Jesús orqo patapi yachachin

QHAWARIY Jesusta. Kay runakunatan yachachishan Galilea orqopi tiyaspa. Paypa qayllanpi kaqkunaqa qatikuqninkunan. Chunka iskayniyoqtan payqa akllan apostolninkuna kananpaq. Apostolkunaqa Jesuspa akllasqan qatikuqninkunan. ¿Yachankichu paykunaq sutinta?

Ñawpaq kaqmi, Simón Pedro wayqen Andreswan. Chaymantan kallantaq Juan, Santiagowan paykunapas wayqentinmi kanku. Hukpa sutinmi Santiago, huknintaq Simón sutiyoq. Iskay apostolkunan Judas sutiyoq. Hukninmi Judas Iscariote huknintaq Judas Tadeo. Kallantaqmi Felipe, Natanael (Bartolomeo sutiyoq), Mateo, Tomaspas.

Samariamanta kutimuspan Jesusqa predicayta qallarin: ‘Hanaq pachapi kamachikuymi asuykamunña,’ nispa. ¿Iman chay kamachikuy? Diospa kamachikuyninmi. Jesusmi kamachikunqa. Paymi hanaq pachamanta kamachimuspa Allpapaq thak kawsayta apamunqa. Diospa kamachikuynin qallariqtinqa Allpantinmi paraíso kanqa.

Chay kamachikuymantan Jesusqa yachachishan kaypi runakunaman. ‘Khaynatan mañakunaykichis,’ ninmi pay. ‘Yayayku hanaq pachapi kaq, sutiyki hatunchasqa kachun. Kamachikuyniyki hamuchun. Munayniyki kay Pachapi ruwakuchun hanaq pachapi hina,’ nispa. Askha runakunan kay mañakuyta sutichanku ‘Señorpa mañakuynin,’ nispa. Hukkunataq ‘Yayayku,’ nispa. ¿Yachankichu kay mañakuyta?

Jesusqa yachachishallantaqmi hukkuna hukkunawan imayna kawsanankuta. “Imaynatachus runakunaq ruwanasuykichista munankichis, chhaynallatataq qankunapas paykunata ruwaychis” ninmi. ¿Munawaqchu hukkuna sumaqta ruwanasuykita? Chay raykun ñoqanchispas hukkunawan sumaqta kawsananchis. ¡Sumaqmi kanqa Allpantin paraisoman tukuqtin llapa runakuna chhaynata ruwaqtinku!, ¿riki?