¿Imaynatan Jehová Diospa testigonkuna casarakunku?
Testigokunaq casarakuyninqa manan nishu jatunchu. Chay p’unchaymi casarakuqkunaqa Bibliamanta yuyaychaykunata chaskinku. Chaytaqa paykunata compañaqkunapas uyarikunkun. Chay qhepamanqa mayninqa aparikunmi juj fiesta, chayqa sapanka casarakuqkunamantañan; chaypin mijunata ima llapanku mijunku.a Jesuspas rirqanmi juj casarakuyman, chay casarakuyqa Caná llaqtapin aparikurqan (Juan 2:1-11).
¿Imaynatan chay casarakuy aparikun?
Chay p’unchayqa juj munay discurson aparikun. Testigokuna ukhupi juj umalliqmi 30 minutospi jina chayta aparin. Chaypin casarakuqkunata Bibliawan yuyaychan, chhaynapi casarakuqkuna sumaqta kausanankupaq (Efesios 5:33).
Wakin nacionkunapi gobiernokunaqa Testigokuna ukhupi wakin umalliqkunatan autorizan casarakuy munaqkunata casarachinankupaq. Chhayna kaqtinqa casarakuqkunaqa discurso tukuytan promesata ruwanku, anillota iman qonakunku. Chaypin umalliqqa chayraq casarasqakunata llapa chaypi kaqkunaman presentan.
Wakin nacionkunapin ichaqa autoridadkunalla casarakuy munaqkunata casarachinku. Chaymi autoridadkuna casarachisqan qhepataña casarakuqkunapaq discursoqa aparikun. Casarakuqkuna autoridadpa ñaupanpi mana promesata ruwarankuchu chayqa, discurso tukuytan chayta ruwanku. Ichaqa sichus promesata ruwarankuña chayqa, atinkumanmi discurso tukuyta jujmanta ruwayta. Jujmanta ruwanku chayqa, manañan chayraqpas prometenakushankuman jinataqa rimanankuchu. Chay discurso tukuytan juj hermano Diosmanta mañakun casarakuqkunata yanapananpaq.
¿Maypin casarakunku?
Wakin Testigokunaqa juñunakuna wasipin casarakunku.b Casarakuqkuna juj fiestata ruwayta munanku chayqa, juj ladopin chaytaqa aparinku.
¿Pikunan chayman rinkuman?
Juñunakuna wasipi aparikusqan discursomanqa pipas jaykullanmanmi Testigopas mana Testigopas. Ichaqa casarakuqkuna fiestata ruwanqaku chayqa, paykunañan qhawarinanku pikunatas invitanqaku chaytaqa.
¿Imayna p’achasqan chayman rina?
Manan ima kamachikuypas kanchu juñunakuna wasipi casarakuyman imayna p’achasqa rinamantaqa. Ichaqa llapa Testigokunan kallpachakuyku Bibliaq nisqanman jina, allin yuyaywan allin jap’iq p’achawan p’achakunaykupaq. Munaykumanmi jujkunapas chhayna allin yuyaywan p’achasqa jamunankuta (1 Timoteo 2:9). Fiestaman riqkunapas chaytan ruwanku, allinta piensaspapunin ima p’achawanpas churakunku.
¿Apanankuchu regalokunata?
Bibliapi nisqan jina, yachanan qoykukuq kayta (Salmos 37:21). Chaymi Testigokunaqa qonakuyku regalokunataqa, casarakuqkunamanpas qoykun (Lucas 6:38). Ichaqa manan mayqen casarakuqkunapas ima regalotapas mañankuchu, nitaqmi regalokuna qoqninkuq sutintapas jujkunamanqa willankuchu (Mateo 6:3, 4; 2 Corintios 9:7; 1 Pedro 3:8). Chayta ruwankuman chayqa, manachá Bibliaq yachachisqanman jinachu ruwashankuman, invitasqanku runakunapas p’enqasqa imachá kankuman.
¿Ruwankuchu brindis nisqata?
Bibliapiqa manan imaninpaschu copata oqarispa brindaymantaqa. Ichaqa wakin casarakuqkunaqa invitasqanku runakunatan ninku ama chayta ruwanankupaq. Chhaynapi ama jujkunata iñiyninkupi urmachinankupaq (Romanos 14:21).
¿T’akankuchu casarakuqkunaman arrozwan otaq jujkunawan ima?
Manan. Wakin llaqtakunapiqa arrozwan t’ikakunawan iman casarakuqkunata t’akanku. Chaytaqa ruwanku allinta kausanankupaq, unayta kusisqa kausanankupaq piensaspan. Testigokunan ichaqa mana chay costumbrekunataqa ruwaykuchu. Manan “allin suerteyoqmi kanki” nispapas imatapas ruwaykuchu. Chaykunaqa manan Bibliaq yachachisqanman jinachu kashan (Isaías 65:11).
¿Kanchu chaypi mijunapas ujanakunapas?
Juñunakuna wasipiqa manan ima mijunatapas ni tomanatapas servikunchu. Fiestata ruwasqanku localpin ichaqa mijunatapas tomanatapas servinku, ichaqa sapanka casarakuqmantañan chayqa (Eclesiastés 9:7). Tomana kaqtinqa casarakuqkunan chayta allinta qhawarinanku, chhaynapi ama pipas nishuta tomananpaq (Lucas 21:34; Romanos 13:1, 13).
¿Churankuchu takikunata? ¿Tusunkuchu?
Chayqa casarakuqkunamantan, yaqapaschá paykunaqa musicata churachinqaku, tusunqaku imapaschá (Eclesiastés 3:4). Wakin casarakuqkunaqa tiyasqanku ladopi takikunatan churachinku, ichaqa allin yuyaywanmi chaytaqa ajllanku. Juñunakuna wasipi musicata churaspan ichaqa Bibliamanta ruwasqa takikunata churakun.
¿Ruwankuchu Testigokuna casarakusqanku aniversariota?
Bibliapiqa manan chaymantaqa imaninpaschu. Chhaynaqa sapanka Testigoñan ruwanqachus manachus chaytaqa qhawarin. Ruwanku chayqa wakinqa paykunallan chayta yuyarinku, wakintaq familiankuta amigonkuta ima invitanku.
a Ima costumbrepas ima ruwaypas hasta leykunapas sapanka nacionpin jujniray.
b Discurso qoq hermanoqa manan cobranchu imatapas discurso qosqanmantaqa, nitaqmi casarakuqkunamantaqa cobrakunchu juñunakuna wasita utilizasqankumantapas.