Angelkuna Jesuspa nacesqanta willanku

Roma nacionmanta César Agusto reymi llapa judiokunata kamachirqan llaqtankupi padronachikunankupaq. Jinan Josepas Mariapas Belén llaqtata rirqanku, Josepa familian chay llaqtamanta kasqanrayku. Mariaqa onqokunan patapiñan kasharqan.

Belenman chayaqtinkun mana alojakunankupaq karqanchu, chaymi uywakunaq wasinman jaykurqanku. Chaypin Mariaqa Jesusta onqokurqan. Jinan wawanta p’istuykuspa sumaqllata uywa qarana patapi churarqan.

Belén llaqta qayllapin wakin michiqkuna uywankuta tuta cuidasharqanku. Jinan juj ángel k’ancharispa ñaupankupi rijurirqan. Michiqkunaqa sinchitan mancharikurqanku, angelmi ichaqa nirqan: “Ama manchakuychischu. Sumaq noticiatan willasaykichis. Kunanmi Belenpi Mesías nacen”, nispa. Chayllamanmi askha angelkuna cielopi rijurispa takirqanku: “Janaq pachapi Diosta jatunchaychis. Jallp’apitaq thaj kausay kachun”, nispa. Chayta nispan chinkaripurqanku. ¿Imatan michiqkuna ruwarqanku?

Paykunapuran ninakurqanku: “Kunanpacha jaku Belenta”, nispa. Usqhaytan rirqanku, jinaspa uywakunaq wasinpi tarirqanku Joseta, Mariata, chayllaraq naceq wawatawan.

Michiqkunaman angelpa willasqanta uyariq runakunaqa anchatan admirakurqanku. Mariapas sonqonpin waqaycharqan uyarisqanta, manataq jayk’aqpas qonqarqanchu. Michiqkunaqa uywankuta cuidaqmi kutipurqanku, Diostataq agradecekurqanku rikusqankumanta uyarisqankumantawan.