¡Atiwaqmi mana manchakuq valiente kaytaqa!

1-3. ¿Imaraykun Jesús ninman karqan “jatariychis, jaku” nispa?

JUJ kutinmi juj runa nirqan “jatariychis, jaku” nispa. Chhaynata rimananpaqqa mana manchakuq valiente runachá karqan. Pay jinaqa manan pipas chhaynataqa rimarqanchu. ¿Imaraykun chayta ninchis? Chayta yachananchispaq ñaupaqta yachasun pin karqan chay runa chayta, imaraykus chayta nirqan chaytawan (Mat. 26:46).

² Chay runaqa karqan Jesusmi, ichaqa manan chay kutillapichu chhaynata discipulonkunataqa nirqan (Juan 14:31). Jesusqa chay kutipiqa Getsemaní huertapin qatikuqninkunawan kasharqan, chay huertaqa Jerusalén llaqtaq qayllanpin kasharqan. Chaypi kashaqtinkuqa ñan tutaña kasharqan, killapas ch’aqtan k’anchamusharqan. Jesusqa yacharqanñan chay tuta askha runakuna allin armasqa k’aspikunantin payta maskhamushasqankuta, imaynas chay runakunaqa payta jap’ispa presota apapunanku karqan chaytapas. Jesustaqa nishuta ñak’arichispan wañuchinanku karqan, chhaynapiqa mana pipas tarikurqanchu. Chaymantapas Jesustaqa llapa qatikuqninkunan saqerparipunanku karqan.

³ Jesusqa chhaynapi tarikuspaqa manan ayqekurqanchu, nitaqmi Jehová Diosmantachu mañakurqan angelkunawan pakaykunanpaq. Chay ruwayta atirqanña chaypas, manan chaytachu ruwarqan (Mat. 26:53). Aswanpas nirqanmi: “Jatariychis, jaku”, nispa. Ichaqa, ¿maymantaq riytari munasharqan? Jesusqa ñak’ariyta wañuyta mana manchakuspan, payta jap’iyta munaq runakunawan tupaq rirqan. ¿Imaraykun chayta ruwanman karqan? Taytanta qatikuqninkunatawan munakusqanraykun.

4, 5. ¿Imaynatan Jesús rikuchirqan mana manchakuq valiente kasqanta? ¿Imaraykun pay jina kananchis?

⁴ Yachamusqanchis jina Jesusmi karqan kay pachapi mana manchakuq valiente runaqa, manan pay jina pipas karqanchu. ¿Qanri mana manchakuq valiente runachu kanki? Arí. Jesuspa qatikuqnintaq kanchis chayqa, valiente runakunan kanchis. Jehová Diosta serviqkunaqa mana manchakuq valientepunin kananchis. ¿Imarayku? Kay tiempopi imaymana sasachakuykunapi tarikusqanchisrayku.

⁵ ¿Imanisunmantaq Jesús mana manchakuq valiente kasqanmanta? Valiente runa kayqa manan kallpasapa kaychu, imata ruwanapaqpas manan wañuy pataman vidanchista churaychu, nitaqmi millay maqakuq runakuna jina kaychu (Sal. 11:5). Jesusqa manan chaykunata ruwaspachu valiente kasqantaqa rikuchirqan. Chhaynaqa mana manchakuq valiente kayqa, Jehová Diosta kusichinapaq jina imatapas ruwaymi, sasaña chayta ruway kanman chaypas.

¿Imaynatan Jesús jina mana manchakuq valiente kasunman?

6. Yaqapaschá manchakushanchis ima ruwaytapas, ¿imaynatan qatikuqninkunaman Jesús imachus nisqan noqanchistapas yanapawasunman?

⁶ Yaqapaschá tapukushanchis: “¿Atiymanchu sasachakuykunapi tarikuspa Jesús jina mana manchakuq kayta?”, nispa. Chhaynapi tarikushanchis chayqa, kaytan yuyarinanchis. Jesusqa may khuyapayakuq sumaq sonqon. Payqa Taytan jinan allinta yachan maykamallas imatapas ruwayta atisunman chayta (Sal. 103:14; Juan 14:9). Chhayna kasqantan Jesusqa rikuchirqan Getsemaní huertapi discipulonkunawan kashaspa. Chaypin Jesusqa discipulonkunata kamachirqan rijch’asqalla kanankupaq, paykunan ichaqa secota puñurapurqanku. Chaywanpas Jesusqa sumaqllatan paykunata nirqan: “Sonqoqa munallanpunin, cuerpon ichaqa mana kallpayoq”, nispa (Mat. 26:41). Payqa allintan yacharqan qatikuqninkunaqa runalla kasqankuta, noqanchistapas chhaynatan qhawariwanchis.

