¿Hinallachu bibliaqa yanapasuchkanki imayna kaynikipi?

1-3. (1) ¿Imakunawanmi sasachakunchik bautizakurusqanchik qipaman? (2) ¿Ima tapukuykunatam ruwakuchwan imayna kayninchikmanta? (Qaway kay paginapi kaq dibujota).

ACHKA watakunam Kevin^[1] sutiyuq runaqa qullqillapaq pukllaq, cigarrota pitaq, sinkakuq hinaspa drogakuq. Chaymantam Jehova Diosmanta yachaspan paypa amistadnin kaytaña munarqa, ichaqa chayta ruwananpaqqa mana allin ruwasqankunatam saqinan karqa. Chaymi payqa Jehova Diospa hinaspa palabranpa yanapakuyninwan mana allin ruwasqankunata saqirqa (Heb. 4:12).

² Kevinqa bautizakuruspanpas hinallam imayna kayninta cambiananpaq kallpanchakunan karqa, chayta ruwaspanmi payqa Diospa allin yupaychaqnin karqa (Efes. 4:31, 32). Kevinqa chayllam imamantapas piñakuruq, chayna kayninta saqiy sasa kasqantam kikin musyakurqa. Chaymi nirqa: “Manaraq bautizakuspay mana allin ruwasqaykuna saqiyqa manam llumpay sasachu karqa, ichaqa imayna kayniyta saqiymi llumpay sasa karqa”, nispa. Payqa Jehova Diosta mañakusqanrayku hinaspa bibliata allinta estudiasqanraykum tukuy chaykuna saqiyta atirqa.

³ Yaqa llapanchikmi manaraq bautizakuchkaspanchik mana allin ruwasqanchikkunata saqinanchik karqa, chaynapi Jehova Diospa munasqanman hinaña kawsananchikpaq. Ichaqa kunanpas musyakunchikmi imallapipas pantasqanchikta, chaymi chaykunata saqinanchik Jehova Diostawan Jesucristota qatipakunapaq (Efes. 5:1, 2; 1 Ped. 2:21). Ichapas musyakurqanchik pimantapas yanqakuna rimasqanchikta utaq cuento qipi kasqanchikta. Utaq wakinpiqa allin ruwayta saqirunchik runakuna imatapas niwananchikmanta manchakuspanchik. Chaykuna ruwayta saqinapaq ichapas achka watakunaña kallpanchakurqanchik, ichaqa wakinpim chay ruwaykunaman hinallaraq wichiykunchik. Chaymi kaynata tapukunanchik: “¿Imanasqam sasachakuni imayna kayniyta saqinaypaq? ¿Imatam ruwanay bibliapa nisqanman hina imayna kayniyta allinmanña tikranaypaq?”, nispa.

ATIWAQMI JEHOVA DIOS KUSICHIYTAQA

4. ¿Imanasqam mana llapanpichu Jehova Diosta kusichiyta atinchik?

⁴ Jehova Diosta kuyasqanchikraykum tukuy sunqunchikwan paytaqa kusichiyta munanchik, ichaqa pantaq runakuna kasqanchikraykum mana llapanpichu kusichiyta atinchik. Wakinpiqa apostol Pablo hinam tarikunchik, paymi nirqa: ‘Allin ruwayta munaspaypas manam atinichu, chaymi yachani allin ruwayqa sunquypi mana kasqanta’, nispa (Rom. 7:18; Sant. 3:2).

5. (1) ¿Ima ruwaykunatam saqinanchik karqa bautizakunanchikpaqqa? (2) ¿Imawanmi sasachakunchik pantaq runakuna kasqanchikrayku?

⁵ Jehova Diospa llaqtanpi manaraq kachkaspanchikqa mana allin ruwaykunatam saqinanchik karqa (1 Cor. 6:9, 10) Ichaqa kunanpas hinallam pantaq runakuna kanchik (Col. 3:9, 10). Unay wataña bautizasqa kaspanchikpas hinallaraqmi imapipas pantanchik. Tiempopa risqanman hinam mana allinkuna ruwayta munachwan utaq imayna kayninchikta atipanapaq sasachakuchwan. Yaqapaschá chayna kayninchikwanqa unay watakunatapas sasachakuchkanchik.

