¿Hinallachu yanapawachwan qallariypi bibliamanta yachasqanchikkuna?

1. ¿Imaynatam yanapawarqanchik bibliamanta qallariypi yachasqanchikkuna?

BIBLIA estudiayta qallaykuptinchik yachasqanchikkunam anchata yanapawarqanchik. Diospa sutin Jehova kasqanta yacharuspanchikmi paywan amistad kayta qallaykurqanchik (Is. 42:8). Wañuqkunamanta imam kaqta yacharuspanchikpas manañam nirqanchikchu familianchikkuna wañukuspanku ñakarisqankutaqa (Ecl. 9:10). Yacharurqanchiktaqmi kay allpa pachanchik sumaq huerta kaptin wiñaypaq kawsakunamantapas, chaymi manaña llakikurqanchikchu hamuq punchawkunata imayna kananchikmantaqa (Sal. 37:29; 90:10).

2. ¿Imanasqataq unay wataña Diosta serviqkunata Pedro yuyarichirqa qallariypi yachasqankuta? (Rimarimuytaq 2 Pedro 1:​12, 13 nisqanmantapas).

² Unay wataña Diosta servispanchikpas manam qunqananchikchu qallariypi yachasqanchikkuna allinta yanapawasqanchiktaqa. Apostol Pedrom iñiqmasinkunaman qillqarqa ‘chiqap yachachikuypi allin kachkaptinkupas’ (leey 2 Pedro 1:​12, 13). Pedroqa paykunatam kallpanchayta munarqa, chaynapi iñiqkuna ukupi Diosmanta willakuqtukuqkunamanta hinaspa mana allin runakunamanta cuidakunankupaq (2 Ped. 2:​1-3). Hinalla Diosman sunqu kanankupaqmi yuyarichirqa qallariypi yachasqankuta.

3. ¿Imanasqataq unay wataña Diosta serviqkunapas yuyarinanchik qallariypi yachasqanchikkunata? Rimarimuy tupanachispa.

³ Diosta unay wataña serviptinchikpas qallariypi yachasqanchikkunaqa hinallaraqmi yanapawachwan. Kaywan tupachisun: Unay wataña yanukuyta yachaq mamaqa ichapas verdurakunawanqa tukuy rikchaq mikuykunata yanukuyta yachan, wawanñataq hina chay verdurakunallawan sopallata yanukuyta yachan. Chay mama hinam unay wataña Diosta serviqkunapas qallariypi bibliamanta yachasqanchikkunata yuyarispa astawanraq yachachwan. Bautizakusqanchikmanta kunankamaqa manamá hina chaynallachu imayna kawsakusqanchikqa hinaspa Diosta servisqanchikqa. Chaymi qallariypi yachasqanchikkunaqa yanapawachwan kunan imayna tarikusqanchikpipas. Kay yachachikuypim yachasun unay wataña testigo kaptinchikpas qallariypi yachasqanchikkuna imaynata yanapawananchikmanta.

JEHOVA DIOSMI TUKUY IMATA UNANCHARQA

4. Jehova Dios tukuy imata unanchaq kasqanta yachasqanchikqa, ¿imaynatam yanapawanchik?

⁴ Yachanchikmi allpa pachatawan chaypi tukuy ima kaqkunata pipas yachayniyuq hinaspa atiyniyuq ruwasqanta. Bibliapim nin: ‘Tukuy imapas Diospa ruwasqanmi’, nispan (Hebreos 3:4). Diosqa unanchawasqanchikraykum allintapuni riqsiwanchik, ichaqa manam chayllachu. Anchatam kuyawanchik, hinaspapas ñuqanchikpaq ima aswan allin kasqantam yachan. Chaynaqa, tukuy ima unanchaqqa Jehova Dios kasqanta yachasqanchikmi yanapawanchik payllata servispa kusisqa kawsakunanchikta entiendenapaq.

5. ¿Imapaqwanmi yanapawanchik tukuy imata unanchaqqa Jehova Dios kasqanta yachayninchik? (Rimarimuytaq Isaias 45:​9-12 nisqanmantapas).

⁵ Tukuy imata unanchaqqa Jehova Dios kasqanmanta yachayqa yanapawanchiktaqmi humilde kanapaqpas. Jobmi huk kutipi yanqamanta tumpaptinku kikillanpi piensaspan Diosmantapas mana allinkunata rimarqa. Chaymi Jehova Diosqa yuyarichirqa paylla tukuy atiyniyuq unanchaq kasqanta (Job 38:​1-4). Chaywanmi Jobqa cuentata qukurqa Diospa tukuy ima ruwasqankunaqa haykapipas allinpuni kasqanta. Chaymanta rimaspanmi Isaiaspas nirqa: “¿Yaqachu mituqa manka ruwaqta ninman: ‘¿Imatataq ruwachkanki?’, nispa?”, nispan (leey Isaias 45:​9-12).

