Jesuspa kawsarimusqanqa wiñay kawsay qokuqmi

JESUSPA kawsarimusqanqa manam ñoqanchikpaqqa ñawpa tiempopi imapas yanqapaq pasakusqan hinallachu. Apostol Pablom chaymanta nirqa: “Cheqaptam Cristoqa kawsarimurqa, payqa wañuqkunamanta punta kawsarimuqmi. Imaynam wañuy kay pachaman yaykumurqa huk runantakamalla chaynataqmi kawsarimuypas hamurqa huk runantakamalla. Imaynam Adanpa huchallikusqanwan llapallan runa wañunchik, chaynallataqmi Cristopi iñiqkunapas llapallanchik kawsarimusunchik”, nispa (1 Corintios 15:20-22).

Jesusqa 33 watapim nisan killapi 16 punchawpi kawsarimurqa. Chay punchawmi judiokunaqa punta cosechasqankuta Jehova Diosman Jerusalen templopi qoqku. Jesusta “punta” kawsarimuq nispanqa, nichkarqataqmi achka runakuna kawsarimunankumantapas.

Jesuspa kawsarimusqanwan ima ruway atikunanmantam Pablo nirqa: “Imaynam Adanpa huchallikusqanwan llapallan runa wañunchik, chaynallataqmi Cristopi iñiqkunapas llapallanchik kawsarimusunchik”, nispa. Adanmanta huchata chaskisqanchikraykum llapanchik wañunchik. Ichaqa Jesusmi mana huchayoq cuerponta rantinchikpi qospan, huchamantawan wañuymanta librawarqanchik. Romanos 6:23 nisqanpim Pablo nin: “Huchallikuypa pagonqa wañuymi. Diospa qowasqanchikmi ichaqa Señorninchik Cristo Jesuswan kuska wiñaypaq kawsakuy”, nispa.

Kikin Jesusmi nirqa wañusqanwan kawsarimusqan imanasqa allinninchikpaq kasqanmanta. Kikinmanta rimaspanmi nirqa: “[Kawsarichisqa kaptin] payman iñiqqa wiñaypaqña kawsananpaq. Diosqa ancha-anchatam kuyarqa runakunata, chaymi sapallan Churinta qomurqa pipas paypi iñiqqa manaña puchukaspa wiñaypaqña kawsananpaq”, nispa (Juan 3:14-16).

Piensariy: ¡Wiñay kawsaypiqa manañamá kanqachu nanaypas nitaq ñakariypas! (Apocalipsis 21:3, 4.) ¡Ima sumaqmi chayqa kanqa! Huk estudioso runam nirqa: “Panteonkunam yuyarichiwanchik pisi tiempollapaq kawsasqanchikta, kawsarimuyñataqmi yuyarichiwanchik pisi tiempollapaq wañuy kasqanta”, nispa. Manamá iskayrayachwanchu Jesuspa kawsarimusqan wiñay kawsay qokuq kasqanmantaqa.