58 YACHACHIKUY
Amapuni jayk’aqpas Jehová Diostaqa saqesunchu
Jesusta qatikuqkunaqa manapunin munasunmanchu pipas ni imapas Jehová Diosmanta t’aqawananchistaqa. Maytachá qanqa munanki pay sonqolla kayta, payllata tukuy tiempo serviytapas. Sonqoykita qhawaykuspaqa maytachá Diosninchispas kusikun (leey 1 Crónicas 28:9). Mayninpin ichaqa imaymana paymanta t’aqayta munawasunman. ¿Imakunan chaykuna kanman? ¿Imaynatan chaykunata atipawaq? Chaytan kaypi yachasun.
1. ¿Jujkunaq ima ruwasqanmi Jehová Diosmanta karunchawasunman?
Juj runakunan Jehová Diosmanta t’aqayta munawashanchis. ¿Pikunan paykuna kankuman? Wakinqa kanku kikillankumanta Diospa llaqtanta saqepuqkunan, paykunan llullakuspa imaymanata Diospa llaqtan contra rimanku; iñiypi chiriyananchistan munanku. Paykunatan nikun Diosmanta t’aqakuspa pay contra jatariqkuna nispa. Juj religionkunapi wakin umallikunapas imaymana cuentokunatan Diospa llaqtan contra rimanku, paykunaqa chayllaraq iñishaqkunatan Diosmanta karunchayta munanku. Manapunin chay runakunawanqa tapunakunanchischu ni uyarinanchispaschu. Manan ima qelqa ruwasqankutapas, internetpi ima churasqankutapas, ni videokuna ruwasqankutapas qhawananchischu. Chaychá Jesusqa chhayna runakunamanta nirqan: “Jina kachunku, paykunaqa ñausa umallikunan kanku. Juj ñausachus juj ñausallatataq pusanman chayqa, iskayninkun t’oqoman urmaykunqaku”, nispa (Mateo 15:14).
2. ¿Ima ruwaykunan Diosmanta karunchawasunman?
Jehová Diosta munakusqanchisraykun tukuy imapi t’aqakunanchis pantasqa religionmantaqa. Manan llank’ananchispas ni ima ruwasqanchispas pantasqa religionwan jujllachasqaqa kananchu. Jehová Diospunin niwanchis: “Lloqsipuychis chaymanta”, nispa, arí llapa imapin karunchakunanchis chay Jatun Babiloniamantaqa (Apocalipsis 18:2, 4).
ASTAWAN YACHASUNCHIS
Kunanqa yachasun imas yanapawasuman Jehová Diosmanta ama t’aqakunanchispaq chayta, imaynas Jatun Babiloniamanta karunchasqa kaspaqa Dios sonqo kasqanchista rikuchishasunman chaytawan.
3. Pantasqata yachachiqkunamanta cuidakusun
¿Imatan ruwasunman Diospa llaqtanmanta mana allin rimayta uyarispa? Leeychis Proverbios 14:15 textota, jinaspa jamuq tapuyman jina parlariychis:
¿Imaraykun allin yuyayniyoq kananchis, manataq runaq llapa rimasqantachu creenanchispacha?
Leeychis 2 Juan 9-11 textota, jinaspa jamuq tapuykunaman jina parlariychis:
¿Rimananchischu Diosmanta t’aqakuspa pay contra rimaqkunawan?
Manaña chay runakunawan rimasunmanchu ni juñukusunmanchu chaypas, ¿iman pasanman imachus rimasqankuta uyariqtinchis?
Jehová Diospa contranpi llaqtan contrapi ima mana allin rimaytapas uyarishasunman chayri, ¿imaynatan Jehová Dios chayta qhawarinman?
4. Amapuni pakasunchu mayqen iñiqmasiq juchantapas
¿Imatan ruwananchis juj iñiqmasiq juchapakusqanta yachaspa? Israel llaqtaman Jehová Diospa juj kamachikuy qosqanmi yanapawasun imatachus ruwananchispaq. Leeychis Levítico 5:1 textota.