6, 7. (1) Pantaq runakuna kaspanchikpas, ¿imaraykum Jehova Diospa amistadnin hinalla kanchik? (2) ¿Imanasqam Jehova Diosta mañakunanchik pampachawananchikpaq?

⁶ Pantaq runakuna kaspanchikpas atichwanmi Jehova Dioswan allin amistad kaytaqa, atichwantaqmi pay yupaychaytapas. Manam haykapipas qunqananchikchu Jehova Diospa amistadnin kayta imayna qallaykusqanchikmantaqa. Paymi ñuqanchikpa allin kayninchikkunata qawaspan riqsinanchikta munarqa (Juan 6:44). Jehova Diosqa yachantaqmi pantaq runakuna kasqanchikta, chayna kaptinchikpas munarqam paypa amistadnin kananchikta.

⁷ Jehova Diosqa anchata kuyawaspanchikmi churinta kay pachaman kachamurqa, chaynapi ñuqanchikrayku wañunanpaq (Juan 3:16). Imapipas pantaruspaqa Jehova Diostam mañakunchikman pampachaykuwananchikpaq. Jesus wañukusqanraykum Jehova Dios pampachawananchikmantaqa hinaspa hinalla amistadninchik kananmantaqa mana iskayrayananchikchu (Rom. 7:24, 25; 1 Juan 2:1, 2). Jesusqa wañurqa haykam huchankumanta wanakuqkunapaqmi. Chaymi pantaq runakuna kasqanchikrayku Jehova Dios pampachawananchikpaq mañakuytaqa mana saqinanchikchu. Mana chayta ruwaspanchikqa qacha makinchikta mana mayllakuyta munaq hinam kachwan. Anchatam Jehova Diosta agradecekunchik pantaq runakuna kachkaptinchikpas amistadnin kananchikpaq tukuy ima ruwasqanmanta (leey 1 Timoteo 1:15).

8. ¿Imanasqam hinalla kallpanchakunanchik sumaq kayniyuqkuna kanapaq?

⁸ Diospa amistadnin kayta imaynanpi mana atisqanchiktaqa manam ninanchikchu. Paypa amistadnin kayta munaspaqa Jehova Diospa chaynataq churin Jesuspa imayna kasqankutam qatipakunanchik (Sal. 15:1-5). Manataqmi mana allin munapayaykunawanqa intuchikunanchikchu, chaykunataqa umanchikmantam chaylla hurqunanchik. Hayka wataña bautizasqa kaspanchikpas hinallam kallpanchakunanchik sumaq kayniyuqkuna kananchikpaq (2 Cor. 13:11).

9. ¿Imanasqam hinalla kallpanchakunanchik musuqwan pachakuchkaq hina musuq runaña kananchikpaq?

⁹ Apostol Pablom iñiqmasinkunaman kaynata qillqarqa: ‘Huchaman aysaqnikichikmanta karunchakuspayá amaña ñawpa vidaykichikpi hinañachu puriychik, chayna vidaqa pantachikuspam mana allinllata munachisunkichik. Imaynam piensasqaykichiktaqa musuqyachiychikyá, hinaspayá musuqwan pachakuchkaq hina musuq runaña kaychik Diosman rikchakunaykichikpaq, chayna runatam Diosqa unancharqa chiqaptapuni mana huchallikuq justo kananpaq’, nispa (Efes. 4:22-24). Kaywanqa nichkanmi ‘musuqwan pachakuchkaq hina musuq runaña kananchikpaq’ kallpanchakunanchikmanta. Hayka wataña Jehova Diosta yupaychaspanchikpas hinallam paypa imayna kayninkunamantaqa yachachwan hinaspapas bibliaqa yanapawachwanmi sumaq kayniyuqkuna kaspa payta astawan riqsinanchikpaq.

¿IMANASQAM SASA?

10. (1) Biblia yanapawananchikpaq, ¿imatam hinalla ruwananchik? (2) ¿Imakunatam tapukunanchik?

