Yanapasun asilokunapi tiyaq kurak runakunata
1. ¿Imaraykun asilopi tiyaq runakunaman Diosmanta yachachinanchis?
1 Askha runakuna machuyapushasqankumanta llakikunku (Ecl. 12:1-7). Paykunamantan askha kurak runakuna asilo nisqakunapi tiyanku. Wakinqa onqosqan kashanku, wakintaq manaña allintachu imatapas yuyanku. Chaywanpas atinkumanraqmi Diosmanta yachayta, munayninta ruwaytapas. Wasin-wasinta predicaspan ichaqa paykunaman mana chayanchischu. Chhaynaqa, ¿imaynatan paykunaman Diosmanta yachachisunman sumaq ‘suyakuyniyoq’ kanankupaq? (Tito 2:13.)
2. ¿Imatan ruwasunman kurak runakunaq tiyasqan wasikunata tarinapaq?
2 ¿Imaynatan ruwana? Ñawpaqtaqa maykunapichus kurak runakuna kasqantan maskhana kanqa. Chaypaqmi “residencias de ancianos”, “clínicas geriátricas” otaq “asilos” nisqa wasikunaq telefononpa numeronta otaq Internetpi maskhana. Predicacionta qhawariq umallin akllanqa experienciayoq publicadorkunata chay wasikunata visitanankupaq. Sichus Jehová Diospa yanapayninpi confiasun allintataq imatapas ruwasun chayqa, atikunqan chay wasikunapi tiyaq kurak runakunawan Biblia estudiayta (Prov. 21:5; 1 Juan 5:14, 15).
3, 4. a) ¿Piwanmi ñawpaqta parlariwaq kurakkunaman estudiota qonaykipaq? b) ¿Imakunatan encargakuqman willawaq estudio qosqanchismanta?
3 Chay wasikunapi kurakkunaman estudiota qonapaqqa ñawpaqtan qhawarina askhachus pisichus kasqankuta. Sichus askha tiyanku askhataq chaypi llank’anku chayqa, kurakkunaq ruwananmanta encargasqa runawanmi parlarina. Pisilla kanku chayqa, wasiyoqwanmi parlarina kanqa.
4 Qallariymantapacha encargakuqman willay Jehová Diospa testigon kasqaykita, mana qolqellapaq Bibliata yachachisqaykita, manataq misa ruwaqchu nitaq religionmanta yachachiqchu hamusqaykita. Tapuriy: “¿Yaqapaschá wakin kurak runakuna munanku 30 minuto hina sapa semana Bibliamanta yachayta?”, nispa. Askha qelqakuna kashan kurakkunaman yachachinapaq. Wakin iñiqmasikunaqa Bibliamanta willakuq libroy, El hombre más grande de todos los tiempos nisqa librokunawanmi estudiokunata qallarinku. Ichaqa encargakuqman ñawpaqta chay qelqakunata qhawarichiy. Hinaspapas rimawaqchismi ima p’unchayta, ima horata, maypi estudio aparinaykita, chaytataqmi programa ruwasqankupi qelqakunman.
5. ¿Imakunatan ruwana kurakkunawan estudio aparikusqan sumaq kananpaq?
5 ¿Imaynatan estudiota aparina? Kurakkunawan estudiota aparinapaqqa qhawarinan kanqa imaynapi tarikusqankuta, local imayna kasqantapas, chaymi pacienciawan imatapas ruwana. Estudio qonapaq qelqataqa askhatan apana, estudio tukuqtintaq chaskipuspa apapuna, yaqapaschá wakintaqa hatun letrapi apana kanqa pisita rikuqkunapaq. Estudiota aparispaqa estudiaqkunatan invitakunman parrafokunata leenankupaq, tapuykunaman kutichinankupaqpas. Estudiantekunata astawan kallpachanapaq yaqapaschá mayninqa Bibliamanta willaq videokunata qhawachiwaq, ichaqa ñawpaqtan encargadoman chayta willana. Wakin iñiqmasikunaqa takikunatan takinku chay huñunakuykunapi, hinaspapas mayninqa Diosmanta mañakuspan qallariwaqchis tukuwaqchispas. Estudiota aparispaqa sumaq simiwan, sumaq sonqowanmi aparina.
6. ¿Imatan ruwawaq huk estudiante ima yachachisqaykitapas mana allinpaq qhawariqtin?
6 ¿Imatan ruwawaq estudiashaqtiykichis mayqen estudiantepas yachachisqaykita mana allinpaq qhawarispa chaymanta tapukuqtin? Chaytaqa allin yuyaywanmi kutichinayki (Col. 4:6). Yaqapaschá chaymanta willaq textota qhawachiwaq otaq niwaq: “Allinmi chay tapukusqayki, ichaqa estudiasqanchis qhepatan chaymanta parlarisunman, ¿allinchu kanman?” nispa.
7. ¿Imatan ruwawaq huk estudiante imatapas tapukuqtin otaq astawan yachayta munaqtin?
7 ¿Sichus huk estudiante imatapas tapukunman otaq ima temamantapas astawan yachayta munanman chayri? Chay kaqtinqa huk iñiqmasin kayta nin: “Allinmi chay nisqayki. Ichaqa qantaq chayta tapukushanki chayqa, ¿manachu llapankuwan estudiota tukurusqanchis qhepaman chaymanta parlarisunman?”, nispa. Astawan yachayta munaqkunawanqa sapallankuwanmi estudiawaqchis.
