5 ABRAHÁN
Sasaña karqan chaypas Diostan kasukurqan
ABRAHANQA mana iskayaspan Jehová Diospa kachasqan orqoman rirqan. Diospa kamachisqanta kasukuspa tukuy ladomanña purirqan chaypas, chay kutipi kamachisqanta kasukuyqa manachá facilchu karqan. ¿Imarayku? Kaypin chayta yachasunchis.
Abrahanqa piensashallarqanchá Jehová Diospa imachus kamachisqanpiqa. Paytan Diosqa nirqan: “Abrahán, uyariykuway. Ancha munakusqayki sapallan wawayki Isaacta pusarikuspa Moria jallp’aman riy. Chaypin juj orqota rikuchimusayki, chaypitaq wawaykita ruphachina ofrendata jina jaywamuwanki”, nispa. Jehová Diosqa allintan yacharqan Abrahanqa wawan Isaacta anchata munakusqanta. Chhaynaqa, ¿imaraykutaq chaytari kamachirqan? ¿Imaynatan Abrahán rikuchinman karqan iñiyniyoq kasqanta mana manchakuq kasqantapas?
Abrahanmantan Bibliapi nin: “Chhaynapin Abrahanqa iñisqankurayku llapa chaninpaq jap’isqa kaqkunaq taytan kapurqan”, nispa (Rom. 4:11). Ichaqa manaraq Moria jallp’aman rishaspapas ñan Abrahanqa rikuchirqanña Diospi iñisqanta, Diospas yanaparqanmi allin iñiyniyoq kananpaq. Juj kutinmi Diosqa Abrahanman willarqan imaynas Sodoma Gomorra llaqtakunata thuninan karqan chayta. Chayta uyarispa Abrahanqa sinchita llakikurqan, chaymi Jehová Diosta tapurqan: “¿Cheqaqtapunichu chanin runakunatawan millay runakunatawan kuskata wañuchipunki?”, nispa. Jinan Jehová Diosqa pacienciawan Abrahanta entiendechirqan chay llaqtakunapi chanin runakuna kaqtinqa mana chinkachinanpaq (Gén. 18:16-33). Chaypin Abrahanqa allinta yacharqan Jehová Diosqa imatapas chaninta ruwaq kasqanta, may khuyapayakuq kasqantawan.
Abrahanqa mana manchakuspan Jehová Diospa kamachisqanta kasukurqan, ¿iman chayta ruwananpaq yanaparqan?
Chaykunaq pasasqan qhepallamanmi Jehová Diosqa admirakunapaq jina Abrahanpaq Sarapaqwan ruwapurqan. Chay kutipaqqa Saraqa 90 watanpiñan kasharqan, Abrahantaq 100 watanpiña. Chhayna kuraqkunaña kasharqanku chaypas Jehová Diospa bendecisqanmi wawayoq kapurqanku, paymi karqan Isaac. Chaypin Abrahanqa rikullarqantaq Diospaqqa tukuy imapas atikuqlla kasqanta. Wawayoq kayta manaña atirqankuchu chaypas Diospa atiyninwanqa wawayoqmi kapurqanku (Rom. 4:18, 19). Chaykunatan Abrahanqa sonqonpi yuyayninpi allinta jap’ikurqan.
25 wata qhepamanmi Diosqa Abrahanta kamachirqan Moria orqoman rinanpaq. Chayman rishaspaqa Abrahanqa piensasharqanchá Jehová Dios paykunarayku tukuy ima ruwasqanpi. Chaykunan Abrahanta yanaparqan Jehová Diospa atiyninpi confiananpaq, wawan Isaac wañupuqtin kausarichinanpipas confiananpaq (Heb. 11:19). Chayraykun Abrahanqa mana manchakuspa Diospa kachasqan orqoman rirqan.
Abrahanqa Jehová Diospa kamachisqan orqota rikuspan runankunata kamachirqan chayllapi qhepakunankupaq, wawan Isaacllawanmi chay orqoman rirqanku Diosman sacrificio jaywaq. Payqa seguron kasharqan iskayninku kutiyamunankumanta. Chay orqo pataman chayaspan Abrahanqa wawan Isaacpa makinkunata chakinkunatawan wataruspa altar pataman churarqan. Isaacqa taytanmanta aswan kallpayoqña karqan chaypas watachikullarqanmi. Jinan Abrahanqa cuchillota jap’ispa wawanta wañuchinanña kasharqan, chayllamanmi juj ángel nimurqan: “¡Abrahán! [ . . . ] Ama wawaykita wañuchiychu, amapuni imanaypaschu”, nispa. Jinan Abrahanqa mana wañuchirqanchu.
