1 ENOC
“Diospa munayninta ruwaspallapunin kausarqan”
ENOCQA sapallan mana piniyoq jinan kasharqan. ¿Imarayku? Tiyasqan llaqtapi runakunamanta jujniray kasqanrayku. Chay tiempopiqa manan pipas pay jinaqa Diostaqa servirqanchu. Chayraykun paymanta Bibliapi nin: “Payqa Diospa munayninta ruwaspallapunin kausarqan”, nispa. ¿Imaynapin Enoc Diospa munayninta ruwaspallapuni kausanman karqan? ¿Imatan paymanta yachasunman?
Enocqa iskay ruwaykunapin Diospa munayninman jina kausarqan. Ñaupaqpi, Enocqa manan tiyasqan llaqtapi millay runakuna jinachu karqan. Payqa Adanmantaqa qanchis kaq generacionñan karqan, chay tiempopaqqa Adanpas kuraqñan kasharqan (qhaway “Qallariypi Diosta serviqkunaq tiemponmanta juezkunaq tiemponkama” nisqata). Chaymantapas chay tiempopiqa yaqa llapa runakunan Adán jina Eva jina mana kasukuq k’ullu sonqokuna karqanku. Cainpas chhaynan karqan, chaymi wayqen Abelta wañuchirqan. Paypa mirayninmanta kaq runakunapas pay jina millaymi karqanku, wakinqa paymanta aswan millaymanraqmi tukupurqanku (Gén. 4:23, 24). Enocmi ichaqa mana chay runakuna jinachu karqan. Aswanmi payqa thaj kausayta maskhaq, chhayna kasqanwanmi Jehová Diosta kusichiq.
Bibliaq nisqanman jinaqa Enoc manaraq naceshaqtinsi “runakunaqa Jehová Diospa sutinta oqariyta qallarisqaku” (Gén. 4:26). Ichaqa manan Diosta adorayta munaspachu chaytaqa ruwarqanku, aswanpas burlakuspan. Enocmi ichaqa mana chhaynachu karqan. ¿Imarayku? Payqa tukuy sonqomantan Jehová Diosta munakurqan, sutintapas anchatan respetarqan. Chaymi payqa jujniray chay tiempopi runakunamantaqa karqan.
Enoctaqa Diospa siminta willasqanraykun wañuchiyta munarqanku, ichaqa Diosqa cuidarqanmi payta
Iskaypi, Jehová Diosmi Enocta ajllarqan profetan kananpaq. Chay ruwayta aparinanpaqqa mana manchakuqmi kanan karqan. ¿Imarayku? Nimusqanchis jina chay tiempopi runakunaqa millay runakunan karqanku. Ichaqa, ¿imatan paykunaman willanan karqan? “Jehová Diosmi chunkay-chunka waranqa ch’uya angelninkunawan jamurqan llapa runakunata juzgananpaq, payta mana manchakuqkunata castigananpaqwan. Diosqa chayta ruwanqa sinchi millay kaqkunata ruwasqankurayku, pay contra millayta rimaq juchasapakuna kasqankurayku iman”, nispan willanan karqan.
¿Imaraykun Enoc willarqan ñapas Jehová Dios paykunata juzganmanña karqan jinata? Enocpa willasqanpin reparanchis imaynas Jehová Diosqa chay runakunaq millay ruwasqankuwan phiñasqa kasharqan chayta. Chayraykun mana manchakuspa millay runa kasqankuta reparachirqan. Chay nisqanta uyarispaqa maytachá chay runakunaqa phiñakurqanku. Chaywanpas payqa mana manchakuspan Jehová Diospa nisqanta willarqan.
¿Imaynatan Enocpa willasqanta chay runakuna chaskikurqanku? Manan chaytaqa allintapunichu yachakun. Ichaqa yaqachus jina chay runakunaqa Enocta wañuchiyta munankuman karqan. ¿Imaynapin chayta yachanchis? Bibliapin nishan: “Paytaqa manañan pipas rikurqanñachu Dios apakapusqanrayku”, nispa. Chay pasananpaqqa yaqachus jina chay runakunaqa Enocta wañuchinankupaq qatikachankuman karqan. Jehová Diosmi ichaqa mana munarqanchu Enocta ima mana allinpas pasananta, chaymi wañuypi puñuchipurqan. Arí, Diosqa manan munarqanchu runakunaq makinpi sufrinanta. Kunanqa Enocqa Jehová Diospa yuyayninpin kashan, manan pipas paytaqa imanaytapas atinmanñachu.
Manaraq wañupushaqtinmi Jehová Diosqa Enocman willarqan “sonqonpaq jina kasqanta”. Yaqachus jina Jehová Diosqa juj rijuriypi Enocman rikuchinman karqan jamuq tiempopi sumaq thaj kausay chaskinanta. Chaypin Enocqa manaraq wañupushaspa sut’ita repararqan Jehová Dios payta munakusqanta, mana manchakuq allin iñiyniyoq kasqanmanta jamuq tiempopi askha bendicionkuna chaskinantapas.
Kay textokunata leey
¿Imaniwaqmi kay tapuymanta?
¿Imakunata ruwaspan Enoc rikuchirqan mana manchakuq kasqanta?
Astawan t’aqwiriy
1. ¿Imapaqmi ñaupa tiempopi runakuna “Jehová Diospa sutinta oqariyta qallarirqanku”? (Gén. 4:26; w01 15/9 29 párr. 3).
2. ¿Imata ruwananpaqmi Jehová Dios Enocta kamachirqan? ¿Iman payta yanaparqan chayta junt’ananpaq? (w01 15/9 31 párr. 5).
3. Enocqa manaraq profeta kashaspaqa ñapaschá yacharqanña imaymana pruebapi tarikunanta, ¿imaraykun chayta ninchis? (w06 1/10 19 párrs. 13, 14). A
Dibujokuna A
4. Wakin runakunan ninku “Enocqa cielomanmi apasqa karqan” nispa. ¿Imaynatan yachachiwaq mana chhaynachu kasqanta? (Juan 3:13; Heb. 11:5, 13).
Imakunapin yanapawasunman
¿Imakunapi tarikuspan mayninpi manchakusunman predicayta? ¿Imaynatan chaypi Enocpa ejemplon yanapawasunman? B
Foto B
Sichus mana manchakuq valiente kasun chayqa, ¿imaynatan Jehová Dios qhawariwasunman? (Prov. 27:11; Heb. 11:5).
¿Imakunata ruwaspan rikuchiwaq Enoc jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
¿Imatan tapuwaq Enoc kausarimpuqtin?
Astawan yachanapaq
¿Imaynatan Enocpa ejemplon yanapasunkiman millay runakuna ukhupi tarikuqtiyki?
¿Iman Enocta yanapanman karqan Diospi tukuy sonqo confiananpaq?
“Sasa tiempokunapi Diospa munayninta ruwashallasun” (w05 1/9 13-17)