8. ¿Imaynatan informe nisqapi qelqananchis t’aqapi otaq sapallankupi estudiachisqanchista?
8 Asilokunapi kurakkunata allinta yanapanapaqqa kaq iñiqmasikunallan rinanku. Estudiota apariqmi llapankuman estudio qosqanmanta informe nisqapi huk estudiollata qelqanan revisitakuna ruwasqantawan, huk iñiqmasikunataq hayk’a hora ruwasqallankuta qelqananku. Pitapas sapaqpi estudiachisqaykitaqa huk estudiokunata hinan informeykipi qelqanayki.
9, 10. ¿Imaynatan llapan estudiantekunata qhawarinanchis?
9 Sapa kutillanmi estudiota aparina. Estudiota aparinapaqqa ñawpaqtan parlananchis ima p’unchaypi, ima horapi qallarinanta. Estudiantekunapas chaypi llank’aqkunapas munanqakun qhepasqanchis tiempopi qallarinata tukunatapas (Mat. 5:37). Chayta hunt’anapaqmi makilla imatapas ruwana kanqa, allintataq imatapas allichana kanqa. Chay estudiota aparispaqa iskay iñiqmasikunan rinanku (Ecl. 4:9, 10). Ichaqa asilopi askha tiyankuman chayqa, hukkunapas rinkumanmi.
10 Llapa estudiantekunan reparananku paykunapi interesakusqanchista sumaq sonqowantaqmi llapankutapas qhawarina (Filip. 2:4). Chaymi qallariymantapacha sutinkuta apellidonkutawan qelqana, kallpachakunataqmi umanchispi hap’inapaq. Wakinqa manapaschá munankuchu sutinmanta waqyanata, chhayna kaqtinqa apellidonkumantan waqyana kanqa. Sichus llapankutapas pacienciawan khuyapayakuywan qhawarisun chayqa, kusisqan kanqaku reparanqakutaqmi munakusqanchista.
11. ¿Imaynatan hukkunaman rikuchisunman respetoyoq kasqanchista?
11 Llapa runakunan reparananku respetoyoq, sumaq sonqo kasqanchista. ¿Imaynatan encargakuqta respetasqanchista rikuchisunman? Sichus kurakkunata estudiachisqanchis horariota cambiayta munasunman chayqa, ñawpaqtan payman willananchis. Hinaspapas mayninpin tapurisunman estudio aparisqanchista imayna qhawarisqanta. Visitapi hamuq familiakunatapas respetowanmi qhawarinanchis. Sichus estudiota aparishaqtinchis chayamunman chayqa, willananchismi pi kasqanchista, imarayku chaypi kasqanchistapas. Willananchismi familiankupi interesakuspa yanapay munasqanchista, invitasunmantaqmi estudiopi qhepakunankupaq.
12, 13. ¿Ima experienciakunan kashan asilokunapi iñiqmasikunaq yanapasqankumanta?
12 Allintan aparikushan. Huk llaqtakunapiqa allintan aparikushan asilokunapi predicasqanku, chaytan willanku iñiq t’aqata watukuqkuna, iñiq t’aqakunapas. Huk asilopin 20 runakunawan estudio qallarikurqan, paykunamantataq 6 sapaqpi estudiayta munarqanku, huktaq bautizakapunña. Huk asilopin huk warmi 85 watanpi huñunakuykunaman riyta qallarirqan bautizakuytataqmi munashan. Huk asilopin iñiqmasikunaq estudio qosqankuta qolluchipurqanku. Chayta rikuspan chay wasipi estudiantekuna encargakuqman quejakurqanku. Hinan yapamanta chaypi estudio aparikurqan, kunantaq 25 maynintaq 30 hina huñukushanku.
13 Asilokunapi llank’aqkunapas llaqtapi runakunapas reparankun iñiqmasikuna munakuywan hukkunata yanapay munasqankuta (1 Ped. 2:12). Chaymi mayninqa wakin llank’aqkuna estudio aparikusqanta uyarinku, tapuykunamanpas kutichinku. Huk asilo wasimanta encargakuqmi chay estudio imayna aparikusqanmanta yacharuspa nirqan: “¿Imaraykutaq chayraq hamushankichis? ¿Hayk’aqmantan qallariwaqchis?”, nispa. Huk asilomanta encargakuq warmin nillarqantaq: “Kay yanapaytaqa mana qolqellapaqmi Jehová Diospa testigonkuna llaqtakunapi aparishanku. Llapa asilokunapin kay estudiotaqa aparikunan”, nispa. Hawái llaqtapin huk asilopi, Testigonkunaman diplomata qorqanku chay yanapay aparisqankumanta. Chaypin qelqasqa kasharqan Testigokuna “ancha valorniyoq qori” hina qhawarisqa kasqanku.
14. ¿Imaraykun asilokunapi tiyaqkunaman Diosmanta yachachinanchis?
14 Jehová Diosqa munanmi kurak runakunapas yupaychanankuta (Sal. 148:12, 13). Chaymi asilokunapi tiyaqkunapas invitasqa kashanku payta hatunchanankupaq. Sichus tiyasqanchis llaqtapi kashan asilo wasikuna chayqa, umallikunan yanapawasun chaypi tiyaqkunata maskhamunapaq. Hinaspapas necesitasunmi chay wasipi encargakuqkunaq yanapayninta. Chay hinaqa llapallanchis kallpachakusun kurakkunata yanapanapaq, chayta ruwaspan Jehová Diosta qatikusunchis (Sal. 71:9, 18).