2 NOÉ
“Kay pachaqa chinkachinapaq jinapunin kasharqan”
ENOCPA wañukapusqan qhepamanmi janaq pachapi wakin angelkuna Dios contra jatarirqanku. Chay angelkunaqa kay pachapi allin rijch’ayniyoq warmikunatan munapayayta qallarirqanku jinaspa uraykamurqanku, aycha cuerpoman tukuspataq chay warmikunawan puñurqanku, jinaspa wawakunayoq kapurqanku. Chay wawankuqa jatunkaray millay runakunan karqanku, paykunatan nefilim nikurqan. Chaykunaq kasqanwanmi kay pachapi runakunaqa aswan millaymanraq tukupurqanku. Diospa qhawarimunanpaqqa sinchi mana allinkunatan chay runakunaqa ruwasharqanku. Ichaqa karqanmi juj runa paykunamanta jujniray, paymi karqan Noé.
Noeqa abuelon Enoc jinan Dios sonqo runa karqan. Chayraykun Bibliapas nin: “Payqa Diospa munayninman jinan kausarqan”, nispa. Tiempowanqa casarakapurqanmi Noeqa jinaspa kinsa wawayoq kapurqan. Paykunaqa allintan wawankuta yanaparqanku Jehová Diosta munakunankupaq, chhaynapin paykunaqa chay tiempo runakunamanta jujniray karqanku.
Juj kutinmi Jehová Diosqa Noeman willarqan kay pachapi millay runakunata chinkachipunanmanta, chaytaqa ruwanan karqan jatun parata chayachimuspan. Chaywanpas Jehová Diosqa manan munarqanchu chanin runakuna chaypi chinkanankuta. Chayraykun Noeta kamachirqan jatun arcata ruwananpaq. Chay kutikamaqa Noeqa manan jayk’aqpas rikurqanraqchu jatun paraq chayamusqantaqa. Chay paraqa lliu kay pachatan millp’upunan karqan. Chaymantapas Noeqa manan jayk’aqpas jatun arcataqa ruwarqanchu. Ichaqa Jehová Diospa promesanpi confiaspan payqa chay arcata ruwayta qallarirqan.
Noepas familianpas millay runakuna chaupipin kausarqanku, chay runakunaqa mana allinpaqmi qhawariqku imachus ruwasqankuta
Chay arcata ruwanankupaqqa Noepas familianpas mana manchakuq valienten kananku karqan. Chay tiempopi runakunaqa maytachá paykunamantaqa burlakurqanku, jark’arqanku imapaschá. Mana kasukuq angelkunapas millaymi manchakunapaq jinan karqanku, wawankupas nishutan jujkunata sufrichiqku. Ichaqa Noepas, esposanpas, kinsantin wawankunapas, qhachuninkunapas Dios sonqo kasqankuraykun chay arca ruwayta qallarirqanku. Yaqa pisqa chunka wata jinan paykunaqa chay jatun arca ruwaypi llank’arqanku.
¿Imatawanmi Noé ruwarqan arcata ruwashaspa? Predicarqan iman. Chayraykun Bibliapas paymanta nirqan: “Chanin kaqmanta willaq”, nispa. Noeqa familianpi umataq karqan chayqa ejemplon kanan karqan llapankupaq. Chaymi payqa imachus pasananmanta runakunaman willayta qallarirqan. Ichaqa manan pipas uyariyta munarqanchu, wakin familianpas manachus jina uyarikunmanchu karqan. Chay runakunaqa manapunin cambiayta munarqankuchu, manan Noemanqa ni imapipas igualarqankuchu; Noeqa jujniraypunin karqan paykunamantaqa. Chaychá Bibliapas Noemantaqa nin: “Iñiq kasqanwanmi payqa rikuchirqan kay pachaqa chinkachinapaq jinapuni kasqanta”, nispa.
Ruwasqankuman jinan Noewan familianpiwanqa arca ruwayta tukurqanku. Chaymantaqa imaymana mijuykunatan alistananku karqan paykunapaq animalkunapaq ima. Chayta ruwanankukaman admirakunapaq jina pasarqan: Llapa animalkunan ima clasemantachus kasqankuman jina jamuyta qallarirqanku, jinaspa chay arcaman jaykurqanku. ¡May munaypunichá karqan chayta rikuyqa! “Lliumi chay animalkunaqa arcaman jaykurqan, maypichus Noé kasharqan chayman. Iskay-iskaymantan jaykurqan orqontin chinantin”.
