Joseyqa chayllam Jehova Diospa nisqanta kasukuq, chayraykum allin qusa karqa. Yaqa kimsa kutipim Diosqa Joseyta kamachirqa familianta imaynata cuidananpaq, hinaptinmi Joseyqa chaylla kasukurqa paypaq sasa kaptinpas (Mat. 1:20; 2:​13-15, 19-21). Joseyqa Jehova Diosta kasukusqanraykum señoran Mariataqa allinta uywarqa. Chayraykuchá Mariaqa Joseytaqa anchata kuyarqa hinaspa astawanraq kasukurqa. Qusakuna, qamkunapas Josey hinayá bibliapa yachachikuyninkunata leeychik hinaspa qillqanchikkunata estudiaychik. Chayta ruwaspaqa familiaykichiktam allinta uywankichik. Bibliapa yachachikuyninkuna qamkunapaq sasa kaptinpas kasukuspaqa señoraykichiktam kuyachkankichik, hinaspapas casado vidaykichikpim kusisqa kankichik. Vanuatu nacionmanta 20 wataña casada iñiqmasinchikmi nin: “Qusayqa imatapas ruwananpaqqa puntatam Jehova Diospa yachachikuyninkunata sumaqta yachaykun hinaspam kasukun, chayraykum astawan kuyani. Chayna ruwasqanqa yanapawanmi imapas tantiasqankunamanta mana iskayrayanaypaq hinaspa chaylla kasukunaypaq”, nispa. w23.05 21 parr. 5

Babiloniamanta kutiq judiokunaqa Jehova Diospaq sapaqchasqa runakunañam kananku karqa (Deut. 7:6). ¿Chaywanqa nichkan Diospa munasqanman hinaña kawsakusqankutachu? Manam. Achka judiokunaqa Babiloniapiñam nacerqaku, chaymi Babilonia runakuna hinaña piensarqaku hinaspa kawsakurqakupas. Punta kutiqkunamanta achka watakuna pasaytañam Nehemias yacharurqa wakin judiokunapa churinkuqa hebreo rimayta mana yachasqankuta (Deut. 6:​6, 7; Neh. 13:​23, 24). Chaynaqa hebreo rimayta mana yachachkaspankuqa, ¡imaynamá Jehova Dios kasukuytaqa yachanmanku karqa! Hebreo rimaypimriki Diospa palabranqa qillqachisqa karqa (Esd. 10:​3, 44). Chaymi chay judiokunaqa chay mana allin ruwasqankuta saqinanku karqa. Chaytaqa mana sasachakuspachá ruwarqaku Israel nacionpiña yachasqankurayku. Chaypimriki aswan sumaqtaña Jehova Dios yupaychayta qallaykurqaku (Neh. 8:​8, 9). w23.05 15 parrs. 6-7

Sasachakuy tiempopi kawsasqanchikraykum wakinpiqa ganasniyuq kachkaptinchikpas ‘qunqayllamanta imapas pasarunman’. Hinaptinqa manañam tiempo haypawachwanchu tantiasqanchikman hina imatapas ruwanapaq (Ecl. 9:11). Ima sasachakuypas rikuriruptinqa hukmanyasqa kasqanchikraykum mana kallpayuqña rikuriruchwan (Prov. 24:10). Wakinpiqa pantaruchwanmi, chaymi ruway munasqanchiktaqa mana chayllachu ruwayta atichwan (Rom. 7:23). Utaqmi wakinpiqa llumpay pisipasqapas tarikuchwan (Mat. 26:43). Chayna tarikuptinchikqa, ¿imam yanapawachwan hinalla kallpanchakunapaq? Tantiasqanchikta ruwanapaq imaña harkawaptinchikpas hinallayá kallpanchakusun. Bibliapa nisqanman hinam sasachakuykunaqa kanqa. Chaywanpas atisunmi imapas tantiakusqanchikta ruwaytaqa. Arí, ima sasachakuyña kaptinpas hinalla kallpanchakuspaqa Jehova Dios ancha kuyasqanchiktam qawachinchik. Jehova Diosqariki anchatam kusikun paypaq kaqta hinalla ruwananchikpaq kallpanchakuptinchikqa. w23.05 30 parrs. 14-15