Chay textopi nisqan jina, pi iñiqmasiq juchapakusqantapas yachasunman chayqa, umalliqkunamanmi chayta willananchis. Ichaqa manaraq chayta ruwashaspan ñaupaqta chay iñiqmasita ninanchis imachus ruwasqanta willakunanpaq, chhaynapin munakusqanchista rikuchisun. Manapunichus pay willakunqa chayqa Diosta munakusqanchisraykun noqanchis chayta umalliqkunaman willananchis.
¿Imanaqtinmi nisunman “chayta ruwaspaqa Jehová Dios munakusqanchistan pay sonqo kasqanchistan rikuchishanchis” nispa?
¿Imanaqtinmi nisunman “chayta ruwaspaqa juchallikuq iñiqmasi munakusqanchistan rikuchishanchis” nispa?
¿Imanaqtinmi nisunman “chayta ruwaspaqa iñiq t’aqapi llapa iñiqmasikuna munakusqanchistan rikuchishanchis” nispa?
Pi iñiqmasipas sasachakuypi tarikun chayqa, yanapariy.
5. Jatun Babiloniamanta karunchakusun
Leeychis Lucas 4:8; Apocalipsis 18:4, 5 textokunata, jinaspa jamuq tapuykunaman jina parlariychis:
¿Kashanmanraqchu sutiyki pantasqa religionpa ima listanpipas?
¿Yanapashankiraqchu pantasqa religionwan tupaq ima organizaciontapas?
¿Ima llank’asqaykiwanpas yanapashankiraqchu pantasqa religionta?
¿Imallapipas t’aqakunayki kashanmanraqchu pantasqa religionmanta?
Sichus mayqen tapuymanpas “arí” nirqanki chayqa, ¿imatan ruwawaq?
Allinta piensaykuspan imachus ruwanaykita ruwanayki, chayqa concienciaykiq thaj kananpaq jinan kanan, sut’itan rikuchinayki Jehová Diospaq junt’aq sonqo kasqaykita.
Pantasqa religionwan jujllachasqa organizacionmanta pipas yanapayta mañakusunkiman chayri, ¿imatan ruwawaq?
WAKIN RUNAKUNAN NINKU: “Manataq yachaymanchu imatachus Diosmanta t’aqakuq runakuna rimashanku chayta chayqa, ¿imaynatataq Bibliaq nisqantari paykunaman sut’inchasaq?”, nispa.
¿Allinchu kanman chhayna piensay? ¿Imarayku?
IMATAN YACHAMURQANCHIS
Jehová Diospaq junt’aq sonqo kashanallanchispaqqa manan juñukunanchischu mana allin amigokunawanqa.
Yuyarisun
¿Imanaqtinmi mana uyarinanchischu Diosmanta t’aqakuq runakunaq rimasqanta?
Sichus yacharusunman juj iñiqmasinchispa juchallikusqanta chayri ¿imatan ruwasunman?
¿Imatan ruwananchis pantasqa religionmanta tukuy imapi t’aqakunanchispaq?
ASTAWAN YACHANAYKIPAQ
¿Imatan ruwawaq Jehová Diospa testigonkunamanta yanqa willakuykunata ch’eqerichiqtinku? Chaypaq leey kay qelqata.
“Manan imatapas creenanchispachachu” (Qhawaq, 2018 watapi agosto killa)
¿Imaynapin yachawaq ima organizacionpas, ima ruwaypas Jatun Babiloniawan jujllachasqachus kashan manachus chayta? Chaymantan rimashan kay qelqapi.
“Tukukuy p’unchaykunapi Diosta astawan servisun” (Qhawaq, 2019 octubre killa 16-18 parrafokuna)
¿Imatan Diospa wakin enemigonkuna ruwanku iñiyninchista chiriyachinankupaq? Chaypaq qhaway kay videota.
“Erqechaymantapachan Diosta maskharqani” nisqa willakuypi leey imaynatas sintoísta religionpi participaq sacerdote pantasqa religionta saqepurqan chayta.
“Bibliaq yanapayninwan cambianku” (Qhawaq, 2011 watapi 1 julio)