6. ¿Imanasqataq yuyaymanananchik tukuy atiyniyuq unanchawaqninchikpi? (Qawaytaq dibujokunatapas).

⁶ Unay wataña Diosta servispaqa ichapas Jehova Diospiwan palabranpi hapipakunamantaqa kikinchikpa piensasqanchikkunallapi hapipakuyta qallaykuchwan (Job 37:​23, 24). Chay mana pasaruwananchikpaqmi tiempochakunanchik unanchawaqninchik Dios tukuy atiyniyuq hinaspa yachayniyuq kasqanpi yuyaymananapaq (Is. 40:22; 55:​8, 9). Chaypi yuyaymanaymi yanapawasun hinalla humilde kanapaq hinaspa Diospa piensasqankunaqa ñuqanchikpamanta aswan allin kasqanmanta mana iskayrayanapaq.

7. ¿Imatam Raela ruwarqa punta apaqkunapa nisqanta kasukunanpaq?

⁷ Eslovenia nacionmanta iñiqmasinchik Raelam yuyaymanarqa Jehova Dios tukuy ima unanchaq kasqanpi. Chaymi yanaparqa Diospa llaqtanpi punta apaqkunapa tantiasqankuwan mana hukmanyarunanpaq. Paymi willakun: “Punta apaqkunapa tantiasqankutaqa wakinpim mana kasukuyta munaqchu kani. 2023 watapaq Diospa llaqtanpi punta apaqkunapa 8 willakuyninpim nirqa munaspankuqa qarikuna barbayuq kanankumanta. Chay videota qawaruptiypas huñunakuypi yachachimuq iñiqmasinchikta barbayuqta rikurusqaymi hukman rikchakuwarqa. Chaymi Diosta mañakurqani kasukuq kanaypaq”, nispa. Raelaqa cuentatam qukururqa tukuy imata unanchaq Diosqa serviqninkunata pimantapas aswan allinta pusawasqanchikta. Ñuqanchikpas ima cambiopas utaq ima yachachikuypas sasa kasukuy kaptinqa tiempochakuspam yuyaymanananchik unanchaqninchikqa yachayniyuq hinaspa atiyniyuq kasqanpi (Rom. 11:​33-36).

¿IMANASQATAQ MANA ALLINKUNA KANANTA DIOS SAQIN?

8. ¿Imanasqataq mana allinkuna kananta Dios saqisqanmanta yachayninchikqa ancha allin?

⁸ Mana allinkuna kananta imanasqa Dios saqisqanmanta mana yachasqankuraykum wakin runakunaqa Diospaq piñakunku, utaqmi ninku: “Manam Diosqa kanchu”, nispanku (Prov. 19:3). Ñuqanchikmi ichaqa yacharunchik Diosqa mana ñakarichiwasqanchikta, ñakarinchikqariki huchayuq kasqanchikraykum hinaspa pantaq kasqanchikraykum. Yacharunchiktaqmi Dios pacienciakuspan mana allinkunata manaraq chinkachisqanrayku achkallay-achka runakuna Diosman asuykusqankumantapas chaynataq tukuy mana allinkunata chinkachinanpaq Dios imata ruwananmanta entienderusqankutapas (2 Ped. 3:​9, 15). Mana allinkuna kananta imanasqa Dios saqisqanmanta yachaspanchikmi hawka tarikunchik, hinaspapas paymanmi astawan asuykunchik.

9. ¿Imakuna pasawaptinchiktaq yuyarinanchik mana allinkuna kananta imanasqa Dios saqisqanta?

⁹ Yachanchikmi tukuy mana allinkunata Dios chinkachinankama pacienciakunanchikta. Chaywanpas familianchik wañukuptin utaq ima mana allinpas pasawaptinchikmi nichwan: “¿Imanasqataq Diosqa mana allinkuna kananta hinallaraq saqin?”, nispa (Hab. 1:​2, 3). Chaynata piensaspaqa yuyarinanchikmi allin runakunatapas mana allinkuna pasasqanta (Sal. 34:19).a Yuyarinanchiktaqmi tukuy mana allinkunata Dios chinkachiyta munasqantapas.

