4 ABRAHÁN
Ñaupaq kutita Diospa guerranpi maqanakuq runa
JEHOVÁ Diosmi juj munay promesata amigon Abrahanman willarqan. Chaywanmi tukuy ima cambianan karqan. Paytan nirqan: “Noqan qanta jatun nacionman tukuchipusayki”, nispa. Chaymantataq Diosqa juj munay jallp’atan qhawarichirqan, jinaspa nirqan chayta miraynin runakunaman qopunanpaq (Gén. 12:2; 13:14, 15). Satanasmi ichaqa mana munarqanchu chay nación jatarinanta. ¿Imarayku? Satanasqa yacharqanmi chay nacionmanta juj “miray” jamunanta jinaspa paytapas kamachisqan runakunatapas chinkachipunanta (Gén. 3:15).
Satanasqa imaymanatan Abrahanta familiantapas ruwarqan. Paykunamanta jujninmi kashan sobrinon Lot. ¿Iman pasanman karqan? Juj kutinmi Abrahanqa sobrinon Lot-ta nirqan mayqen jallp’apichus tiyayta munarqan chayta ajllakunanpaq. Jinan Lotqa allin jallp’ata askha unuyoq jallp’ata munaspa Sodoma llaqtaq qayllanman tiyaq ripurqan. “Sodoma llaqtapi runakunaqa sinchi millaymi karqanku, Jehová Diospa contranpipas jatun juchakunatan ruwaqku” (Gén. 13:8-13). Sodoma llaqtamanta reyqa Canaán llaqtamanta tawa reykunawanmi jujllachasqa kasharqan. Paykunaqa askha watakunañan Elam llaqtamanta reyta servisharqanku. Ichaqa manaña impuestota pagayta munaspankun chay rey contra jatarirqanku. Chayta yacharuspan Elam llaqtamanta reyqa kinsa llaqtamanta reykunaq yanapayninwan Sodoma llaqtata yanapaqnin llaqtakunatawan atiparqanku. Jinaspa Sodoma llaqtaq qhapaq kayninkunata apapurqanku, wakin runakunatapas presotan aparqanku. Lot-tapas familiantapas presotan apapurqanku.
Abrahanqa 318 runakunatan ajllarqan tawa llaqtakunamanta juñunasqa ejercitokunawan maqanakuq rinankupaq
¿Imatan Abrahán ruwarqan Lot-ta presota apapusqankuta yacharuspa? Payqa yaqapaschá ninman karqan: “Allinta piensaykuspachá riki maypichus tiyanantaqa ajllakunman karqan”, nispa. Chaymantapas Abrahanqa yaqapaschá mancharikunman karqan chay runakunawan maqanakuyta, jinaspa manaña sobrinonta libraq rinmanchu karqan. Yachasqanchis jina Abrahanqa manan allin maqanakuq soldadochu karqan, aswanpas payqa oveja michiqllan karqan, kayman jaqayman astakachakuspan puriqpas. Chaymantapas Elam llaqtataqa Sinar llaqtamanta reymi apoyasharqan. Abrahanpa llaqtan Urqa Sinar jallp’apin kasharqan. Chhaynaqa, yaqapaschá Abrahanqa nillanmantaq karqan: “Imaynapitaq kay reywanri maqanakuyman. Paywan maqanakusaq chayqa manapaschá jayk’aqpas llaqtayman kutipuyta atisaqñachu”, nispa. Ichaqa ¿chhaynatachu Abrahán piensanman karqan? Manan. Aswanpas mana manchakuspan Lot-ta libraq rirqan. Payqa Jehová Diospa yanapayninpin confiarqan.
Chay kutipaqqa yaqachus jina Abrahanpa wasinpiqa waranqa masña kankuman karqan. Chaychá Abrahanqa 318 allin maqanakuq kamachinkunata ajllarqan maqanakuq rinankupaq. Paykunaqa juj runakunawan iman Dan ladokama rirqanku, chaypin Lot-ta apaq ejército qayllaman chayarqanku. Jinan Abrahanqa kamachinkunata grupo-grupopi t’aqarqan, jinaspa tutapi paykunaman phawaykurqanku. Abrahanqa pisi runakunallawanmi chay runakunata atiparqan, wakin soldadokunaqa wichay ladomanmi ayqekurqanku. Paykunatapas Abrahanqa qatiparqanmi Damasco llaqtaq wichay ladonpi kaq Obá llaqtakama. Chaypin paykunata jap’irqanku, chaymantapas llapa ima apasqankutan qechumurqanku. Lot-tapas familiantapas libramurqankun.