¹⁰ Llapallanchikmi bibliapa nisqanman hina kawsakuytaqa munanchik, ichaqa anchatam kallpanchakunanchik sumaq kayniyuqkuna kanapaq. ¿Imanasqam kallpanchakunanchik chaykunata ruwanapaq? ¿Manachu Jehova Dios yanapawanchikman mana sasachakuspalla allin kaqkunata ruwanapaq?

11-13. ¿Imanasqam Jehova Diosqa munan pantaq kasqanchikta atipanapaq kallpanchakunanchikta?

¹¹ Jehova Diospa tukuy imakuna unanchasqanta qawaspanchikqa manam iskayrayanchikchu imatapas ruwananpaq atiyniyuq kasqanmantaqa. Chaymi qawakun intita unanchasqanpi. Intiqa llumpa-llumpay atiyniyuqmi. Mana samaykuspataqmi kanchamuspan rupamun. Tumpa rupamuyllanwantaqmi kay allpapi kawsaypas kachkan (Sal. 74:16; Is. 40:26). Jehova Diosqa kay pachapi yupaychaqninkunamanpas atiynintaqa qunmi imapas kaptinqa (Is. 40:29). Ichapas wakinkuqa chayrayku tapukunku: “¿Imanasqataq Jehova Diosqa mana chayllachu yanapawan pantaq kasqayta atipanaypaq?”, nispa

¹² Jehova Diosqa kikinchik tanteakunapaqmi saqiwanchik, chaynapi payta yupaychanapaq utaq mana yupaychanapaqpas. Sichum Diosta kasukunapaq hinaspa paypa munayninta tukuy sunquwan ruwanapaq akllakuspanchikqa, qawachichkanchikmi chaykunata ruwaspaqa anchata kuyasqanchikta chaynataq kusichiy munasqanchiktapas. Satanasqa ninmi Jehova Diosqa mana allin kamachiq kasqanta, ichaqa Jehova Diosta kasukuspanchikmi qawachichkanchik kamachiwaqninchik kasqanta. Chay ruwasqanchikta chaninchasqanmantaqa manam iskayrayananchikchu (Job 2:3-5; Prov. 27:11). Pantaq runakuna kasqanchikwan mana atipachikuspaqa Jehova Diosman sunqum kachkanchik hinaspapas kamachiwaqninchik kasqantam qawachichkanchik.

¹³ Jehova Diosqa niwanchikmi paypa imayna kayninkunata qatipakunapaq anchata kallpanchakunanchikmanta (leey 2 Pedro 1:5-7; Col. 3:12). Payqa munantaqmi piensasqanchikwan hinaspa ima munasqanchikwan mana atipachikunanchikta (Rom. 8:5; 12:9). Chaynata ruwaspanchikqa kawsakuyninchikpi biblia yanapawasqanchiktam qawachisunchik, chayqa anchatam kusichiwasun.

KAWSAKUYNINCHIKPI BIBLIA YANAPAWANANCHIKPAQ SAQIKUSUN

14, 15. Jehova Diospa sumaq kayninkunata qatipakunanchikpaqqa, ¿imatam ruwachwan? (Qaway “Bibliam hinaspa Diosta mañakuymi imayna kayninkupi yanaparqa” niq yachachikuyta).

¹⁴ ¿Imatam ruwananchik Jehova Diospa sumaq kayninkunata qatipakunanchikpaq? Imakunapi astawan kallpanchakunapaq kikinchik tanteakunamantaqa, Jehova Diospa yanapakuynintam maskananchik. Romanos 12:2 nin: ‘Amayá runakunapa imaynam kunan tiempopi kawsasqallantaqa qatipakuychikchu aswanqa imam piensasqaykichiktayá allinmanña tikraychik chaynapi vidaykichik aswanraq musuqyananpaq. Chaynata kawsaspam yachankichik Diospa munasqanta, imam allin ruwayta, imam agradonpaq kasqanta hinaspa imam allinpuni kasqanta’, nispa. Chaynaqa, Jehova Diospa munayninta yachanapaqqa paypa yanapakuy quwasqanchikpim hapipakunanchik. Chaypaqqa bibliatam sapa punchaw leenanchik, chay leesqanchikpi yuyaymananchik hinaspapas Jehova Diostam mañakunanchik chuya espiritunwan yanapawananchikpaq (Luc. 11:13; Gal. 5:22, 23). Chaykunata ruwaptinchikqa Jehova Diosmi yanapawasun munayninmanta yachananchikpaq hinaspa pay hina piensananchikpaqpas. Chayraykum piensasqanchik, nisqanchik hinaspa ruwasqanchikpas Jehova Diospa munasqanman hina kanqa, ichaqa pantaq kasqanchikraykum hinalla kallpanchakunanchik mana urmarunanchikpaq (Prov. 4:23).

