Amayá iskayrayaychu Dios pampachasusqaykimantaqa

1, 2. ¿Imatam Dios ruwan huchanchikmanta wanakuruptinchik? ¿Imaynam tarikunchik chayta yachaspanchik? (Qawaytaq dibujotapas).

KAMACHIQ Davidmi ñawpaqta mana allinkuna ruwasqanmanta llumpay hukmanyasqa tarikurqa (Sal. 40:12; 51:​3, titulo). Ichaqa sunqumanta wanakuptinmi Dios pampachaykurqa (2 Sam. 12:13). Pampachasqanmanta cuentata qukuruspanmi Davidqa kusisqaña hinaspa hawkaña karqa (Sal. 32:1).

² Ñuqanchikpas kusisqa hinaspa hawkam tarikunchik huchanchikta Dios pampachaykuwasqanchikmanta yachaspanchikqa. Hatun huchataña ruwaruspanchikpas sunqumanta wanakuruptinchikqa, huchanchikmanta willakuruptinchikqa hinaspa kaqmanta mana wichiykunapaq tukuyta ruwaptinchikqa Diosqa pampachawanchikmi (Prov. 28:13; Hech. 26:20; 1 Juan 1:9). Anchatataqmi kusikunchik huchanchikmanta pampachaykuwaspanchik qalaypaq qunqasqanmanta yachaspanchikpas. Pampachaykuwaptinchikmi paypaqqa kanchik mana haykapipas huchata ruwachkachwanpas hina (Ezeq. 33:16).

3, 4. ¿Imamantam Yeniferqa mana segurochu karqa? ¿Imamantam kay yachachikuypi yachasun?

³ Wakinpiqa Dios pampachaykuwasqanchiktam mana creechwanchu. Chaynam pasarqa Yeniferwan. Paytam taksachanmanta tayta-maman yachachirqa Jehova Diosmanta. Ichaqa wiñasqanman hinam pakallapi mana allinkunata ruwayta qallaykurqa. Chaymanta watakuna pasaytam Diosman kutirikuspan bautizakururqa. Paymi willakun: “Pakallapim hukwan-hukwan kakuq kani, sinkakuqmi kani, piña-piñallañam kaq kani, hinaspapas qullqi maskayllamanmi qukururqani. Chaymantam ichaqa wanakuruspay chay mana allin ruwaykunata saqirurqani. Yacharqanim Jesus wañukusqanrayku huchanchikkunata Jehova Dios pampachawasqanchikta. Chaywanpas manam segurochu karqani qalayta pampachawasqanmantaqa”, nispa.

⁴ ¿Qampas iskayrayankichu ñawpaqta mana allin ruwasqaykimanta Dios pampachasusqaykimanta? Payqa munan llakipayakuq kasqanrayku pampachawasqanchikmanta David hina seguro kananchiktam. Chaymi kay yachachikuypi yachasun huchanchikta Dios pampachawasqanchikmanta seguro kayninchik imanasqa ancha allin kasqanmanta hinaspa seguro kanapaq imata ruwanamanta.

¿IMANASQAM DIOS PAMPACHAWASQANCHIKMANTA SEGURO KANANCHIK?

5. ¿Ima creenanchiktam satanasqa munan? Rimarimuy Corintopi iñiqmanta.

⁵ Satanaspa huknin tuqllanman mana wichiykunapaqmi. Payqa tukuytam ruwanqa Dios serviyta saqirunanchikpaq. Chaypaqmi ñawpaqta hucha ruwasqanchikmanta Dios mana pampachasqanchikta creenata munan. Piensarisun Corinto congregacionpi huknin iñiq huchapakuruspan hurqusqa kasqanpi (1 Cor. 5:​1, 5, 13). Chay runa wanakuruptinpas satanasqa manam munarqachu iñiqkuna pampachaykunantaqa hinaspa congregacionman kutiykunantaqa. Iñiqkuna mana pampachaptinqa chay runam piensanman karqa mana haykapipas Dios pampachananta. Hinaspapas “llumpay llakipa intusqan” kasqanraykum Dios serviytaqa saqirunman karqa. Kunanpas satanasqa hinallam munachkan hucha ruwasqanchikmanta Dios mana pampachawasqanchikta creespa serviyta saqirunanchikta. Ichaqa tuqllankunata riqsisqanchikraykum mana wichisunchu (2 Cor. 2:​5-11).

