‘ Diospa atiyninpa yanapakuyninwanyá huk sunqulla kasun’
APOSTOL PABLOM Efeso llaqtayuq iñiqmasinkunata nirqa: ‘Kuyakuywan aguantanakuychik, hawkalla kaspa hinaspa Diospa atiyninpa yanapakuyninwan huk sunqulla kanaykichikpaq anchata kallpanchakuychik’, nispan (Efes. 4:2, 3).
Pablopa nisqanman hinam atiyninwan Dios yanapawaptinchik iñiqmasinchikkunawanqa huk sunqulla kanchik. Pabloqa nirqataqmi huk sunqulla kanapaq anchata kallpanchakunamantapas. Chaypaqqa sapakamam kallpanchakunanchik iñiqmasinchikkunawan huk sunqulla kanapaq.
Pipas sumaq celularta regalaykuwaptinchikqa, ¿pitaq cuidanan mana imanakurunanpaq? Manam quwaqninchikchu. Mana cuidasqanchikrayku malograkuruptinqa manam nichwanchu regalawaqninchik culpayuq kasqantaqa.
Yaqa chaynam Jehova Dios regalawachkachwanpas hina iñiqmasinchikkunawan huk sunqulla kasqanchikqa, chaymi sapakama kallpanchakunanchik huk sunqulla kanapaq. Mayqan iñiqmasinchikwanpas mana allinta apanakuspaqa nikunanchikmi: “¿Imatam ruwachkani iñiqmasiywan allinyanakunaypaq? ¿Tukuytachu ruwachkani lliw iñiqmasiykunawan huk sunqulla kanaypaq?”, nispa.
‘HUK SUNQULLA KANAYKICHIKPAQYÁ ANCHATA KALLPANCHAKUYCHIK’
Pablopa nisqanman hinam wakinpiqa iñiqmasinchikkunawan huk sunqulla kananchikpaq anchata kallpanchakunanchik. Chayqa aswan sasam kanman mayqan iñiqmasinchikpas sientirachiwaptinchikqa. Huk sunqulla kanapaqqa, ¿sientichinakusqanchikmantaraqchu puntataqa allichana? Manam. Wakinpiqa aswan allinqa kanman imapas ruwawasqanchikta mana kaqpaqpas hapiymi utaq pampachaykuymi (Prov. 19:11; Mar. 11:25). Chaypaqmi nikuchwan: “Ima ruwawasqanmanta nispayqa, ¿huk sunqulla kanaykupaqchu kanqa icha astawanchu piñanakurusaqku?”, nispa.
Ima ruwawasqanmanta nisqayqa, ¿huk sunqulla kanaykupaqchu kanqa icha astawanchu piñanakurusaqku?
Pablom iñiqmasinkunata consejarqa: ‘Kuyakuywanyá aguantanakuychik’, nispan (Efes. 4:2). Huk libropa nisqanman hinam chaywanqa nichkarqa iñiqmasinchikkunapa pantaptinkupas kuyanamanta. Yuyarinanchikmi iñiqmasinchikkunapas ñuqanchik hina pantaq kasqankuta. Llapallanchikmi kallpanchakuchkanchik ‘musuq pachawan pachakuchkaq hina musuq runaña kanapaq’ (Efes. 4:23, 24). Chaywanpas huchayuq kasqanchikraykum imapipas pantanchik (Rom. 3:23). Chayta yuyarispaqa manam iñiqmasinchikkunapa pantasqallankutachu qawasun. Pantaruptinkupas pampachaykusunmi, chaynapi ‘huk sunqulla kanapaq’.
Sientinarachikusqanchik iñiqmasinchikwan rimaspapas utaq mana rimaspapas allinlla kaspaqa haykapipas hawkallam kasun. Efesios 4:3 nisqanpi “hawkalla kay” nisqantam Colosenses 2:19 nisqanpiqa churan “ankukuna” nispan. Imaynam ankukunapas tullukuna allin takyananpaq hukllawan, chaynam iñiqmasinchikkunawan hawka hinaspa kuyakuq kasqanchikpas yanapawanchik pantaq kaspanchikpas huk sunqulla kanapaq.
Chaymi mayqin iñiqmasinchikpas piñarachiwaptinchik, sientirachiwaptinchik utaq imatapas ruwaruwaptinchik pantasqallanta qawanamantaqa llakipayaspa pampachaykunanchik (Col. 3:12). Yaqapaschá ñuqanchikpas pantaq kasqanchikrayku pitapas sientirachirqanchik, chayta yuyarispayá tukuyta ruwasun lliw iñiqmasinchikkunawan ‘huk sunqulla kanapaq’.