¹⁵ Bibliata sapa punchaw leespanchikpas bibliatam estudiananchik qillqanchikkunapa yanapakuyninwan, chaypaqmi kachkan Willakuq hinaspa ¡Rikchariy! sutiyuq qillqanchikkuna. Kay qillqakunapa achka yachachikuyninkunam Jehova Diospa imayna kayninta qatipakunapaq hinaspa pantaq kasqanchikta atipanapaq yachachiwanchik. Tarichwanmi yachachikuykunata utaq textokunata ñuqanchikta yanapawananchikpaq hina, hinaspaqa chaykunata akllaspanchikmi atisqanchikman hina wakinpi leechwan.

16. ¿Imanasqam mana hukmanyananchikchu Diospa imayna kayninkunata mana chaylla qatipakuspanchikqa?

¹⁶ Manam chayllaqa Jehova Diospa imayna kayninkunata qatipakuytaqa atichwanchu, chaymi mana hukmanyananchikchu paypa imayna kayninkunata mana chaylla qatipakuspanchikqa. Puntataqa ichapas kallpanchakunanchik kanqa bibliapa nisqanman hina ruwananchikpaq, ichaqa Jehova Dios hina piensaspanchikqa hinaspa paypa munasqanman hina ruwaspanchikqa manam sasachakusunchu imatapas allinta ruwananchikpaqqa (Sal. 37:31; Prov. 23:12; Gal. 5:16, 17).

SUMAQ SUYAKUYNINCHIKPI YUYAYMANASUN

17. Jehova Diosman sunqu kaspanchikqa, ¿ima suyakuyniyuqmi kasun?

¹⁷ Hamuq tiempopi manaña pantaq kaspanchik Jehova Diosta wiñaypaq yupaychaytam suyachkanchik. Chaypiqa manañam sasachakusunñachu pantaq runakuna kasqanchikwanqa, aswanqa mana sasachakuspam Jehova Diosta qatipakusun. Ichaqa kunanpas Jehova Dios yupaychaytaqa atichwanmi churin Jesus ñuqanchikpaq wañukusqanrayku. Pantaq runakuna kaspanchikpas atichwanmi pay kusichiytaqa bibliapa nisqanman hina kawsananchikpaq kallpanchakuspanchik.

18, 19. ¿Imam qawachiwanchik imayna kayninchikpi yanapawananchikpaq biblia atiyniyuq kasqanta?

¹⁸ Kevinqa tukuytam ruwarqa piñakuqllaña kasqanta atipananpaq. Payqa biblia leesqanpim yuyaymanarqa hinaspam kawsakuyninpipas ruwayman churarqa. Chayna kananpaqqa achka watakunam pasarqa, hinaptinmi chaymanta siervo ministerial karqa hinaspa pasaq 20 watapiñataq anciano karqa. Ichaqa kunanpas riqsikunmi pantaq kasqanta hinalla atipananpaq kallpanchakunamanta.

¹⁹ Kevin hinam ñuqanchikpas sumaq kayniyuqkuna kananchikpaq kallpanchakunanchik. Chayta ruwaspanchikqa hinallam Jehova Diosman astawan asuykusun (Sal. 25:14). Jehova Diospa munasqanman hina tukuy chaykunata ruwaptinchikqa payqa yanapawasunmi. Hinaptinqa manam iskayrayachwanchu imayna kayninchikpi Diospa palabran yanapawananchikmantaqa (Sal. 34:8).