¿Imaynatan Jehová Dios qhawarinman karqan Abrahán mana manchakuspa maqanakuq risqanta? Allinpaqmi qhawarirqan. Chaytan Abrahanqa sut’ita repararqan Salem llaqtanta pasashaspa. Chay llaqtapin Melquisedec rey kasharqan, Jehová Diospa sacerdoten iman karqan. Paymi Abrahanwan tupaq lloqsimurqan, jinan payta bendecirqan. Abrahantaq llapa qechumusqanmanta chunka kaq parteta Melquisedecman qorqan. Chaywanmi Abrahanqa rikuchisharqan imaynas chay guerrataqa Dioswan atiparqan chayta.
Chaypin sut’ita yachanchis chay kutipi guerraqa mana runakunaqchu kasqanta, aswanpas Diospa guerran kasqanta. Bibliapipas ninmi: “Jehová Diospa maqanakuyninmanta willaq qelqa”, nispa (Núm. 21:14). Chay qelqapiqa yaqapaschá Abrahanpa maqanakusqan ñaupaqta rijurishan. Watakunaq pasasqanman jinan Abrahanpa miraynin runakunaqa Canaán runakunawan maqanakurqanku Diospa prometesqan jallp’aman jaykunankupaq. Chay kutipipas kasukuq kasqankuraykun Jehová Diosqa paykunata yanaparqan chay llaqtata atipanankupaq.
Chay Israel runakuna Dios contra jatariqtinkuqa manan Diosqa paykunata yanapaqchu. Astawanqa wawan Jesusta mana chaskisqankuraykun Israel naciontaqa manaña bendecirqanñachu. Aswanpas Jesuswan kuska kamachimunankupaq ajllasqa cristianokunatan bendeciyta qallarirqan. Paykunaqa manañan ñaupa tiempopi guerrakunapi jinañachu maqanakunku (Mat. 26:52). Chaymantapas Jesusmi paykunata yachachirqan Satanás contra, yanqa yachachikuykuna contra qaqata sayanankupaq, mana allin ruwaykunatapas ama ruwanankupaqwan. Jesús kikinmi sut’ita rikuchirqan imaynas chaykunata atipanapaqqa mana manchakuq valiente kana chayta.
Kay textokunata leey
¿Imaniwaqmi?
¿Imakunata ruwaspan Abrahán rikuchirqan mana manchakuq kasqanta?
Astawan t’aqwiriy
1. ¿Imakunan sut’ita rikuchin kay willakuy cheqaqpuni kasqanta? (w89 1/7 5, 6).
2. Bibliapi willasqanman jina, ¿maypin kanman karqan Sodoma Gomorra llaqtakuna? ¿Imakunan sut’ita rikuchin chhaynapuni kasqanta? (it “Mar Salado” párr. 6). A
BestTravelPhotography/iStock via Getty Images Plus
Foto A: Kunankamapas kachi qochaq cantonkunapiqa kashanraqmi palmera sach’akuna juj plantakunapas (kunanmi kachi qochata reqsikun mar Muerto nispa). Yaqachus jina chayneqpi kashanman karqan Sodoma llaqta.
3. Melquisedecqa Salem llaqtapin sacerdote rey ima karqan, ¿maypin kanman karqan Salem llaqta? (it “Salem”).
4. ¿Imaynapin Melquisedec Jesús jina karqan? (it “Sumo sacerdote” párrs. 27-28). B
Dibujo B
Imakunapin yanapawasunman
Abrahanqa dejallarqanmi Lot allin jallp’api tiyananta. ¿Imatan Abrahanmanta yachasunman familianchiskunawan, hermanonchiskunawan juj runakunawanpas chhaynapi tarikuspa? C
Foto C
¿Imatan yachasunman Abrahán sobrinon Lot-ta mana manchakuspa librasqanmanta?
¿Imakunata ruwaspan rikuchiwaq Abrahán jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
¿Imatan tapuwaq Abrahanpas Lotpas kausarimpuqtinku?
Astawan yachanapaq
Kaypin yachasun imaynatas Abrahanqa tukuy sonqo Jehová Diospi confiarqan chayta.
¿Imaynatan Abrahán rikuchirqan mana manchakuq kasqanta manaraq Ur llaqtanmanta lloqsimuspa?