Jesús uywakunaq kanchanpi nacen

¿PITAQ kay wawachari? Arí, Jesusmi. Uywakunaq kanchanpi chayllaraq nacen. Chay kanchaqa uywakuna waqaychanapaqmi. Uywakuna qarana patapin Mariaqa Jesusta puñuchishan. Ichaqa, ¿ima raykun Josepas Mariapas uywakunawan kuska kashanku? Uywakunaq kanchanqa manan wawaq nacenanpaqchu, ¿riki?

Manan. Paykunaqa huk kamachikuyta kasukuspan chaypi kashanku: Romapi kamachiq César Auguston kamachiran, nacesqanku llaqtaman kutispa llapa runakuna sutinkuta huk libropi qelqanankupaq. Joseqa Belenpin nacesqa. Mariawan rispan ichaqa mana tarisqakuchu qorpachakunankupaq wasita. Chaymi risqaku uywakunaq kasqanman. ¡Chay p’unchaypin Jesusta wachakuran! Rikusqayki hina, payqa allinmi kashan.

¿Rikushankichu Jesusman hamuq michiqkunata? Tutata campopi kashaqtinkun sumaq k’anchay paykunata k’anchariran. ¡Angelmi karan! Michiqkunaqa sinchitan mancharikuranku. Angelmi paykunata niran: ‘¡Ama manchakuychischu! Sumaq willakuytan qankunaman willasaykichis. Kunanmi Belenpi nacen Cristo Wiraqochanchis. ¡Paymi llaqtata qespichinqa! Walthanawan p’istusqan puñushan uywakunaq mikhunan patapi,’ nispa. Qonqayllamantan askha angelkuna hamuspa Diosta hatunchanku. Chayta uyarispa hinan michiqkunaqa Jesusta maskhaq phawanku, chaypitaq tarinku.

¿Ima raykun Jesús hukniray? ¿Pin pay karan? Yuyashankichu kay libropi ñawpaq willakuypi Diospa phiwi churinmanta yachasqanchista. Payqa Jehová Diostan ruwaysiran hanaq pachata, Allpata, imaymanatapas. ¡Payqa Jesusmi!

Arí, Jehová Diosmi churinpa kawsayninta hanaq pachamanta astamuspa Mariaq wiksanman churaran. Chaymi wawaqa Mariaq wiksanpi wiñaran llapa wawakuna hina. Kay wawan ichaqa Diospa Churin karan. Belenpin naceran uywakunaq kanchanpi. ¿Reparankichu ima raykun angelkuna kusikuranku Jesuspa nacesqanmanta willaspa?