, paypa testigon kasqanchikwan riqsichikunchik, ñuqanchikmanta mana allinta rimaptinkupas utaq burlakuptinkupas Diospa sutintam astawanqa hatunchanchik. Chaynapim Jesus hina qawachisun Diospa sutinta chuyanchasqanchikta hinaspa respetasqanchikta.