6. ¿Imatam ruwananchik hucha ruwasqanchikmanta manaña ñakakunapaq?

⁶ Jehova Diosta kaqmanta kusisqa servinapaqmi. Ima huchatapas ruwaruspanchikqa ñakakunchikmi (Sal. 51:17). Chaymi yanapawanchik cambiaspa allin kaqtaña ruwananchikpaq (2 Cor. 7:​10, 11). Ichaqa unayña wanakuruspanchikpas hinalla ñakakuspanchikqa llumpayta hukmanyaruspanchikmi Dios serviytapas saqiruchwan. Chaymi Dios pampachawasqanchikmanta seguro kananchik chay ruwasqanchikmanta manaña ñakakunapaq hinaspa manaña yuyarayanapaq. Imapas ruwasqanchikwan Diosta kusichisqanchikta yachaspam hinalla kusisqa servisun. Chayna servinanchiktam payqa munan (Col. 1:​10, 11; 2 Tim. 1:3). Kunanñataqyá yachaykusun Dios pampachawasqanchikmanta seguro kanapaq imakunata ruwanamanta.

¿IMAKUNATAM RUWACHWAN?

7, 8. ¿Imatam Jehova Dios kikinmanta nirqa Exodo 34:​6, 7 nisqanpi? ¿Imamantam mana iskayrayachwanchu?

⁷ Kikinmanta Diospa ima nisqanpim yuyaymanachwan. Moisesmi huk kutipi Jehova Diosmanta astawan yachayta munarqa, chaymi Diosqa imayna kasqanmanta nirqa (leey Exodo 34:​6, 7).a Diosqa atiyniyuq hinaspa yachayniyuq kasqanta ninanmantaqa ‘llakipayarikuq’ hinaspa ‘kuyapayakuq’ kasqantam nirqa. Sunqumanta wanakuq serviqninta mana pampachaspanmi ichaqa mana llakipayarikuq hinaspa mana kuyapayakuq kanman.

⁸ Llakipayarikuq kasqanta Diospa nisqanmantaqa manapunim iskayrayachwanchu. Payqariki manam haykapipas llullakunchu (Sal. 31:5). Chaynaqa, Dios pampachasusqaykimanta iskayrayaspaykiqa kaynatam nikuwaq: “Imaynam mana iskayrayanichu kuyapayakuq Dios lliw wanakuqkunata pampachasqanmanta, chaynam mana iskayrayanaychu ñuqatapas pampachawasqanmantaqa”, nispa.

9. Salmos 32:5 nisqanman hinaqa, ¿imaynam tarikunchik qalaypaqta Dios pampachaykuwasqanchikrayku?

⁹ Dios pampachakuq kasqanmanta bibliapa ima nisqanpim yuyaymanachwan. Davidmi Jehova Diosta nirqa: ‘Qanmi pantasqaykunatawan huchaykunata pampachaykullawarqanki’, nispan (leey Salmos 32:5). Hebreo idiomapiqa kay versiculopi “pampachay” ninanqa “huqariy” utaq “apay” ninanmi. Chaynaqa, Davidta Jehova Dios pampachasqanqa karqa llasaq qipinta huqarispan apachkanmanpas hinam. Chaymi Davidqa kaqmanta kusisqaña hinaspa hawkaña karqa (Sal. 32:​2-4). Ñuqanchikpas hucha ruwasqanchikmanta sunqumanta wanakuspaqa David hinam hawkaña tarikuchwan. Manam llasaq qipita qipichkaq hinachu chay ruwasqanchikta yuyarayananchik, aswanqa qalaypaqta Dios pampachaykuwasqanchikraykum kusisqaña kananchik.

10, 11. ¿Imatam Diosmanta yachachiwanchik Salmos 86:5?

