Jehova Diostam agradecekuna imapas quwasqanchikmanta
JEHOVA DIOSPA tukuy ima unanchasqanta qawaspanchikmi qukuykuq kasqanmanta yachanchik (Sant. 1:17). Payqa hanaq pachapi mana yupay atina lucerokunatam unancharqa hinaspa kay pachapi tukuy imakunatapas (Sal. 65:12, 13; 147:7, 8; 148:3, 4).
Ñawpaq tiempopim Diosta yupaychaq runa takispan Diosta agradecekurqa tukuy unanchasqankunamanta. Salmo 104 capitulonpim niwanchik imaynam chay runa takispan kawsakuyninpi Diosta yupaychasqanmanta (Sal. 104:33). ¿Qampas atiwaqchu chay ruwayta?
QUKUYKUQ KAYTAM YACHACHIWANCHIK
Jehova Diosqa pay hina qukuykuq kananchiktam munan. Chayraykum apostol Pabloqa nirqa qullqillapiqa ama hapipakunamanta, aswanqa Diosllapi hapipakunapaq. Chayllam chiqap kusikuytaqa apamun. Nirqataqmi runamasinchikpaq allin kaqkunata ruwananchikpaq, qukuykuq kananchikpaq hinaspa sunqumanta kapuqninchikta quykanakunanchikpaqpas. Kaykunata ruwaspanchikqa hamuq punchawpim kusisqa kawsakusun (1 Tim. 6:17-19). Jehova Diosqa qukuykuq kananchikpaqmi yachachiwanchik.
Imanasqa qukuykuq kanamanta Corinto iñiqmasinkunaman iskay kaq cartanta qillqaspanmi Pablo nirqa: ‘Sapakamayá quchun sunqunpi tanteasqanman hina, ama llakikuspachu nitaq obligasqachu, Diosqa kuyan kusikuywan quqtam’, nispa (2 Cor. 9:7). ¿Pitataq qukuykuq kasqanchikwanqa yanapanchik? Necesitaq runakunata chaynataq kikinchiktapas. Qukuykuq kaptinchikqa Jehova Diosmi bendeciwanchik (2 Cor. 9:11-14).
Chaymantapas Pabloqa Corinto iñiqkunaman qillqaspanmi nirqa sumaq regalo quwasqanchikmanta Diosta agradecekunanchikpaq (2 Cor. 9:15). Chay sumaq regaloqa Diospa churinwan imakunapas llaqtanpaq ruwasqankunam. Ancha sumaqmi chay regaloqa.
Jehova Dioswan Jesusqa imakunatapas ruwachkankum, chaynam hamuq tiempopipas tukuyta ruwanqaku. ¿Imaynatam chaykunamanta agradecekuchwan? Chaytaqa ruwachwan Jehova Diosta runakuna riqsinankupaq tiemponchikta, kallpanchikta hinaspa kapuwaqninchikta servichikuspam. Llapanchikmi kapuqniyuq utaq mana kapuqniyuq kaspapas chay ruwaytaqa atichwan (1 Cron. 22:14; 29:3-5; Luc. 21:1-4).