Umalli T’aqaq cartan
Munasqa wawqe-panaykuna:
Yachasqaykichis hina, Bibliaqa cheqaq runakunamantan willan. Chaypin willan hunt’aq sonqowan Diosta serviq qharikunamanta warmikunamanta, paykunapas ñoqanchis hinan problemakunayoq karqanku (Santiago 5:17). Wakinqa problemakunaq llakikuykunaq ñit’isqanmi tarikurqanku, hukkunataq llakikurqanku Diosta serviqmasinku mana allinta ruwasqankurayku. Wakintaq huchallikusqankurayku sonqonkuq huchachasqan tarikurqanku.
¿Chayraykuchu chay runakuna mana kutimuqpaq Diosta saqepurqanku? Manan. Askhan salmista hina karqanku, paymi Diosmanta orakurqan khaynata: “Chinkasqa oveja hinan puriripurqani, ichaqa manan kamachikuyniykikunata qonqapurqanichu, chayrayku, kamachiykita maskhaq hamuway”, nispa (Salmo 119:176). ¿Hayk’aqllapas chhaynata sientekurqankichu?
Jehová Diosqa manan hayk’aqpas qonqanchu paymanta karunchakuqkunataqa. Aswanpas paykuna maskhaqmi rin, mayninpiqa chaytan ruwan serviqninkunata utilizaspa. Piensasun Jobta imaynata Jehová Dios yanapasqanpi. Jobqa imaymana sasachakuykunapin tarikusharqan: kaqninkunatan chinkachipurqan, wawankunan wañupurqan, sinchitataqmi onqopurqanpas. Chaymantapas hukkunapas yanapanankumantaqa sientechiq simikunatan nirqanku, chaypas karqanraqtaq. Payqa manan hayk’aqpas Jehová Diosta negarqanchu chaywanpas mana kaqtan Diosmanta piensarurqan (Job 1:22; 2:10). ¿Imaynatan Jehová Dios yanaparqan manaña chhaynata piensananpaq?
Jehová Diosqa siervon Elihuwanmi yanaparqan. Job llakikuyninkunamanta willashaqtinqa Elihuqa makillan uyarirqan, chaymantañan rimarirqan. Ichaqa, ¿imatan ninman? ¿Criticanmanchu? ¿“Pantashankin” nispachu huchayoqta sientechinman otaq p’enqaypi qhepachinman? ¿Pisichaspachu Jobta tratanman? Manapunin. Diospa santo espiritunpa rimachisqanmi Elihuqa nirqan: “Qanpas ñoqapas Diospa ñawpaqenpiqa kaqkaman kanchis, ñoqapas t’urumanta kamasqallan kani”, nispa. Chaymantataqmi nirqan nisqanwan ama manchasqa kananpaq nitaq pisikallpayanantapas (Job 33:6, 7). Elihuqa manan nisqankunawan Jobta llakichirqanchu aswanpas sumaq simikunawanmi kallpacharqan, chaytan Jobqa necesitasharqan.
Chhaynata sientekunaykichispaqmi kay qelqataqa ruwamurqayku. Ñawpaqtaqa iñiq t’aqamanta karunchakuq iñiqmasikunatan tapurqayku chaymantataq imayna sientekusqankupi allinta yuyaymanarqayku (Proverbios 18:13). Chaymantaqa Diosmanta orakuspan allinta estudiarqayku ñawpa tiempopi chhaynapi tarikuq siervonkunata imaynatachus Jehová Dios yanapasqanta. Chaymantataqmi qhawarirqayku Bibliapi willakuykuna imaynapi kay tiempopi Diosta serviqkunaq kawsayninwan yaqa kaqlla kasqanta. Tukuy yuyayta churaspa leeychis kay folletota. Ñoqaykuqa anchatan munakuykichis.
Jehová Diospa testigonkunata umalliq t’aqa