10. ¿Imam Anneta yanaparqa maman wañukuptin mana llumpay llakisqalla kananpaq?

¹⁰ Mana allinkuna kananta imanasqa Dios saqisqanta yachaymi yanapawanchik sasachakuykunata hinalla aguantanapaq. Mayotte sutiyuq islapi yachaq Annem nin: “Mamay wañukuptinmi llumpay llakisqa tarikurqani. Ichaqa sapa kutim yuyarini Diosqa mana ñakarichiwasqanchikta. Payqa munan tukuy mana allinkunata chinkachiytam hinaspa wañukuq familianchikkunata kawsarichiytam. Chaykunapi yuyaymanaspaymi llakillaypi piensanaymantaqa hawkaña tarikuni”, nispa.

11. ¿Imata ruwanapaqmi yanapawanchik mana allinkuna kananta imanasqa Dios saqisqanmanta yachayninchik?

¹¹ Mana allinkuna kananta imanasqa Dios saqisqanta yachayninchikqa yanapawanchiktaqmi hinalla paymanta willakunapaqpas. Dios pacienciakuq kasqanraykum mana allin ruwasqankuta saqiqkunapas salvakuyta atinmanku. Chaymanta rimaspanmi iñiqmasinkunata Pedro nirqa: “Qawarikunaykichikmi imayna kawsasqaykichikta hinaspa imapas ruwasqaykichikta. Qamkunaqa chuyay-chuyaymi kawsakunaykichik, hinaspapas Diosta tukuy sunquwan servisqaykichiktam ruwasqaykichikwan qawachinaykichik”, nispa (2 Ped. 3:11). ‘Diosta tukuy sunquwan servispa ruwasqanchikmi’ paymanta willakuypas. Dios hinam ñuqanchikpas runamasinchikkunata kuyanchik. Munanchiktaqmi wiñaypaq kawsakunankutapas. Jehova Diosqa pacienciakuq kasqanraykum suyachkan willasqanchik runamasinchikkuna paymanta yachaspanku servinankuta. ¡Mayna kusikunapaqmi Diospa llamkaqmasin kaspa piñakuynin punchaw manaraq chayamuchkaptin achka runamasinchikkunata yanapayqa! (1 Cor. 3:9).

‘TUKUPAY PUNCHAWKUNAPIM’ KAWSACHKANCHIK

12. ¿Imamantam mana iskayrayanchikchu runakuna aswan mana allinraq kasqankuwan?

¹² Bibliam willawanchik ‘tukupay punchawkunapi’ runakuna imayna kanankumanta (2 Tim. 3:​1-5). Mana allin runakunapa chawpinpi kawsasqanchikraykum cuentata qukuchwan bibliapa nisqanqa cumplikusqanta. Chaymantapas, runakuna aswan mana allin ruwaq kasqankuwanmi manapuni iskayrayanchikchu bibliapa nisqanqa cierto kasqanta (2 Tim. 3:​13-15).

13. ¿Imatam nikunanchik tukupay punchawkunallapiña kawsasqanchikrayku? (Rimarimuytaq Lucas 12:​15-21 nisqanmantapas).

¹³ Tukupay punchawkunapi kasqanchikta yachayqa yanapawanchiktaqmi tiemponchikta mana usuchispa aswan allin kaqkunata ruwanapaqpas. Jesusmi rikchanachiywan rimarqa tiemponchikta mana usuchinamanta (leey Lucas 12:​15-21). ¿Imanasqataq chay apu runaqa mana yuyayniyuq karqa? Kikillanpaqmi tukuy imata huñukurqa, Diospaqmi ichaqa mana imayuq karqa. ¿Imanasqataq yanqakunapiqa tiemponta mana usuchinanchu karqa? Diosmi nirqa: “Kunan tutam wañuchisunki”, nispan. ¿Imatam chaymanta yachachwan? Tukupay punchawkunallapiña kawsasqanchikraykum nikunanchik: “¿Imataq aswan allin ñuqapaq? ¿Tukuy imayuq kaychu icha Diosta serviychu? ¿Imata ruwanankupaqtaq warmaykunata astawan kallpanchani?”, nispa.

14. ¿Imanasqataq tukupay punchawkunapi kasqanchikpi yuyaymanananchik? Rimarimuy iñiqmasinchik Mikimanta.