7, 8. ¿Imaynatan Jesús qatikuqninkunata yanaparqan?

⁷ Jesusqa yacharqanmi qatikuqninkuna ima sasachakuytapas atipanankuta, chaymi paykunata nirqan: “¡Kallpachakuychis!, noqaqa ñan atipaniña kay pachataqa”, nispa (Juan 16:33). ¿Imaynan chayta uyarispa qatikuqninkuna kashankuman karqan? Paykunaqa kallpachasqa thaj imachá kasharqanku. Jesusqa allintan yacharqan qatikuqninkuna pay jina imatapas ruwanankuta, tiempowanqa chaytataqmi ruwarqankupas. Chaymantapas askha kutipin paykunata kallpacharqan ama manchakuq valiente kanankupaq. Juj kutinmi payqa mana kuyuriyta atiq runata nirqan: “Wawalláy, kallpachakuy, juchaykikunan perdonasqa kapun”, nispa; chaywanqa may kallpachasqachá chay runaqa kasharqan (Mat. 9:2). Juj kutinpas Jesusqa “yawar apay onqoywan ñak’arishaq warmitan” kallpacharqan (Mat. 9:​20-22). Juj kutipipas discipulonkuna sinchi mancharisqa kashaqtinkun Jesusqa paykunata nirqan: “¡Kallpachakuychis! Ama manchakuychischu, noqan kani”, nispa (Mat. 14:27). Chaymantapas Jesusqa Pabloman rijurispa nirqan: “¡Kallpachakuy, Pablo!”, nispa. Chay qhepamanmi Pablotaqa wañuchinankupaq amenazarqanku (Hech. 23:​9-11).

⁸ Noqanchistapas Jesusqa discipulonkunata jinan niwanchis: “¡Kallpachakuychis!”, nispa. Chaytataq niwanchis chayqa, atisunmanmi mana manchakuq valiente kayta. Chaymantapas Jesusqa yachanmi noqanchispas ima sasachakuytapas atipananchista. Jehová Diospas liston kashan yanapawananchispaq.

¿Imaynatan Biblia yanapawasunman mana manchakuq valiente kananchispaq?

9. ¿Imaynatan Biblia yanapawanchis ama manchakuq valiente kananchispaq?

⁹ Jehová Diosqa maytan munakuwanchis, chaymi Bibliapi qelqachirqan mana manchakuq valiente runakunamanta, chhaynapi noqanchispas paykuna jina kananchispaq. Arí, Bibliapin willashan mana manchakuq qharikunamanta warmikunamantawan. Paykunaqa “noqanchis jina runallataq karqanku” chayqa, imaymana sasachakuykunapin tarikurqanku (Sant. 5:17). Chaymantapas paykunaqa mayninpiqa pisikallpayarqankun, mana allinkunatan ruwarqanku, wañuy patapi iman tarikurqanku. Chaykunapin sut’ita yachanchis noqanchis jinalla kasqankuta. Paykunapas Jesús jinan mana manchakuq valienten karqanku, chaymi imaymana sasachakuykunata atiparqanku. Paykunaqa allin ejemplotapunin saqewarqanchis, chaymi paykunamanta astawan yachaspaqa paykuna jinan kayta munanchis.

10, 11. ¿Imayna kananchispaqmi kay libro yanapawasunchis? ¿Imaynatan kay librota allinta t’aqwiwaq? (Qhaway “¿Imaynatan kay librota estudiawaq sapallaykipi, familiaykiwanpas?” nisqa recuadrota).

¹⁰ Kay librota estudiaymi yanapawasun ama manchakuq valiente kananchispaq. Chaypin yachasun imaynatas Jehová Dios noqanchis jina runakunata yanaparqan mana manchakuq kanankupaq chayta. Chhaynaqa kallpachakuy sapanka yachachikuyta leenaykipaq, chaymantataq astawan t’aqwiriy chay yachasqayki runakunamanta. Chaykunata ruwaspan allinta reqsinki ñaupa tiempomanta Dios sonqo runakunata.

¹¹ Maytan munayku kay libropi yachachikuykuna allinta yanapanasuykita, chhaynapi kay tukukuy sasa p’unchaykunata ama manchakuspa aguantananchispaq (2 Tim. 3:1). Jehová Diosmi prometewanchis: “Manan jayk’aqpas saqesaykichu, manan jayk’aqpas wijch’usaykichu”, nispa. Amayá jayk’aqpas chaytaqa qonqasunchu. Chhaynapin tukuy sonqomanta nisunchis: “Jehová Diosmi yanapawaqniyqa, manan manchakusaqchu”, nispa (Heb. 13:​5, 6).