¹⁰ (Leey Salmos 86:5). Davidmi nirqa Dios ‘pampachakuykuq’ kasqanta. Chaywanmi nichkarqa ima huchata ruwaruptinchikpas mana chaylla piñakuq hinaspa pampachaykunanpaq listo kasqanta. ¿Imanasqam wanakuqkunata pampachaykunanpaq listo kachkan? Hina chay versiculopim nin: “Qayakamusuqnikikunataqa qamqa imaña kaptinpas hinallam kuyanki”, nispan. Pasaq yachachikuypi yachasqanchikman hinam Diosqa serviqninkunataqa anchata kuyan. Hinallataqmi imaña kaptinpas wiñaypaq kuyanqa. Chayraykum sunqumanta wanakuqkunataqa chaylla pampachaykun (Is. 55:7). Dios pampachasusqaykimanta mana seguro kaspaykiqa kaynatam nikuwaq: “Lliw wanakuqkunata Dios pampachasqanmantaqa seguro kaspayqa manapunim iskayrayaymanchu ñuqatapas pampachaykuwasqanmantaqa”, nispa.

¹¹ Bibliapiqa niwanchiktaqmi Jehova Diosqa imamanta ruwasqa kasqanchikta hinaspa pantaq kasqanchikta allinta yachasqanmantapas. Chaymanta yachayqa sunqunchiktam tiyaykachin (Sal. 139:​1, 2). Chaypaqyá qatiqninpi yachaykusun Davidpa ima nisqanmanta hinaspa chay nisqan imayna yanapawasqanchikmanta.

¿IMATAM ÑUQANCHIKMANTA DIOS YUYAN?

12, 13. Salmos 103:14 nisqanman hinaqa, ¿imatam Diosqa yuyan? ¿Imatam chayrayku ruwayta munan?

¹² (Leey Salmos 103:14). Davidmi nirqa Jehova Diosqa “ñutu allpallamanta ruwasqa kasqanchikta” yuyasqanta. Chaywanmi yachanchik Diosqa pantaq kasqanchikta yachasqanrayku wanakuptinchikqa pampachawananchikpaq listo kasqanta. Davidpa nisqanmantayá astawan yachaykusun.

¹³ Davidmi nirqa Diosqa “imamanta ruwasqa kasqanchikta” sumaqta yachasqanta. Paymi Adanta ruwarqa “ñutu allpamanta”, chaymi yacharqa mana pantaq kaspanpas runakunaqa mikuyta, puñuyta hinaspa samatyayta necesitasqanta (Gen. 2:7). Adanwan Eva huchallikurusqankumantam ichaqa Diosqa yachantaq pantaq hinaspa mana allinkunata ruway munaq kasqanchiktapas. Salmos 103:14 nisqanpiqa Davidqa nirqa manam pantaq kasqanchikta Dios yachasqallantachu, aswanqa yuyasqantawanmi. Chaywanmi nichkarqa allinninchikpaq kaqta ruway munasqanta. Diosqa yachanmi huchayuq kasqanchikrayku wakinpi pantananchikta. Chayraykum wanakuptinchikqa llakipayariykuspa pampachaykuyta munawanchik (Sal. 78:​38, 39).

14. (1) ¿Imatawanmi David nirqa Salmos 103:12 nisqanpi Dios imayna pampachawasqanchikmanta? (2) ¿Imatam yachanchik Davidta Dios imayna pampachasqanmanta? (Qaway “Jehova Dios pampachawaspanchikqa manam yuyanñachu” niqta).

¹⁴ ¿Imaraqtaq yanapawachwan huchanchikta Dios pampachawasqanchikmanta seguro kanapaq? Salmos 103 capitulopi Davidpa huknin nisqanmi (leey Salmos 103:12). Paymi nirqa intipa qispimunanmanta intipa siqaykunankama huchanchikkunata ñuqanchikmanta karuncharusqanta. Intipa qispimunanmanta intipa siqaykunankama mayna karu kasqantaqa manam yachayta atichwanchu. Huk libropa nisqanman hinam chayna nisqanwan Davidqa nichkarqa huchanchikkunata Dios qalaypaq chinkachisqanta. Chayqa kanman imapapas asnaynin qalaypaq chinkarusqan hinam. Wakinpiqa mikuypa asnaychallanwanpas utaq imachallawanpas yuyariruchwanmi ñawpaqta imapas pasasqanchikta. Huchanchikta Dios pampachawaptinchikmi ichaqa manaña pipas utaq imapas yuyarichinmanñachu chayta yuyarispan castigawananchikpaqqa (Ezeq. 18:​21, 22; Hech. 3:19).

15. ¿Imatam ruwananchik ñawpaqta hucha ruwasqanchikmanta hinalla ñakakuspaqa?