¹⁴ Tukupay punchawkunapi kawsasqanchikpi yuyaymanaspaqa allintam imapaqpas tantiakusun. Iñiqmasinchik Mikim nin: “Colegioyta tukuruspaymi animalkunamanta astawan yachayta munaspay universidadpi zoologia nisqanta estudiayta munarqani. Munarqanitaqmi precursora regular kaytapas chaynataq huklawkunaman rispa Diosmanta astawan willakuytapas. Ichaqa iñiqmasinchikkunam niwarqa: “Allinta tantiaykuy. Universidadpi estudiaspayki, ¿yaqachu atinki precursora kayta utaq huklawkunaman rispa astawan willakuyta? Yuyarichiwarqakutaqmi tukupay punchawkunapi kasqanchiktapas chaynataq kay allpa pachanchik sumaq huerta kaptin lliw animalkunamanta yachanaypaq tiempoy kananmantapas. Chayraykum tantiakururqani universidadman manaña rispay imallatañapas estudianaypaq. Chaymi yanapawarqa llamkastin precursora regular kanaypaq. Chaymantañataqmi Ecuador nacionman rirqani Diosmanta astawan willakunaypaq”, nispa. Kunanqa chay nacionpim Mikiqa qusanpiwan congregacionkunata watukunku.

15. ¿Kamaschu Santiagoqa iñikurqa? ¿Imatam chaymanta yachachwan? (Qawaytaq dibujokunatapas).

¹⁵ Manam hukmanyananchikchu willasqanchikta runakuna mana uyariwaptinchikqa. Tiempopa risqanman hinam cambianmanku. Rimarisun Jesuspa wawqin Santiagomanta. Paywan kuska wiñaspanpas chaynataq Diospa akllasqan kasqanta hinaspa allin yachachiq kasqanta yachaspanpas unay watam Jesuspiqa mana iñikurqachu. Iñikurqaqa Jesus kawsariramuptinñam. Hinaspanmi Jesusta qatipakuspan tukuy sunqunwan Diosta servirqa (Juan 7:5; Gal. 2:9).b ¿Imatam yachachwan Santiagomanta? Diosmanta willasqanchikta familianchikkuna utaq pipas mana uyariyta munaptinqa manam piensanchikchu mana haykapipas cambianankutaqa. Aswanqa tukupay punchawkunapi kawsasqanchikraykum hinalla mana amispa willananchik. Ichapas kunan nisqanchikwan utaq llumpa-llumpay ñakariy punchawkuna qallaykuptin cambianman.c

DIOSTAYÁ AGRADECEKUSUN YACHASQANCHIKKUNATA YUYARICHIWASQANCHIKMANTA

16. ¿Imaynatam yanapawarqanchik Jehova Diospa yuyarichiwasqanchik yachachikuykuna? (Qawaytaq “Hukkunatayá yanapasun” niqtapas).

¹⁶ Huñunakuypi, videokunapi hinaspa internetpi wakin yachachikuykunaqa Diosta mana serviqkunapaqmi ruwasqa kachkan. Chaywanpas chay yachachikuykunaqa llapanchiktam yanapawanchik. Tukuy chaykunawanmi Diosqa yuyariykachiwaspanchik yanapawanchik payta astawan kuyanapaq, palabranmanta mana iskayrayanapaq hinaspa runamasinchikkunaman bibliamanta allinta yachachinapaq (Sal. 19:7).

17. ¿Imakuna kaptintaq qallariypi bibliamanta yachasqanchikkunata yuyariy yanapawachwan?

¹⁷ Unay wataña Diosta serviqkunaqa anchatam kusikunchik bibliamanta ima yachasqanchiktapas manaña ñawpaqta hina entiendesqanchikmanta punta apaqkuna niwaptinchikqa. Anchatataqmi kusikunchik qallariypi bibliamanta yachasqanchikkunamantapas. Kaypi yachamusqanchikman hinam chaykunaqa hinalla yanapawanchik. Tukuy imata unanchaqqa Jehova Dios kasqanta yuyariymi yanapawanchik humilde kanapaq hinaspa punta apaqkunapa tantiasqankuta kasukunapaq. Paykunawanmá Diosqa yanapawanchik. Tukuy mana allinkuna kananta imanasqa Dios saqisqanmanta yuyariyñataqmi yanapawanchik familianchik utaq ñuqanchik ima sasachakuypi kaspapas pacienciawan aguantanapaq. Tukupay punchawkunapi kawsasqanchikta yuyariyñataqmi yanapawanchik tiemponchikta mana usuchinapaq. Chaynaqa, hinallayá Diospa yachachiwasqanchikkunata yuyarisun, chaynapi imapaqpas allinta tantiakuspa Diosman sunqu kanapaq.