Mikhunayqa Diospa munayninta ruwaymi

Rey Davidmi kusisqa takirqan: “Diosníy, munayniykitapunin ruwayta munani, yachachikuy simiykitan sonqoy ukhupi hap’ini”, nispa (Sal. 40:8). Davidqa imaymana sasachakuykunapin tarikurqan, chaywanpas Diospa munayninta ruwaymi kusichirqan. Chay hinatan hukkunapas Diosta servirqanku.

Salmo 40:8 textoqa Jesucristomantan rimashan, chaymi apóstol Pablo nirqan: “Chayraykun Cristoqa kay pachaman hamuspa nirqan: ‘Manan sacrificiotapas ofrendatapas munarqankichu, aswanmi huk cuerpota wakichipuwarqanki. Hucha pampachay sacrificiokunapas ruphachina sacrificiokunapas manan sonqoykiman chayaqchu karqan’, nispa. Chaymi nirqani: Diosnilláy, munayniykita ruwanaypaqmi hamushani, imaynan qelqa k’uyupi ñoqamanta qelqasqa kashan hina”, nispa (Heb. 10:5-7).

Kay pachapi Jesús kashaspaqa, kusikurqanmi Diospa kamasqankunata qhawaspa, amigonkunawan kaspa, paykunawan mikhuspa ima (Mat. 6:26-29; Juan 2:1, 2; 12:1, 2). Ichaqa Diospa munayninta ruwaymi astawanqa kusichirqan, chay ruwaytaqmi paypaqqa aswan chanin karqan. Chaymi nirqan: “Mikhunayqa kachamuwaqniy Yayaq munayninta ruwaspa paypa ruwananta hunt’anaymi”, nispa (Juan 4:34; 6:38). Chhaynapin qatikuqninkunapas allinta yacharqanku ima ruway astawan kusikunapaq kasqanta. Chaymi paykunapas kusisqallaña Diospa gobiernonmanta willarqanku (Luc. 10:1, 8, 9, 17).

“RUNAKUNATA YACHACHIMUYCHIS”

Jesusmi qatikuqninkunata kamachirqan: “Llapa suyu runakunata yachachimuychis, yachachisqaykuna kanankupaq, hinaspa Yayaq, Churiq, Santo Espirituq sutinpi paykunata bautizamuychis. Qankunaman lliw kamachisqaykunata paykunaman yachachimuychis kasukunankupaq. Ñoqaqa qankunawanmi sapa p’unchay kashani kay pachaq p’uchukanankama”, nispa (Mat. 28:19, 20). Chay kamachisqanta hunt’anapaqqa, llapa runakunamanmi willamunanchis maypiña tarikuqtinkupas. Hinaspapas kutinanchismi Bibliamanta yachachinanchispaq. Chayta ruwaymi astawanqa kusichiwasun.

Ichaqa, ¿imaraykun predicashallanchis manaña runakuna uyariwanchischu, millaytaña tratawanchis chaypas? Jehová Diosta runakunatapas munakusqanchisraykun. Chhaynapin salvakusunchis hukkunatapas yanapasunchis salvasqa kanankupaq (Ezeq. 3:17-21; 1 Tim. 4:16). Chaykunata allinta entiendeymi yanapawasun kusisqalla predicananchispaq. Wakin iñiqmasikunaqa sasa predicana cheqaskunapin kashanku, chaywanpas kusisqallan predicanku. Ichaqa, ¿imaynatan chayta ruwanku? Chayta qhawarisun.

MAYPI KASHASPAPAS PREDICASUN

Runakuna uyariwananchispaqqa, allinta yuyaykuspan tapunanchis, chaytan Amalia iñiqmasipas ruwarqan. Parquepin huk runata rikurqan periódico leeshaqta, hinan tapurqan: “¿Kashanchu ima allin noticiallapas?”, nispa. Chay runataq nirqan: “Manan imapas kanchu”, nispa. Hinan iñiqmasinchisqa nirqan: “Ñoqan ichaqa allin noticiata apamushani. Chay noticiaqa Diospa Gobiernonmanta allin willakuykunan”, nispa. Chhaynapin Biblia estudiayta qallarirqanku. Chhaynata predicaspan Amaliaqa kinsa estudiota qallarirqan chay parquepi.

Janice iñiqmasipas tiempota mana usuchispan llank’ananpi predican. Paymi Qhawaq revistata qorqan llank’aqmasinman llank’ananpi cuidaq runaman ima. Chay revistapi huk tema lloqsimusqanta allinpaq qhawarisqankuta reparaspan, paykunata nirqan sapa killa revistakunata apananpaq. Chhaynallatataqmi huk runamanpas sapa killa aparqan Qhawaq, ¡Rikch’ariy! revistakunata. Chayta rikuspan huk llank’aqmasinpas mañakullarqantaq revistakunata. Janice iñiqmasin nin: “¡Maytan Jehová Dios bendeciwarqan chaykunawan!”, nispa. Chay hinapin chay iñiqmasiqa 11 runakunaman sapa killa revistanchiskunata aparqan.

KALLPACHAKUSHALLASUN

Huk watukuq umallin iñiq t’aqapi predicaqkunata nirqan: “Wasin-wasinta predicaspaqa aman ‘hukpiña tupasunchis’ nispallachu pasapunkichis. Aswanpas tapuychis: ‘¿Munawaqchu yachayta imaynata Biblia estudiakusqanta?’, nispa. Otaq niwaqchis: ‘¿Ima p’unchaytan kutimuyman astawan parlarinanchispaq?’”, nispa. Chayta ruwaspan chay iñiq t’aqaqa huk semanallapi 44 estudiokunata qallarirqan.

Hinaspapas usqhayllan kutina, yaqapaschá iskay kinsa p’unchayllaman. Chay hinapin allin sonqoyoq runaqa reparanqa cheqaqtapuni Bibliamanta yachachiy munasqanchista. Huk warmitan tapurqanku imarayku Biblia estudiasqanta, chaymi nirqan: “Sapa kuti visitamuwasqankupin repararqani Bibliamanta yachanaytapuni munasqankuta, chaymi estudiarqani”, nispa.

Precursorkunapaq Escuelaman risqan qhepallatan Madaí iñiqmasi 20 estudiota qallarirqan, paykunamantan phisqata huk iñiqmasikunaman qorqan. Wakin estudiantenkunataqmi huñunakuykunaman riyta qallarirqanku. ¿Iman Madaí iñiqmasita yanaparqan askha runakunawan estudiayta qallarinanpaq? Escuelapi yachamusqanmi. Chay escuelapin kallpachasqaku Bibliamanta yachay munaqkunaman tarinankukama kutinankupaq. Huk iñiqmasipas askha runakunatan yanaparqan Bibliata estudianankupaq, paymi nin: “Mana sayk’uspan Bibliamanta yachayta munaq runakunataqa yanapashanallanchis”, nispa.

Bibliamanta yachay munaqkunaman estudio qoyqa tiempopaqmi. Ichaqa chayta ruwanapaq kallpachakuspaqa sumaq bendicionkunatan chaskinchis. Predicananchispaq kallpachakusun chayqa, runakunatan yanapasun ‘cheqaq-kayta reqsinankupaq’, chhaynapi salvasqa kanankupaq (1 Tim. 2:3, 4). Arí, runakunaman predicaypas paykunata Diospa llaqtanman pusamuypas maytan kusichiwanchis.