¹⁵ Ñawpaqta hucha ruwasqanchikmanta hinalla ñakakuptinchikqa Salmos 103 capitulopa nisqanpi yuyaymanaymi yanapawasun Dios pampachawasqanchikmanta seguro kanapaq. Chaymi nikuchwan: “Pantaq kasqayta Dios yuyachkaptinqa hinaspa sunqumanta wanakuptiy pampachawananpaq listo kachkaptinqa, ¿manachu ñuqapas chayta yuyayman? Chaymantapas, Jehova Dios pampachaykuwaspan huchaykunata manaña yuyachkaptinqa hinaspa manaña yuyarichiwachkaptinqa, ¿manachu ñuqapas qunqayman?”, nispa. Hinaptinqa, Diosqa manañamá yuyanchu huchanchikkunataqa, ñuqanchikpas manañam yuyananchikchu (Sal. 130:3). Dios pampachaykuwasqanchikmanta seguro kaspaqa manaña ñakakuspam hinalla kusisqa servisun.

16. Carrota manejaqwan rikchanachispa willarimuy ñawpaqta pantasqanchikpi umayuqlla kay imanasqa mana allin kasqanmanta. (Qawaytaq dibujotapas).

¹⁶ Piensarisun carrota manejaq runapi. Wakinpiqa allinmi kanman qipata qawananpaq espejonta qawayninqa. Ichaqa chay espejota imay horapas qawaptinqa ima accidentepas pasarunmanmi. Allin rinanpaqqa ñawpaqninta qawaspanmi manejanan. Yaqa chaynam ñawpaqpi pantasqanchikta yuyariypas wakinpiqa allin kanman mana kaqmanta chayman wichiykunapaq. Chayllapiña umayuq kaspam ichaqa manaña tukuy sunqunchikwanchu nitaq kusisqañachu Diostaqa servisun. Chayna kanamantaqa hamuq tiempopi Diospa prometewasqanchikkunapi piensaspayá payta kusichinapaq tukuyta ruwasun. Diosña kay pachata kamachiptinqa tukuy mana allin ruwaykunaqa “qunqasqañam kanqa” (Is. 65:17; Prov. 4:25).

HINALLAYÁ YUYARISUN DIOS KUYAWASQANCHIKTAWAN PAMPACHAWASQANCHIKTA

17. ¿Imanasqam creenanchik Dios kuyawasqanchikta hinaspa pampachawasqanchikta?

¹⁷ Llapallanchikmi yuyarinanchik chaynataq creenanchik Dios anchata kuyawasqanchikta chaynataq pampachaykuwananchikpaq listo kasqanta (1 Juan 3:19). ¿Imanasqa? Satanasqa tukuyta ruwanqa Jehova Dios mana kuyawasqanchikta hinaspa mana pampachawasqanchikta creenapaq. Chaytaqa ruwanqa Dios serviyta saqirunanchikraykum. Pisi tiempoyuqllaña kasqanta yachasqanraykum chaypaqqa astawanraq tukuyta ruwanqa (Apoc. 12:12). Ñuqanchikmi ichaqa satanasta qipanchaspa hinalla tukuy sunquwan Diosta servinanchik.

18. ¿Imakunatam ruwawaq Dios kuyasusqaykimanta hinaspa pampachasusqaykimanta seguro kanaykipaq?

¹⁸ Pasaq yachachikuypim yacharqanchik Jehova Dios kuyawasqanchikmanta seguro kanapaq imakunata ruwanamanta. Kunanñataqmi yacharunchik Dios pampachawasqanchikmanta seguro kanapaq imakunata ruwanamanta. Chaynaqa, kikinmanta Diospa ima nisqanpiyá chaynataq pampachakuq kasqanmanta bibliapa ima nisqanpiyá yuyaymanay. Amataqyá qunqaychu pantaq kasqaykita allinta yachasqantapas chaynataq llakipayasusqaykitapas. Yuyariytaqyá pitapas pampachaspanqa hucha ruwasqanta qalaypaq qunqasqantapas. Hinaspaykiqa David hinam mana iskayrayaspa ninki: “Gracias Jehova Dioslláy ‘pantasqaykunatawan huchaykunata’ pampachaykullawasqaykimanta”, nispa (Sal. 32:5).