Umalliq T’aqaq cartan

Ancha munasqa wayqeykuna panaykuna:

Juj kutinmi Jesusqa Esmirna iñiq t’aqapi iñiqkunata nirqan: “Imaymanakunapin ñak’arinayki kanqa, aman chaytaqa manchakunkichu”, nispa (Apo. 2:10). Noqanchistapas Jehová Diosqa chhaynatan niwashanchis. ¿Imarayku? “Señorpa p’unchayninpi” kausasqanchisrayku (Apo. 1:10). Arí, yachasqanchis jina “manchakuy sinchi sasa tiempokunapin” kausashanchis, imaymana sasachakuykunapin tarikushanchis (2 Tim. 3:​1-5). Chhaynapiña tarikushanchis chaypas entero pachantinpi Jehová Diosta serviqkunaqa mana manchakuspan tukuy chaykunata aguantashanchis.

¿Imatan ruwashanallanchis Jehová Diosta tukuy sonqowan servishanallanchispaq? Chaypaqqa mana manchakuq valienten kananchis, “noqanchisqa manan qhepaman kutipuspa wañuyman rishaq t’aqamantachu kanchis” (Heb. 10:39). Yaqapaschá Jehová Diosta servisqanchisrayku wakin runakunaqa cheqnikuwasunchis, qatikachawasunchis ima. Chayraykun mana manchakuq valiente kananchis. Sichus chhayna kananchispaq kallpachakusunchis chayqa, imachus ruwasqanchiswanmi Jehová Diospa sonqonta kusichisunchis. Chaymantapas kallpachakunanchismi Diospa kamachikuyninkunatapas kasukunanchispaq. ¿Iman yanapawasunman mana manchakuq valiente kananchispaq?

Bibliata allinta estudiaymi yanapawasunchis. Chaypin willashan imaynatas ñaupa tiempopi Jehová Diosta serviqkuna valiente kanankupaq kallpachakurqanku chayta. Kay libron yanapawasun paykunamanta astawan yachananchispaq, imaynatas paykuna jina kasunman chaypi piensarinanchispaqpas. Chayrayku sapanka yachachikuyta estudianaykipaq ñaupaqta Diosmanta mañakuy, estudiasqayki qhepamantaq piensariy imaynatas vidaykipi chay yachasqaykita rikuchiwaq chaypi. Chaymantapas piensarillaytaq imaynatas jamuq tiempopi ima sasachakuytapas atipawaq, imaynatas Jehová Diospas yanapasunkiman ama manchakuq valiente kanaykipaq chaypi. ¿Imakunapiwanmi paykunaq ejemplon yanapawasunman?

Usqhayllan kasukunanchis cambiokuna kaqtin (Sant. 3:17). Jonatanmanta yachasun. Payqa yaqapaschá piensaykurqan taytanpa qhepaman rey jaykunanpaq, ichaqa mana chhaynachu karqan. Jehová Diosqa Davidtan ajllarqan Saulpa qhepanman rey kananpaq. Chhaynaña karqan chaypas Jonatanqa manan phiñakurqanchu, aswanpas Jehová Diospa imachus nisqantan apoyarqan. Chaypin reparanchis payqa sonqomanta kasukuq kasqanta, mana manchakuq valiente kasqantawan.

Imaña kaqtinpas Jehová Diostan kasukunanchis (Heb. 11:​32-34). Hananiaspas Misaelpas Azariaspas chaytan ruwarqanku. Paykunata raurashaq hornoman wijch’uykunankupaqña amenazarqanku chaypas, manan reypa ruwachisqan idolomanqa k’umuykurqankuchu. Paykunaqa Jehová Diostan ñaupaqtaqa kasukurqanku.

Jehová Diosmanta, Jesusmantawan cheqaq kaqtan willananchis (Mat. 22:16). Tarso llaqtayoq Saulomanta yachasun. Wakin judío runakunaqa piensasharqankun “Sauloqa yanapawasunchá cristianokunata chinkachiypi” nispa. Saulon ichaqa cambiapurqan, jinaspa paykunaman mana manchakuspa Jesusmanta cheqaqta willarqan.

Kay libroqa yanapawasunpunin allin iñiyniyoq mana manchakuq valiente kananchispaq (Sal. 27:14). Ichaqa amayá kay libropi yachasqaykitaqa qanllapaqchu jap’ikuy, aswanpas chay yachasqaykita familiaykiman willay. Chaymantapas iñiqmasikunata chaywan yanapay Diospa gobiernonta ama manchakuspa apoyanankupaq. ¡Jehová Diosqa yanapasunkichispunin mana manchakuq valiente kanaykichispaq!