Allin Iñiyniyoq kasukuq ima kasqanmantan Jehová Diosqa Abrahanta felicitarqan. Chaymantapas imachus prometesqantan yuyarichirqan. Paymi Abrahanman prometerqan miraynin runakuna bendecisqa kanankuta, askhaman tukunankuta ima. Abrahán kasukuq kasqanrayku, Diospi confiasqanrayku iman kay pachapi llapa nacionkunapas askha bendicionkunata chaskinanku karqan.
Jehová Dios Abrahanman imakunachus prometesqanqa kay tiempopipas junt’akushanmi. Jamuq tiempopipas wiñaypaqmi askha bendicionkuna kanqa. Abrahán imapichus tarikusqanqa imatachus noqanchisrayku Jehová Dios ruwarqan chaytan rikuchillantaq. Diosqa Abrahán jinan listo kasharqan wawanta noqanchisrayku qonanpaq. Chayta ruwayqa may sonqo nanaychá Jehová Diospaqqa karqan. Chaywanpas kachamurqanmi wawan Jesusta noqanchisrayku wañunanpaq, chhaynapi wiñay kausayniyoq kananchispaq (Juan 3:16). Abrahanmanta kaypi willasqanmi sut’ita rikuchin may tukuytas Jehová Dios munakuwanchis chayta.
Noqanchispas Abrahán jina allin iñiyniyoq kananchispaqqa, allintan piensarinanchis Jehová Diosmanta yachasqanchispi imakunachus ruwasqanpipas. Sichus allin iñiyniyoq kasun chayqa mana manchakuq valienten kasun. Jehová Diosqa manan jayk’aqpas Abrahán jina ruwananchispaqqa kamachiwasunchu. Ichaqa imata ruwananchispaqña kamachiwasunman chaypas allin iñiyniyoq kasqanchismi yanapawasun mana manchakuspa Diosta kasukunanchispaq. Ichaqa, ¿imatan chaskisun kasukuq kasqanchismanta? Askha bendicionkunatan, mana piensaytaraqmi Diosqa imatapas qowasunchis.
Kay textokunata leey
¿Imaniwaqmi?
¿Imakunata ruwaspan Abrahán rikuchirqan mana manchakuq kasqanta?
Astawan t’aqwiriy
1. ¿Cheqaqtapunichu Abrahán kausarqan? (g 5/12 18, recuadro; it “Abrahán” párrs. 22, 23). A
Foto A: Egipto nacionpi Karnak nisqa temploq perqanpin rikukun “Abrahanpa tiyasqan campo”.
2. ¿Pin Abrahanman yachachinman karqan Jehová Diosmanta? (ia 29 párrs. 4, 5).
3. ¿Imatan Abrahán ruwarqan Jehová Dios yupaychasqanta chaskinanpaq? (rr 20 párr. 18).
4. ¿Imaraykun nisunman “Jehová Dios Génesis 22:17 textopi Abrahanman promesa ruwasqanqa tupanmi científico runakunaq nisqanwan” nispa? (g88 8/4 25). B
Foto B
Imagen B
Imakunapin yanapawasunman
Abrahanqa Diospa promesankunapin suyakuq, ¿imaynatan chay yanaparqan mana manchakuq kananpaq? ¿Imaynatan Diospa promesankuna yanapawasunman mana manchakuq kanapaq? C
Fotokuna C
¿Imaynatan Abrahán jina mana manchakuq kasqanchista rikuchisunman. . .
. . .maypiña kaspapas Diosmanta willana kaqtin? (Heb. 13:15).
. . .imanchistapas imapichus utilizana kaqtin? (Prov. 3:9).
. . .hermanonchiskunata yanapana kaqtin? (Filip. 4:18).
¿Imakunata ruwaspan rikuchiwaq Abrahán jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
¿Imatan tapuwaq Enoc kausarimpuqtin?
Astawan yachanapaq
Kaypin yachanki Abrahán imayna runa kasqanta.
¿Imaynapin Abrahán Diospa allin amigon karqan? ¿Imaynatan noqanchispas Dioswan allin amigontin kasunman?