Chay qhepamanmi Jehová Diosqa Noeta kamachirqan familianpiwan arcaman jaykunankupaq. ¿Imarayku? Qanchis p’unchayllañan faltasharqan parayta qallarimunanpaq. Chaykamaqa Noepas familianpas arcaman imaymana cosaskuna apaykuypichá ocupasqa kasharqanku. Chayta rikuspaqa yaqapaschá wakin runakunaqa astawanraq paykunamanta burlakurqanku. Chaymantaqa llapa familiantinñan Noeqa arca ukhupi kasharqan, chayllamanmi kikin Jehová Dios chay arca punkuta wisq’apurqan. Chayta ruwaspan chay burlakuq runakunata ch’in-nichipurqan. ¿Iman chaymanta pasarqan? Paran unu jich’aytaraq parayta qallarirqan. Tawa chunka p’unchaymi pararqan jinan orqokunatawanraq millp’upurqan. Chhaynatan Jehová Diosqa millay runakunata kay pachamanta chinkachirqan.
Noewan familianwanqa wata masmi chay arca ukhupi karqanku. Unuqa pisi-pisimantan pisiyayta qallarirqan, jinan chay arcaqa juj orqo patapi tiyaykurqan. Chaymantataq Jehová Diosqa Noeta familiantawan kamachirqan arcamanta lloqsinankupaq. Chay arcamanta lloqsimuspan Noeqa familianpiwan Jehová Diospaq sacrificiota jaywarqanku, chaywanmi Diosta agradecekusharqanku vidankuta salvasqanmanta. Chaypin Diosqa prometerqan manaña jayk’aqpas chhaynata parachimunanpaq. Chay rimasqanta creenankupaqtaq juj k’uychita rijurichimurqan.
¡May kusikunapaqmi Noepas familianpas mana manchakuq valiente kasqankuqa ¿riki?! Paykunaqa millay runakuna ukhupiña kausarqanku chaypas Dios sonqollapunin karqanku. Paykunaraykun kunankamapas kausashanchis.
Kay textokunata leey
¿Imaniwaqmi kay tapuymanta?
¿Imakunata ruwaspan Noé rikuchirqan mana manchakuq kasqanta?
Astawan t’aqwiriy
1. ¿Imaynan runakuna karqanku manaraq jatun para chayamushaqtin? (w02 1/3 5, 6).
2. ¿Ima tiempopin Jehová Dios Noeta kamachirqan arcata ruwananpaq? ¿Imaynapin Noé yacharqan jayk’aqchus jatun para chayamunan karqan chayta? (w12 15/4 23 párrs. 5-8).
3. ¿Imaraykun nisunman “jatun paraqa chayamurqanpunin” nispa? (ijwbq yachachikuy 156 párrs. 2-5 recuadro). A
Historic Collection/Alamy Stock Photo
Dibujo A: India nacionpi juj willakuy kan. Juj runas juj barcota ruwakusqa jatun paramanta salvakunanpaq. Paraq pasasqan qhepamansi chay runaqa juj sacrificiota jaywasqa, tiempowanqa askha wawakunayoqsi kapusqa.
4. ¿Iman pasarqan jatun paraq chayamusqan pachaj watakuna qhepaman? ¿Imaynan Noé kashanman karqan chaykunata rikuspa? (it “Noé” párr. 13). B
Dibujo B
Imakunapin yanapawasunman
¿Imaynapin kay tiempo Noepa tiemponwan kaqlla kashan? (Mat. 24:36-39).
¿Imaynatan Noepa ejemplon yanapawasunman. . .
. . . imatapas allinta organizaspa ruwananchispaq? C
Foto C
. . . allin llank’aq kananchispaq? D
Foto D
. . . pacienciakuq kananchispaq? E
Foto E
¿Imakunata ruwaspan rikuchiwaq Noé jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
¿Imatan tapuwaq Noé kausarimpuqtin?
Astawan yachanapaq
Juj runan Noé jina familianta umallishan, kaypin paymanta astawan yachanki.
Wawaykichista yanapaychis Noemanta astawan yachanankupaq.
“Noeqa allin iñiyniyoq kasqantan rikuchirqan” (ijwis yachachikuy 18)